ബാംഗ്ലൂര്‍ വിശേഷങ്ങള്‍

ഇനിയൊരിക്കലും, പ്രണയം...

2008-02-13T16:45:00.000+05:30

പ്രണയത്തിന്റെ തീക്കനല്‍ കോരിയിട്ട്,

പ്രളയാഗ്നിപോലെയെന്നുള്ളം ദഹിപ്പിച്ച്,

പ്രയാണ്യേപന്ഥാവിലൊന്നായലഞ്ഞിത്ര-

പ്രത്യക്ഷേ നീയെന്റെ ഹൃദയം പിളര്‍ന്നതിന്‍,

പ്രകൃത്യവേദന നീ അറിയുന്നുവോ...?

ഇനിയൊരിക്കലും, ആര്‍ക്കും, പ്രണയം നൊമ്പരങ്ങള്‍ നല്‍കാതിരിക്കട്ടെ

എന്ന പ്രാര്‍ത്ഥനയോടെ...

ഏവര്‍ക്കും Happy Valentine's Day...

സ്നേഹപൂര്‍വ്വം,

സതീര്‍ത്ഥ്യന്‍

റിവേഴ്സ് നൊസ്റ്റാള്‍ജിയ...

2008-02-03T14:58:00.000+05:30

ബാംഗളൂര്‍ നീ സുന്ദരിയാണ്! നിന്നെത്തട്ടിവരുന്ന കാറ്റിന് ഒരു മാദക ഗന്ധമാണ്... പച്ചനോട്ടിന്റെ മണത്തില്‍ foriegn perfume ഗന്ധം മേമ്പൊടി ചേര്‍ത്തൊരു ഫ്യൂഷന്‍ സുഗന്ധം... ചുറ്റിലും ഒരു കാന്തിക വലയം... അറിയാതെ അടുത്തെത്തുന്നവരെ പോലും, നിന്നിലലിയിക്കുന്ന ഈ ആകര്‍ഷണം നീ എങ്ങനെ തീര്‍ത്തു? ഒരു നിയോഗം പോലെ, ശൈത്യകാലത്തെ ഒരു പ്രഭാതത്തില്‍, നിന്നെത്തേടി ഞാനുമെത്തി. ഇഴഞ്ഞു നീങ്ങിയ ബസ്സില്‍ നിന്നും തത്രപ്പെട്ടു പുറത്തിറങ്ങുമ്പോഴേക്കും, കടുത്ത തണുപ്പ് എന്നെ പിടികൂടി. അതു തടയാന്‍ ഒന്നും കൈയ്യില്‍ കരുതിയിരുന്നുമില്ല. കൂട്ടിയിടിക്കുന്ന പല്ലുകളെ അടക്കി നിര്‍ത്താന്‍ ഞാന്‍ പാടുപെട്ടു. അറിയാത്ത ഒരു ഭാഷാ base ല്‍, മുറിത്തമിഴും, fillet ചെയ്ത കുറച്ചു മലയാളം വാക്കുകളും ചേര്‍ന്ന ശബ്ദാവലികള്‍ ചെവിയില്‍ തട്ടിയിട്ടും, തലയ്ക്കകത്തു കയറാതെ നിന്നു. ലക്ഷ്യം വച്ചു വന്ന address തേടി, ഞാന്‍ കയറിയ ഓട്ടോ ചലിച്ചുതുടങ്ങിയപ്പോള്‍, അന്ന് ശീതക്കാറ്റേറ്റ് ഞാന്‍ വിറച്ചു... ഇന്നിപ്പോള്‍ ഡിസംബറില്‍ പോലും നിനക്കെന്നെ തണുപ്പിക്കാന്‍ കഴിയാതെ വരുന്നു.. ചിലപ്പോള്‍ മാര്‍ച്ചില്‍ ഞാനിവിടെ കാശ്മീര്‍ കാണുന്നു... നിന്നെ ഞാന്‍ കുറ്റം പറയില്ല... കുറ്റം നമുക്ക് Globalization നും, Global Warming നും നല്‍കാം...

നീയെനിക്ക് എന്നും പ്രിയപ്പെട്ടവളല്ലേ... Computer തരംഗങ്ങള്‍ നിന്റെ സിരകളിലൂടൊഴുകുമ്പോള്‍ ഏതോ ഒരു നിര്‍വൃതിയോടെ നീ തരളിതയാവുന്നു! അതിന്റെ ആവേഗത്തില്‍ ഞാനും പങ്കുചേര്‍ന്നു എന്നറിഞ്ഞാല്‍ നിനക്കു സന്തോഷമാവില്ലേ..? അല്ലെങ്കില്‍ ഞാനെന്തിനു പറയുന്നു; എല്ലാം നീ അറിയുന്നുണ്ടല്ലൊ!! പക്ഷേ, സ്വാര്‍ത്ഥതാല്പര്യങ്ങളുടേയും, ആഡംബരക്കാറുകളുടേയും ആധിക്യം കാരണം നീ വീര്‍പ്പുമുട്ടുന്നതു ആരും അറിയുന്നില്ലല്ലോ? അറിഞ്ഞതായ് ഭാവിക്കുന്നില്ലല്ലോ?... ശൈശവത്തില്‍ നിന്നെ താ‍ലോലിച്ചവര്‍ക്കും, യൌവ്വനത്തില്‍ നിന്നെ സ് നേഹിച്ചവര്‍ക്കും, നിന്റെ അകാലവാര്‍ദ്ധക്യത്തിന്റെ ലക്ഷണങ്ങള്‍ കണ്ടുനില്‍ക്കാനാവില്ല... എനിക്കും... കാരണം ഞാനും നിന്നെ സ് നേഹിക്കുന്നു...

സംസ്കാരങ്ങളുടെ പരിഛേദനങ്ങളും, സന്നിവേശങ്ങളും നീ എത്ര കണ്ടു.. ധനികന്‍ ധനികനായും, ദരിദ്രന്‍ ദരിദ്രനായും വളരുന്നു.. അങ്ങനെ വലിയ ധനികനും, വലിയ ദരിദ്രനും എത്രയേറെ ഉണ്ടാവുന്നു.. നിന്നെ സ് നേഹിക്കാനെത്തിയവര്‍ തന്നെ നിന്നെ കളങ്കപ്പെടുത്താനായ് ശ്രമിക്കുന്ന കാഴ്ച്ചയും ഞാന്‍ കണ്ടു.. പക്ഷേ, നിന്നെ കളങ്കപ്പെടുത്താനോ, മലിനമാക്കനോ, നിന്നെ സ് നേഹിക്കുന്നവര്‍ സമ്മതിക്കില്ല.. എങ്കിലും, നിന്നെ വധിക്കാന്‍ ശ്രമിക്കുന്ന ചാവേറുകളെ, കരളുറപ്പോടെ തടയാന്‍ മുന്നിട്ടിറങ്ങുന്നവര്‍ എത്ര പേരുണ്ടാവും നിന്റെ കാമുകവൃന്ദത്തില്‍.. എന്തുതന്നെയായാലും, നീ എല്ലാവരേയും സ് നേഹിച്ചു...

ഒടുവില്‍ നിന്നെ പ്രലോഭിപ്പിച്ച് നിന്റെ കഴുത്തില്‍ മിന്നുകെട്ടിയ രാഷ്ടീയക്കാരന്റെ പേര് ഞാന്‍ ഓര്‍ക്കുന്നില്ല. പുഴുത്ത നോട്ടുകെട്ടുകള്‍ക്ക് വേണ്ടി, അവന്‍ ആര്‍ക്കെല്ലാം നിന്നെ കാഴ്ച്ചവെച്ചു എന്നും എനിക്കറിയില്ല... പക്ഷേ, എണ്ണിയാല്‍ തീരാത്തത്ര രാഷ്ട്രീയക്കുഞ്ഞുങ്ങളെ നീ പെറ്റിട്ടു.. മുലപ്പാലിനൊപ്പം നിന്റെ ചോരയും നീരും വറ്റുന്നത് നീ അറിഞ്ഞോ? നിന്നെ വെട്ടിമുറിച്ച് വോട്ടുബാങ്കുകളാക്കിയും, നിന്നെ വിറ്റ് സമ്പാദ്യം ബാങ്കുകളിലിട്ടും നിന്റെ മക്കള്‍ വളര്‍ന്നുവന്നത് നീ അറിഞ്ഞോ? നിറുകയിലെ സിന്ദൂരത്തിനരികെ, വെള്ളിവരകള്‍ തെളിയുന്നത് നീ കാണുന്നുണ്ടോ? അപ്പോഴും നീ എല്ലാവരേയും സ് നേഹിച്ചു...!

നിനക്കുവേണ്ടി ചില ശബ്ദങ്ങള്‍ ഉയരുന്നത് ഞാന്‍ കേള്‍ക്കുന്നുണ്ട്.. വളരെ നേര്‍ത്ത സ്വരമാണെങ്കില്‍ കൂടി, ഞാനും അതില്‍ പങ്കുചേരാം.. കാരണം നിന്നെ വെറുക്കാന്‍ എനിക്കാവില്ല.. നീയെനിക്കു പ്രണയത്തിന്റെ വാടാമല്ലികള്‍ തന്നു... നെടുവീര്‍പ്പുകള്‍ കൈമാറാന്‍ ചോലകള്‍ തന്നു... ഒരുപാട് ബന്ധങ്ങളും, സൌഹൃദങ്ങളും, സ് നേഹവും തന്നു... നിന്നില്‍ പടരുവാനായുന്ന കാലുഷ്യം പ്രണയത്തില്‍ പടര്‍ന്നുവെങ്കിലും, നീയെനിക്ക് പ്രതീക്ഷകള്‍ തന്നു... മറക്കാനാഗ്രഹിക്കുന്ന ഒരു രാത്രിയില്‍ അപകടത്തില്‍പ്പെട്ട് റോഡില്‍ കിടന്ന എന്നെ നിന്റെ മക്കളാരും തിരിഞ്ഞുനോക്കിയില്ലെങ്കിലും, നീയെനിക്ക് ആറുമാസത്തെ അവധിക്കാലം തന്നു...

കാതങ്ങള്‍ അകലെയിരുന്ന് ഞാന്‍ പറയട്ടെ; പ്രിയ ബാംഗളൂര്‍, ഇപ്പൊഴും ഞാന്‍ നിന്നെ സ് നേഹിക്കുന്നു...

കുറുമാനാണു താരം (ബാംഗ്ലൂരിലും) -3

2007-08-15T18:20:00.000+05:30

യോഗം ആരംഭിച്ചു.എല്ലാരുടെയും മുന്നില്‍ ഒരു കസേരയില്‍ കുറുമാനെയും പ്രതിഷ്ഠിച്ചു.പെട്ടെന്ന്‌ ഒരു മുന്നറിയിപ്പുമില്ലാതെ കുട്ടപ്പയിബ്ലോഗ്ഗര്‍ വേദിയിലേക്ക്‌ ഓടിക്കയറി അവിടൊക്കെ ചുറ്റിപ്പറ്റി നിന്നു.ആള്‍ അധ്യക്ഷനാണത്രേ (സത്യം പറയാലോ കണ്ടാല്‍ പറയൂല).എന്തായാലും ഒരു വിധത്തില്‍ എല്ലാരുടെയും സഹായത്തോടെ ഒരധ്യക്ഷപ്രസംഗം(എന്നും പറയാം)പൂര്‍ത്തിയാക്കി അദ്ദേഹം തിരിച്ചെത്തി.അടുത്തതായി നടന്നത്‌ മീറ്റിന്റെ പ്രധാന ലക്ഷ്യമായ പുസ്തകപ്രകാശനമാണ്‌. കുറുമാന്റെ 'എന്റെ യൂറോപ്പ്‌ സ്വപ്നങ്ങള്‍' ശ്രീ ബെന്നി കൊച്ചുത്രേസ്യക്ക്‌ (അതായത്‌ എനിയ്ക്ക്‌)നല്‍കിക്കൊണ്ട്‌ പ്രകാശനകര്‍മ്മം നിര്‍വ്വഹിച്ചു.തഥവസരത്തില്‍ ഒട്ടുമിക്ക എല്ലാ ബ്ലോഗ്ഗേര്‍സും അവരവരുടെ കാമറകള്‍ പ്രദര്‍ശിപ്പിക്കാന്‍ വേണ്ടി ചുമ്മാ ഫ്ലാഷടിക്കുകയും അതെല്ലാം മുന്നിലിരുന്ന ശ്രീ കുറുമാന്റെ തലയില്‍ തട്ടി റിഫ്ലക്റ്റ്‌ ചെയ്യുകയും ചെയ്തു. അങ്ങനെ ഉദ്ദേശിച്ചതിലും കൂടുതല്‍ ഉജ്ജ്വലപ്രഭയോടെ കുറുമാന്റ ബുക്ക്‌ (അല്ല നമ്മടെ സ്വന്തം ബുക്ക്‌) ബാംഗ്ലൂരിലൂടെ തന്റെ ജൈത്രയാത്ര ആരംഭിച്ചു.

ബെന്നി,ലോനപ്പന്‍ ,കുട്ടിച്ചാത്തന്‍ എന്നിവരുടെ പ്രസംഗങ്ങള്‍ക്കു ശേഷം കുറുമാന്‍ ബുക്കിനെ പറ്റിയും ബ്ലോഗ്ഗിനെപറ്റിയും തന്റെ മാനസപുത്രനായ ബൂലോഗ കാരുണ്യം എന്ന സംരംഭത്തെപറ്റിയുമൊക്കെ മനോഹരമായ ഒരു പ്രസംഗം നടത്തി. എവിടെയെങ്കിലും ഒളിച്ചിരുന്ന്‌ ബ്ലോഗ്‌ എഴുതാന്‍ മാത്രമല്ല നാലു പേരുടെ മുന്നില്‍ നിന്ന്‌ പ്രസംഗിക്കാനും താന്‍ ഒട്ടും പിന്നിലല്ലെന്ന്‌ തെളിയിക്കുന്നതായിരുന്നു ആ പ്രകടനം.

ഇനി നടന്ന പരിപാടി മീറ്റില്‍ പങ്കെടുക്കാതിരുന്ന എല്ല ബ്ലോഗ്ഗേര്‍സിനും വന്‍ നഷ്ടമായി എന്നു അറിയിച്ചുകൊള്ളട്ടെ.തഥാഗതന്‍ സര്‍വ്വശക്തിയുമെടുത്ത്‌ അവിടെ ഉള്ള എല്ലാ ബ്ലോഗ്ഗേര്‍സിനെയും പരിചപ്പെടുത്തി അഥവാ വാനോളം പുകഴ്ത്തി.മീറ്റില്‍ പങ്കെടുക്കാന്‍ പറ്റാതിരുന്ന ശ്രീ ശ്രീജിത്തിനെ അനുസ്മരിച്ചു കൊണ്ടാണ്‌ അദ്ദേഹം ആരംഭിച്ചത്‌(ബാംഗ്ലൂര്‍ ബ്ലോഗ്ഗേര്‍സിന്റെ രോമാഞ്ചവും നെടുംതൂണുമായ ശ്രീജിത്‌ ഇപ്പോള്‍ അമേരിക്കയില്‍ 'എന്റെ ബാംഗ്ലൂര്‍ എത്ര സുന്ദരം' എന്ന പാട്ടും പാടി കണ്ണീര്‍ വാര്‍ത്തുകൊണ്ടിരിക്കുകയാണ്‌) ഇനി ഒരു പോസ്റ്റു പോലും ഇട്ടില്ലെങ്കിലും വേണ്ടില്ല എല്ലാ മീറ്റിലും കൃത്യമായി പങ്കെടുത്ത്‌ പുകഴ്തലുകള്‍ എറ്റുവാങ്ങുമെന്ന്‌ നവാഗതബ്ലോഗ്ഗേര്‍സ്‌ മനസ്സില്‍ ദൃഢപ്രതുജ്ഞ എടുത്തു. എല്ലാവരും തലകുലുക്കിയും പുഞ്ചിരിച്ചും ചമ്മി മുഖം കുനിച്ചുമൊക്കെ പ്രശംസകള്‍ ഏറ്റുവാങ്ങിയപ്പോള്‍ തികച്ചും വ്യത്യസ്തമായ രീതിയിലാണ്‌ ശ്രീ മഴനൂല്‍ പ്രതികരിച്ചത്‌. ഈ ക്രൂരകൃത്യം നടന്ന സമയത്ത്‌ ഹാളിനു പുറത്തിരുന്ന മഴനൂല്‍ ഒന്നിനു പുറകേ ഒന്നായി നല്ല വെളുത്ത പുകച്ചുരുളുകള്‍ ഉയര്‍ത്തി വിട്ടാണ്‌ തന്റെ സാന്നിധ്യം അറിയിച്ചത്‌. ചെങ്കൊടി വെട്ടിത്തയ്ച്ച പാന്റും അദ്ദേഹത്തെ മീറ്റിലെ പ്രധാന നോട്ടപ്പുള്ളിയാക്കി മാറ്റി.(ഈ മഴനൂല്‍ന്നു പറയുന്ന സംഭവം ഒരു മനുഷ്യനാണോ അതോ പ്രേതമാണോ എന്ന ആശങ്ക ഇപ്പോള്‍ പലര്‍ക്കുമുണ്ടായിട്ടുണ്ട്‌. കാരണം ഒറ്റ ഫോട്ടൊയില്‍ പോലും അദ്ദേഹത്തിന്റെ രൂപം പതിഞ്ഞിട്ടില്ല !!!)

ചര്‍ച്ചയില്ലാതെ എന്തോന്നു മീറ്റ്‌!! കമന്റ്‌/പോസ്റ്റ്‌ അഗ്രഗേറ്ററുകളുടെ പ്രസക്തി- ഇതായിരുന്നു ചര്‍ച്ചാവിഷയം. ചര്‍ച്ച എന്നു കേട്ടതും അവിടെവിടെയോ ഫോട്ടോ പിടിച്ചുകൊണ്ടു നടന്നിരുന്ന ചന്ത്രക്കാറന്‍ ഓടിവന്ന്‌ മുന്നില്‍ തന്നെയുള്ള കസേരയിലിരുന്നു.ആമുഖമായി പ്രസ്തുത വിഷയത്തെ പറ്റി ഒരു പ്രസംഗം നടത്തിയ ശേഷം കുമാറേട്ടനും മുന്നില്‍ തന്നെ സീറ്റു പിടിച്ചു.തുടര്‍ന്നവിടെ നടന്നത്‌ ഘനഗംഭീരമായ വാക്‌പയറ്റായിരുന്നു.ചന്ത്രക്കാറനും കുമാറേട്ടനുമായിരുന്നു പ്രധാന പോരാളികള്‍.വിരലിലെണ്ണവുന്ന ചില ബ്ലോഗേര്‍സും തങ്ങളെ കൊണ്ടാവുന്ന പോലെ ചര്‍ച്ചയില്‍ പങ്കെടുത്തു.ഇവിടെ ശ്രീ ഇക്കാസിനെ പറ്റി പറയാതെ വയ്യ.ചില ടെക്നിക്കല്‍ ടേംസൊക്കെ കേട്ടപ്പോള്‍ 'ഇതു നമ്മടെ സ്വന്തമല്ലേ' എന്ന മട്ടിലിരുന്ന അദ്ദേഹത്തോട്‌ ചില സംശയങ്ങള്‍ ചര്‍ച്ചക്കാര്‍ ചോദിച്ചെന്നോ അപ്പോള്‍ ഇക്കാസ്‌ ജനലിലൂടെ പുറത്തേക്കു നോക്കിക്കൊണ്ട്‌ 'ശ്ശൊ ബാംഗ്ലൂരിലും മഴയ്ക്ക്‌ പച്ചവെള്ളം തന്നാണോ മോളീന്നു വീഴുന്നതെന്ന്‌' ഗവേഷണം നടത്തിയെന്നോ ഒക്കെ ചില അസൂയക്കാര്‍ പറഞ്ഞു പരത്തുന്നുണ്ട്‌.ഇതിനിടെ മൂന്നു വനിതാബ്ലോഗ്ഗേര്‍സ്‌, അവിടെ പുറത്തു വച്ചിരുന്ന കാപ്പി,സമോസ എന്നിവയുടെ ഗുണപരിശോധനയ്ക്കായി ഹാളില്‍ നിന്ന്‌ ഒളിച്ച്‌ ഇറങ്ങിപ്പോയി.അവര്‍ക്ക്‌ ഒരു സഹായത്തിനായി പത്തു പതിനഞ്ചു ബ്ലോഗ്ഗേര്‍സും.'ഇനി ഞങ്ങളായിട്ടെന്തിനാ' എന്നും പറഞ്ഞ്‌ ബാക്കിയുള്ളവരും കൂടി ചര്‍ച്ച നിര്‍ത്തി വച്ച്‌ പുറത്തേക്കു വന്ന്‌ ഭക്ഷണത്തിന്റെ കാര്യത്തില്‍ ഒരു തീരുമാനമാക്കിയ ശേഷം ചര്‍ച്ച പുനരാരംഭിച്ചു.അവസാനം ചര്‍ച്ചയില്‍ ഉരുത്തിരിഞ്ഞ പോയിന്റ്സ്‌ എടുത്ത്‌ പോസ്റ്റാക്കണം എന്ന എല്ലവരുടെയും അഭ്യര്‍ത്ഥന ചന്ത്രക്കറന്‍ സ്വീകരിച്ചതോടെ ചര്‍ച്ചയ്ക്കു തിരശീല വീണു. പക്ഷേ ഇവര്‍ രണ്ടു പേരുമായിരുന്നില്ല അവിടുത്തെ താരം. ഒരു സൈഡില്‍ ചീവീടു പോലെ കുമാറേട്ടന്‍. മറ്റേ സൈഡില്‍ ചെണ്ടകൊട്ടുന്നതു പോലെ ചന്ത്രക്കാറന്‍. ഇവര്‍ക്കു നടുവില്‍ അചഞ്ചലനായി അക്ഷോഭ്യനായി ചൈനാ വന്മതില്‍ പോലെ നിലകൊണ്ട ആ മഹാന്‍. അതേ കലേഷണ്ണന്‍!! അദ്ദേഹം ഈ വര്‍ഷത്തെ ക്ഷമ,സഹനശക്തി എന്നിവയ്ക്കുള്ള നോബല്‍ സമ്മാനം അര്‍ഹിക്കുന്നുവെന്ന്‌ എല്ലാവര്‍ക്കും വേണ്ടി ഞാന്‍ പ്രഖ്യാപിക്കുന്നു.

ശ്രീ ദില്‍ബാസുരന്‍..ഒരു ബാംഗ്ലൂര്‍ ബ്ലോഗറല്ലെങ്കിലും അതിന്റെ യാതൊരഹങ്കാരവും കാണിക്കാതെ മീറ്റിലേക്ക്‌ വിളിച്ച്‌ ആശംസകള്‍ അറിയിച്ച ദില്‍ബു തന്റെ മനസ്സും വിശാലമാണെന്ന്‌ തെളിയിച്ചു.റൂം മേറ്റിന്റെ ഫോണ്‍ അടിച്ചു മാറ്റിയാണ്‌ ദില്‍ബു ഈ സ്‌നേഹപ്രകടനം നടത്തിയതെന്ന്‌ ചില ഗള്‍ഫ്‌ ഏജന്‍സികള്‍ റിപ്പോര്‍ട്ട്‌ ചെയ്തിട്ടുണ്ട്‌.അതു കേട്ട ഉടനെ തന്നെ 'കണ്ടാല്‍ പറയൂലല്ലോ ഇത്രയ്ക്കു ദാരിദ്ര്യമാണെന്ന്' എന്നു ചില നാടന്‍ ബ്ലോഗേര്‍സ്‌ ഞെട്ടലും രേഖപ്പെടുത്തിക്കഴിഞ്ഞു.

(അടുത്ത പോസ്‌റ്റോടെ ഈ പരിപാടി ഞാന്‍ തീര്‍ക്കും ഉറപ്പ്‌)

കുറുമാനാണു താരം (ബാംഗ്ലൂരിലും) - 2

2007-08-14T19:35:00.002+05:30

സമയം ഇഴഞ്ഞു നീങ്ങി.ബ്ലോഗ്ഗര്‍മാരു പോയിട്ട്‌ ഒരു പൂച്ചക്കുഞ്ഞു പോലും ആ ഏരിയയിലെക്കു വരുന്നില്ല (അത്രയ്ക്കു ജനവാസമുള്ള സ്ഥലമാണേ) കാത്തിരുന്നു മടുത്തതു കൊണ്ട്‌ ഞങ്ങള്‍ ഫാം ചുറ്റിക്കാണാനിറങ്ങി. മനുഷ്യന്‍മാരൊന്നുമില്ലെങ്കിലെന്ത്‌ മൃഗങ്ങളും പക്ഷികളും മറ്റു ജന്തുക്കളുമൊക്കെ ഒരുപാടുണ്ട്‌.അതു വഴി ഈവിനിംഗ്‌-വാക്കു നടത്തുന്നുണ്ടായിരുന്ന അഞ്ചാറു പട്ടികളുടെ കണ്ണില്‍ പെടാതെ ഞങ്ങള്‍ മരങ്ങളുടെ മറവിലൂടെ നടന്നു. വെറുതേയങ്ങു നടക്കുകയല്ല കേട്ടോ- ഒപ്പന, മാര്‍ഗ്ഗം-കളി,ഡിസ്കോ എന്നീ കലാരൂപങ്ങളുടെ ഒരു ജുഗല്‍ബന്ധി അവതരിപ്പിച്ചു കൊണ്ടാണ്‌ നടപ്പ്‌.കുറഞ്ഞസമയം കൊണ്ടു തന്നെ ഞങ്ങളെ കലാകാരികളാക്കിമറ്റിയതിന്റെ എല്ലാ ക്രെഡിറ്റും അവിടുത്തെ പ്രധാന താമസക്കാരായ കൊതുകുകള്‍ക്ക്‌ അവകാശപ്പെട്ടതാണ്‌.എന്തായാലും അധികം വൈകാതെ തന്നെ ഞങ്ങളുടെ കൂടെ കൊതുകുകടി ഷെയര്‍ ചെയ്യാനായി ഒരു ബ്ലോഗ്ഗര്‍ സംഘം കൂടി വേദിയിലേക്കു കടന്നു വന്നു.

"ഞാന്‍ സിജിത്‌"

"യേത്‌ സിജിത്‌???"

"കുട്ടന്‍സ്‌ എന്നാണ്‌ ബ്ലോഗിലെ പേര്‌"

ഇപ്പം പിടികിട്ടി. ഇങ്ങനെ മലയാളത്തില്‍ പറഞ്ഞലല്ലേ മനസ്സിലാകൂ.

അടുത്തയാളെ പരിചയപ്പെടുത്തേണ്ടി വന്നില്ല. അറിയാം

"ശ്രീശോഭിനല്ലേ??"

അങ്ങോട്ടു ചോദിച്ചപ്പോഴെക്കും ആളു രണ്ടടി പോങ്ങി.മറുപടിയായി 'ഞാനിത്ര പ്രശസ്തനോ' എന്നു മനസ്സിലും 'എങ്ങനെ മനസ്സിലായി' എന്നുറക്കെയും ഒരു ചോദ്യം .

"ബ്ലോഗില്‍ ഫോട്ടോ കണ്ടിട്ടുണ്ട്‌"

(ഇവിടെ അല്‍പ്പം പൊതുവിജ്നാനം: ബ്ലോഗിനു കണ്ണു തട്ടാതിരിക്കുവാന്‍ വേണ്ടി സ്വന്തം ഫോട്ടോ അതിന്റെ മൂലയ്ക്ക്‌ കുത്തിച്ചാരിവെയ്ക്കുന്ന രീതി പല നാടുകളിലും നിലവിലുണ്ട്‌- ഉദാ; പാലാ,ഭരണങ്ങാനം...)

ഇനിയപ്പുറത്ത്‌ ഒരു കൊച്ചുകുട്ടി നില്‍ക്കുന്നുണ്ട്‌ പേരു ചോദിച്ചപ്പോഴല്ലെ ഞെട്ടീത്‌. അതാണു പോലും സുജിത്‌ ഭക്തന്‍.പേരൊക്കെ കേട്ടപ്പോള്‍ ഞാന്‍ വിചാരിച്ചത്‌ 'ശരണമയ്യപ്പാ' എന്നു വിളിച്ചു നടക്കുന്ന ഒരു സ്വാമിയേയായിരുന്നു.ഇതൊരു മാതിരി കോലുമുട്ടായിപ്രായത്തിലൊരു കിടാവ്‌!!!

അവരുടെ കൂടെ ജോജു,അരവിശിവ തുങ്ങിയവരുമുണ്ട്‌. എല്ലാവരുടെയും മുഖത്ത്‌ എവറസ്റ്റ്‌ കീഴടക്കിയതു പോലുള്ള ഒരു സന്തോഷം/ചാരിതാര്‍ത്ഥ്യം/അഹങ്കാരം. കാര്യമെന്താന്നോ. വരുന്ന വഴിക്ക്‌ അവരുടെ കാറ്‌ ആക്സിഡന്റായി പോലും.ഞങ്ങടെ കുറ്റമല്ല എന്ന്‌ എല്ലാരും മാറി മാറി പറയുന്നുണ്ട്‌."എന്നിട്ടെന്തെങ്കിലും പറ്റിയോ"ന്നു ചോദിച്ചപ്പോ ആ കാറിന്റെ ഫോട്ടൊ കാണിച്ചു തന്നു.ഉള്ളതു പറയാല്ലോ,ആ കാഴ്ച കണ്ടാല്‍ കാറിന്റെ പെറ്റമ്മ സഹിക്കൂല. അത്രയ്ക്കും ദയനീയം.എന്നിട്ടും സഖാക്കള്‍ക്കൊരു കുലുക്കവുമില്ല വെറുതെയല്ല- അതവരുടെ കാറല്ല. തഥാഗഥന്റെയാണ്‌.

"എന്നിട്ടു നിങ്ങളെ പോലീസു പിടിച്ചോ??" ജാസൂട്ടി പ്രതീക്ഷയോടെ ചോദിച്ചു,

"ഇല്ല . പക്ഷെ അവിടെ വച്ച്‌ അടി പൊട്ടണ്ടതായിരുന്നു. കഷ്ടിച്ചു രക്ഷപെട്ടു"

ഛേ ചുമ്മാ കൊതിപ്പിച്ചു.അല്ലെങ്കിലും ഈ കന്നടക്കരെ ഒന്നിനും കൊള്ളൂല്ല.

"ഞങ്ങളൊന്നു ഫാം കണ്ടിട്ടു വരട്ടെ" പെട്ടെന്നൊരു പ്രഖ്യാപനവും പാസ്സക്കി ആ ഗ്രൂപ്പ്‌ മൊത്തമായി പറമ്പിലേക്കിറങ്ങി ലക്ഷ്യമില്ലാതെ നടന്നു തുടങ്ങി.

ഇവര്‍ക്ക്‌ പെട്ടെന്നിതെന്തു പറ്റീന്ന് ചോദിക്കാന്‍ നാക്കെടുത്തതാ. വേണ്ടി വന്നില്ല. ദൂരേന്നതാ തഥാഗതന്‍ വരുന്നു.അങ്ങനെ വരട്ടെ.അപ്പോള്‍ ഇതാണ്‌ മഹാന്മാരുടെ പെട്ടെന്നുണ്ടായ പ്രകൃതിസ്നേഹത്തിനു കാരണം !!!

അഞ്ചുമിനിട്ടു കഴിഞ്ഞില്ല അങ്ങോട്ടു പോയതിന്റെ ഇരട്ടി സ്പീഡില്‍ സംഘം തിരിച്ചു വരുന്നു."പാമ്പ്‌ പാമ്പ്‌ അവിടൊരു പാമ്പിനെ കണ്ടു" എല്ലാവരും കൂട്ടത്തോടെ അറിയിച്ചു.പാവങ്ങള്‍ ..ഒരു വശത്ത്‌ പാമ്പ്‌..മറുവശത്ത്‌ തഥാ..എങ്ങോട്ടു രക്ഷപെടും???എവിടെയാണഭയം???

അവരുടെ പ്രാര്‍ത്ഥന കേട്ടിട്ടെന്ന പോലെ ദൈവം അടുത്ത ഗ്രൂപ്പിനെ വേദിയിലേക്കയച്ചു. കൊച്ചി-ചെന്നൈ-അതിഥിതാരഗ്രൂപ്പ്‌.ഒട്ടകങ്ങള്‍ വരിവരിവരിയായി-ന്നു പറഞ്ഞപോലെ ജാഥയായി കുറുമാന്‍,ഇക്കാസ്‌,കുമാറേട്ടന്‍,കലേഷണ്ണന്‍,ബെന്നി,വിനയന്‍,ലോനപ്പന്‍(ഇങ്ങേര്‍ക്ക്‌ പത്തുപതിഞ്ചു പേരുകളുണ്ട്‌ കേട്ടോ) തുടങ്ങിയവരെത്തിയതോടെ വേദി എതാണ്ട്‌ പാളയംചന്ത പോലെ ശബ്ദമുഖരിതമായി.

(ശ്‌ ശ്‌ സീക്രട്ട്‌..കുറുമാനെ കണ്ടപ്പോഴുള്ള ഫസ്റ്റ്‌ ഇംപ്രഷന്‍ -ഇങ്ങേരിതെന്താ താടി കോമ്പസ്സു വച്ചാണോ വടിക്കുന്നത്‌. അത്രയ്ക്കു വൃത്തമൊത്തിരിക്കുന്നു.)

അതിഥികളുമെത്തി-എന്നിട്ടും ചില ആതിഥേയര്‍ ഇനിയുമെത്തിയിട്ടില്ല.ഇവിടുത്തെ ഓരോ ഊടുവഴിയും തങ്ങള്‍ക്ക്‌ കൈരേഖ പോലെ സുപരിചിതമാണെന്ന്‌ അഹങ്കരിക്കുന്ന കുട്ടിച്ചാത്തന്‍, കുട്ടപ്പായി, പീലിക്കുട്ടി,കിരണ്‍സ്‌,കൊച്ചന്‍,മഴനൂല്‍ എന്നീ താരങ്ങളാണ്‌ മിസ്സിംഗ്‌. അവരൊന്നുമില്ലാതെ എന്താഘോഷം.... കാത്തിരിപ്പിനു വിരാമമിട്ടു കൊണ്ട്‌ കുട്ടിച്ചത്തന്റെ കോള്‍ വന്നു.'സ്‌ട്രെയ്റ്റു വന്നിട്ട്‌ റൈറ്റ്‌' എന്ന അതിസങ്കീര്‍ണ്ണമായ വഴി തെറ്റി ബാംഗ്ലൂരിന്റെ എതൊക്കെയോ ഊടുവഴികളിലൂടെ അലയുകയാണ്‌ സംഘം. പിന്നീടവിടെ നടന്നത്‌ ലോകം കണ്ടതിലേറ്റവും വലിയ ബ്ലോഗു കൂട്ടായ്മയായിരുന്നു.വല്ല വഴിക്കും അലയുന്ന കൂട്ടുകാരെ നേര്‍വഴിക്കു നയിക്കാന്‍ എല്ലാ ബ്ലോഗ്ഗേര്‍സും കയ്യും മെയ്യും മറന്ന്‌ നിര്‍ദ്ദേശങ്ങളും ഐഡിയകളും കൊടുത്തു.അങ്ങനെ വന്‍ ജനകീയ പങ്കാളിത്തത്തോടെ 'കൂട്ടം തെറ്റിയ കുഞ്ഞാടുകള്‍' ഒരു വിധത്തില്‍ ലക്ഷ്യത്തിലെത്തിച്ചേര്‍ന്നു.

കണ്ണിലെണ്ണയൊഴിച്ച്‌ കാത്തിരുന്ന ഞങ്ങളുടെ മുന്നിലേക്ക്‌ പീലിക്കുട്ടിയുടെ നേതൃത്വത്തില്‍ അവരെത്തി.എല്ലവരെയും ഞെട്ടിച്ചു കൊണ്ട്‌ ആ സംഘത്തില്‍ ഒരു വനിതാ ബ്ലോഗ്ഗര്‍ എക്സ്ട്രാ!!! ഒന്നു കൂടി അടുത്തെത്തിയപ്പോഴാണ്‌ മനസ്സിലായത്‌-അതു ചുരിദാറിട്ടു വന്നിരിക്കുന്ന ചാത്തനാണ്‌.ആകെമൊത്തം നോക്കിയാല്‍ ഹാംഗറില്‍ ജുബ്ബ തൂക്കിയിട്ടിരിക്കുന്ന ഒരു ലുക്ക്‌.

ഇനിയും ചില ബ്ലോഗ്ഗേര്‍സ്‌ എത്തിച്ചേരാനുണ്ടെങ്കിലും വൈകിപ്പോയതു കൊണ്ട്‌ പരിപാടി തുടങ്ങാനുള്ള ശ്രീ തഥഗതന്‍,ചന്ത്രക്കാറന്‍ എന്നിവരുടെ കൂട്ടായ തീരുമാനം ശിരസ്സാ വഹിച്ച്‌ എല്ലാവരും സമ്മേളനം നടക്കുന്ന ഹാളിലേക്ക്‌....

കുറുമാനാണു താരം (ബാംഗ്ലൂരിലും)-1

2007-08-13T17:47:00.001+05:30

കര്‍ക്കിടകമാസം ഇരുപത്താറാം തിയതി (മനുഷ്യര്‍ക്കു മനസ്സിലാകുന്ന ഭാഷയില്‍ പറഞ്ഞാല്‍ ആഗസ്റ്റ്‌ പതിനൊന്ന്‌).പതിവു പോലെ തന്നെ ഒരു കൂട്ടം പട്ടികളുടെ കുരയോടു കൂടി അന്നും ബാംഗ്ലൂര്‍ നഗരത്തില്‍ പ്രഭാതം പൊട്ടിവിടര്‍ന്നു.ചരിത്രത്തിന്റെ താളുകളില്‍ എഴുതിച്ചേര്‍ക്കപ്പെടാന്‍ പോവുന്ന സുവര്‍ണ്ണമുഹൂര്‍ത്തത്തിന്‌ ഇന്നു വേദിയൊരുങ്ങുകയാണ്‌.

എല്ലാ കണ്ണുകളും കൃഷ്ണാ ഫാമിലേക്ക്‌.പരിപാടിയുടെ പ്രാധാന്യം കണക്കിലെടുത്ത്‌ നഗരത്തില്‍ വിദ്യാഭാസ സ്ഥാപനങ്ങള്‍ക്കും സര്‍ക്കാരാപ്പീസുകള്‍ക്കും അവധി പ്രഖ്യാപിച്ചു.എന്തിനേറെ പറയുന്നു, ആ ശുഭമുഹൂര്‍ത്തത്തില്‍ എഴുന്നേറ്റു നിന്നു ഒരു മിനിട്ടു നേരം മൗനമാചരിക്കാന്‍ സോഫ്റ്റ്‌വെയര്‍ കമ്പനികള്‍ പോലും തൊഴിലാളികള്‍ക്ക്‌ ഗ്രൂപ്പ്‌ മെയില്‍ അയച്ചു. തിരക്കു മുന്‍കൂട്ടി കണ്ട്‌ നഗരത്തിന്റെ മുക്കിലും മൂലയിലും നിന്നു ടി-ഫാമിലേക്കു BMTC സ്പെഷ്യല്‍ ബസ്‌ സര്‍വ്വീസ്‌ ഏര്‍പ്പെടുത്തി. ആരാധകരെയും മാധ്യമപ്രതിനിധികളെയും നിയന്ത്രിക്കന്‍ കന്നട പട്ടാളം ഒരു ദിവസം മുന്‍പേ തന്നെ അവിടെ തമ്പടിച്ചു.പരിപാടിയില്‍ പങ്കെടുക്കുന്നവരുടെ കന്നട പരിജ്നാനം കണക്കിലെടുത്ത്‌ ഒരു കൂട്ടം മലയാളം-കന്നട തര്‍ജ്ജമക്കാരെയും കൂടി കൂലിക്കെടുത്തത്തോടെ ബാംഗ്ലൂര്‍ ബ്ലോഗ്ഗെര്‍സ്‌ മീറ്റിന്റെ തയ്യറെടുപ്പുകള്‍ പൂര്‍ത്തിയായി.

സ്വപ്നലോകത്തില്‍ നിന്നും ഇനി യാഥാര്‍ത്ഥ്യത്തിലെക്ക്‌.....

സമയം ഉച്ചയ്ക്ക്‌ ഒരു മണി.സൂര്യന്‍ പോലും അക്ഷമനായി ഇടയ്ക്കിടക്ക്‌ താഴേക്കെത്തി നോക്കുന്നു.ഇനിയും രണ്ടു മണിക്കൂര്‍ കൂടിയുണ്ട്‌ മീറ്റ്‌ തുടങ്ങാന്‍. ഉള്ളതില്‍ വച്ച്‌ നല്ല കുപ്പായമൊക്കെ എടുത്തിട്ട്‌ ഒരു മണിക്കൂറായി ഞാന്‍ ഒരുങ്ങിയിരിക്കാന്‍ തുടങ്ങിയിട്ട്‌.ബോറാടി മാറ്റാന്‍ വേണ്ടി ഇതിനകം തന്നെ പതിനൊന്നു പ്രാവശ്യം പൗഡറിട്ടു കഴിഞ്ഞു.അങ്ങനെ ഒരു വിധത്തില്‍ രണ്ടു മണിയായി കിട്ടി.

"അപ്പോ ശരി . ഞാന്‍ പോട്ടേ. പിന്നേ ചിലപ്പോ ഞാന്‍ ലേറ്റായിട്ടേ എത്തൂ.അതുകൊണ്ട്‌ വിശേഷങ്ങളൊക്കെ ഇന്നു പറയാന്‍ പറ്റീന്നു വരില്ല. സാരമില്ല നാളത്തെ പത്രത്തില്‍ എല്ലാ വിവരങ്ങളുമുണ്ടാകും. അപ്പോള്‍ വായിച്ചാല്‍ മതി"

ഒരു ബ്ലോഗ്ഗറിനു വേണ്ട അത്യാവശ്യം അഹങ്കാരമൊക്കെ പ്രകടിപ്പിച്ച്‌ ഞാന്‍ വീട്ടില്‍ നിന്നിറങ്ങി.നേരെ പോയത്‌ മാര്‍ക്കറ്റിലേക്കാണ്‌. കാര്യം മൂന്നു മണീന്നൊക്കെ പറഞ്ഞാലും ഇത്തിരി വൈകി ചെല്ലുന്നതാ അതിന്റെയൊരിത്‌.എങ്ങനെയെങ്കിലും ഒരു അരമണിക്കൂറെങ്കിലും വൈകിചെല്ലണം.മീറ്റു നടക്കുന്നതിനിടയിലേക്കു ' സോറി കാറ്‌ വഴിക്കു വച്ച്‌ ബ്രേക്ക്‌ ഡൗണായതു കൊണ്ട്‌ അല്‍പ്പം വൈകിപ്പോയി' എന്നു പറയുന്നത്‌ മനസ്സില്‍ ഒരു പത്തു പ്രാവശ്യം റിഹേര്‍സല്‍ എടുത്തു.അപ്പോഴതാ ഫോണ്‌ കരയുന്നു.

"ഹലോ ത്രേസ്യേച്ചിയാണോ"

"ആര്‌..സോറി റോംഗ്‌ .... അയ്യോ അല്ല അതേ ഞാന്‍ അതുതന്നെയാ"

"ഞാന്‍ ജാസൂട്ടിയാ. ചേച്ചി എവിടെയാ. ഞങ്ങള്‍ കാത്തിരിക്കുകയാ.എന്നോടു തഥാഗതന്‍ പറഞ്ഞു ചേച്ചിയെ വിളിക്കാന്‍"

ഓഹോ അപ്പോള്‍ സമയം സമാഗതമായി.

"ഓക്കെ ഓക്കെ .എന്നെ കാത്തിരിക്കണ്ട.പരിപാടി തുടങ്ങിക്കോളൂ ഞാനെത്തിക്കോളാം"

പിന്നെല്ലാം വളരെ പെട്ടെന്നായിരുന്നു.ഓടി ഓട്ടോയില്‍ കയറുന്നു.വഴി പറയുന്നു.ഫാമിലെത്തുന്നു.

'ചേട്ടാ ഇത്തിരി മാറ്റിനിര്‍ത്തിയേക്കണേ' എന്നു പറയാന്‍ പറ്റുന്നതിനു മുന്‍പെ തന്നെ സ്നേഹം മൂത്ത്‌ ആ ഡ്രൈവര്‍ ഫാമിന്റെ ഗേറ്റില്‍ തന്നെ കൊണ്ടു ചെന്നു നിര്‍ത്തി. ഇതാരെങ്കിലും കണ്ടാല്‍ എന്റെ 'കാര്‍ സ്റ്റോറി' പൊളിയുമല്ലോ എന്നു പേടിച്ച്‌ ഒന്നു ചുറ്റും നോക്കിയപ്പോഴതാ അവിടെ മൂന്നാലു പേര്‍ ക്ലോസപ്പിന്റെ പരസ്യം പോലെ വെളുക്കെ ചിരിച്ചു കൊണ്ട്‌ നില്‍ക്കുന്നു.

"ത്രേസ്യ അല്ലേ??"

കൂട്ടത്തില്‍ ഗുരുവായൂര്‍ കേശവന്റെ തലയേടുപ്പുള്ള മാന്യദേഹം നല്ല ബാസുള്ള ശബ്ദത്തില്‍ ചോദിച്ചു.

"അതേ" (വിനയം)

“ഞാന്‍ തഥാഗതന്‍" എന്റമ്മോ അപ്പോള്‍ ഇദ്ദേഹമാണദ്ദേഹം

" ഞാന്‍ ഫോട്ടൊ കണ്ടിട്ടുണ്ട്‌" (വീണ്ടും വിനയം)

"ഇവരു ചെന്നൈ ബ്ലോഗ്ഗേര്‍സാ"

മറുപടിയായി തലയൊന്നു കുലുക്കി ഒരു പുഞ്ചിരി പാസ്സാക്കി.

'എന്നെ സ്വീകരിക്കാന്‍ വേണ്ടി ഇവിടെ വന്നു നില്‍ക്കേണ്ടിയിരുന്നില്ല. ഞാനങ്ങു വന്നേനേല്ലോ' എന്നും പറഞ്ഞു വിനയാപ്രസാദാകുന്നതിനു മുന്‍പു തന്നെ ഗുഹയില്‍ നിന്നു വരുന്ന പോലെ എക്കോയോടു കൂടിയ ശബ്ദം പിന്നേം

"അതാ അങ്ങോട്ടു ചെന്നോളൂ.ഒരാളു കുറെ നേരമായി കാത്തിരിക്കുന്നു."

‘ഒരാളോ!!! അപ്പോ ബാക്കിയള്ളവരോ!!!'

ഉറക്കെ ചോദിക്കാന്‍ ധൈര്യം വന്നില്ല.ചൂണ്ടിക്കണിച്ചു തന്ന വഴിയേ ഒരു കാടിനുള്ളിലേക്കു ഓടി.നല്ല പ്രകൃതിമരണീയമായ സ്ഥലം.ചേറിനുള്ളിലെ ചെന്താമര പോലെ. ആ മനുഷ്യവാസമില്ലാത്ത ഏരിയയില്‍ ഇത്രയും സുന്ദരമായ സ്ഥലം. കണ്ണൂരിലെ ഒരു പറമ്പ്‌ അങ്ങനെ കോപ്പി+പേസ്റ്റ്‌ ചെയ്ത്‌ വെച്ചപോലുണ്ട്‌.അവിടെയതാ ഒരു സ്റ്റേജ്‌.അതിന്റെ മുകളിലതാ ഒരു കസേര. അതിന്റെം മുകളിലതാ ഒരു രൂപം .സൂക്ഷിച്ചു നോക്കി. തല മുതല്‍ കാലു വരെ മൂടിപ്പുതച്ച്‌ ഒരു പെണ്‍കുട്ടി ഘോരഘോരം ഫോണില്‍ സംസാരിക്കുന്നു.മട്ടും ഭാവവും കണ്ടാല്‍ തോന്നും നാസേടെ അടുത്ത പ്രോഗ്രാം പ്ലാന്‍ ചെയ്യുകയാണെന്ന്‌.ഒന്നൂടെ അടുത്തു ചെന്നപ്പഴാ മനസ്സിലായത്‌ പീജീലെ കൊതുകുകടിയും ഭക്ഷണത്തിലെ കല്ലുമൊക്കെയാണ്‌ സംഭാഷണവിഷയം.ഹച്ചിന്റെ പരസ്യം പോലെ ഒരു പട്ടിയും അടുത്തു തന്നെ ഇരിപ്പുണ്ട്‌.എന്നെ കണ്ടതും പട്ടി ബഹുമാനത്തോടെ(?) എഴുന്നേറ്റു പോയി. കുട്ടി ഞെട്ടിയെഴുന്നേറ്റു.എന്നെ കണ്ടിട്ടല്ല. അപ്പോഴാണ്‌ ഇത്രേം നേരം പട്ടീടെ തോളത്തു കയ്യിട്ടോണ്ടാ ഇരുന്നതെന്ന്‌ പാവം അറിഞ്ഞത്‌.അങ്ങനെ ഞാന്‍ അടുത്ത ബ്ലോഗ്ഗറെ പരിചയപ്പെട്ടു.

പട്ടിയുടെ കൂടെയിരുന്ന ആ കുട്ടിയായിരുന്നു കൂട്ടരേ ജാസൂട്ടി!!!(ബാക്ഗ്രൗണ്ട്‌ മ്യൂസിക്‌)

അടുത്ത സീനില്‍ സ്റ്റേജും രണ്ടുകസേരയും ..അതിനു മുകളില്‍ ബാക്കിയുള്ള ബ്ലോഗ്ഗേര്‍സിനെ കണ്ണിലെണ്ണയൊഴിച്ചു കാത്തിരിക്കുന്ന രണ്ടു ബ്ലോഗിണികളും....

തുടരും.....(മൂഡുണ്ടെങ്കില്‍ മാത്രം)

ബാംഗ്ളൂറ് ബ് ളോഗ്ഗേഴ്സ് മീറ്റ് - കൂടുതല് ചിത്രങ്ങള്

2007-08-13T13:04:00.001+05:30

വിനയന് (ചെന്നൈ ബ്ലോഗര് - ബ്ലോഗ് "വടക്കാഞ്ചേരി)

ബെന്നി

ബെന്നി

സുജിത്

കുമാര്

ചന്ത്രക്കാരന്

അരവിശിവ, എന്‌ജോജു, സുജിത്, ശ്രീശോഭ്

കുമാര്

കുറുമാന്

കുറുമാന്

കുറുമാന്

കുറുമാന്

കുട്ടപ്പായി എന്ന ബോധപ്പായി എന്ന സന്ദീപ്
(പെര്ഫോമന്സുവച്ച് ബോധമില്ലാത്തപായി എന്നാവും കൂടുതല് ചേരുക)

ദേവദാസ് (വിവി, ലോനപ്പന്)

കുട്ടിച്ചാത്തന്

കലേഷ്

സിജു

പച്ചാളം

ഇക്കാസ്

Blogged with Flock

തിരശ്ശീല ഉയരും മുന്‍പേ

2007-08-13T10:12:00.000+05:30

എടാ രണ്ട്‌ മണിക്ക്‌ എന്നെ പിക്‌ ചെയ്യാന്‍ വരാം ന്ന് പറഞ്ഞിട്ട്‌?

ഞങ്ങള്‍ ഇതാ റോഡിലാ അര മണിക്കൂറിനകം ഇന്ദിരാനഗര്‍ എത്തും.

എന്നാല്‍ ഞാനിതാ ഇന്ദിരാനഗറിലേക്ക്‌ പുറപ്പെടുന്നു.

അയ്യയ്യോ അരമണിക്കൂറെന്നു വച്ചാല്‍ ഒരു നാല്‍പത്‌ നാല്‍പ്പത്തഞ്ച്‌ മിനിറ്റ്‌.

പത്ത്‌ മിനിറ്റിനുശേഷം മഴനൂല്‍
ചാത്താ നീ എവിടെയാ ഞങ്ങളിതാ ഡൊംലൂര്‍ ഫ്ലൈ ഓവര്‍ കഴിഞ്ഞു സി എം എച്‌ റോഡിലെ ജംക്‍ഷനില്‍ വാ.

അയ്യോ എത്തിയാ അരമണിക്കൂറെന്ന് പറഞ്ഞിട്ട്‌!!! അല്ലാ മഴനൂലു കുട്ടപ്പായീടെ വണ്ടീലായിരുന്നില്ലാലൊ പിക്‍അപ്‌! പത്ത്‌ മിനിറ്റ്‌ ഞാനിപ്പ എത്താം.

സി എം എച്‌ റോഡിലെ ജംക്‍ഷനില്‍ നിര്‍ത്തിയിട്ടിരിക്കുന്ന കുട്ടപ്പായീടെ കാറിന്റെ സൈഡ്‌ ഡോര്‍ തുറക്കാന്‍ ശ്രമിക്കുന്ന ചാത്തന്‍. ഇത്‌ തുറക്കുന്നില്ലാലോ?
നീ ഈ സൈഡില്‍ വാ ആ ഡോറിനു പെര്‍മനന്റ് ചൈല്‍ഡ്‌ ലോക്ക്‌ ഇട്ടിരിക്കുവാ നിനക്കു തുറക്കാന്‍ പറ്റൂല..

അതോടെ ആ കാറില്‍ അഞ്ച്‌ പേര്‍ കുട്ടപ്പായീം കിരണ്‍സും മുന്നില്‍.മഴനൂല്‍, കൊച്ചന്‍(ചെന്നായ്‌ ബ്ലോഗര്‍(പൂര്‍വ്വ ബാംഗ്ലൂര്‍ ബ്ലോഗര്‍)) ആന്റ്‌ കുട്ടിച്ചാത്തന്‍.

ഇനി പീലിക്കുട്ടിയെ കൂടി കൂട്ടണം അതിനു കാഗദാസ്‌ പുര വരെ പോണം നാവിഗേറ്റര്‍ കൊച്ചന്‍സ്‌: ഈ വഴിയൊക്കെ എനിക്കു നന്നായറിയാം കുട്ടപ്പായീ റൈറ്റിലോട്ട്‌ പോട്ടെ.

ഒരു ഗ്ലാസ്‌ കിട്ടിയിരുന്നെങ്കില്‍...
എന്തിനാ?
ചുമ്മാ വെള്ളം കുടിക്കാന്‍ ഭയങ്കര ചൂട്‌.

ശ്രീയുടേ മെസേജ്‌. ഞങ്ങടെ വണ്ടി പുറപ്പെട്ടു.

തഥാ വിളിക്കുന്നു. എനിക്കു മേല ഇനി ചീത്ത കേള്‍ക്കാന്‍ നമ്മള്‍ക്ക്‌ ഷെയര്‍ ചെയ്യാം സ്പീക്കര്‍ ഫോണിലിടട്ടെ?

ഞങ്ങള്‍ നേരത്തേ പുറപ്പെട്ടു ഇനി അരമണിക്കൂര്‍മുന്‍പേ പുറപ്പെടണോ.?

പീലിക്കുട്ടീ ഞങ്ങളിതാ ഡിര്‍ഡോ(DRDO) ജംക്‍ഷനില്‍ എത്തിക്കഴിഞ്ഞു റെഡിയായിരുന്നോ.

സ്പീക്കര്‍ ഫോണില്‍ മറുപടി ഇനീം കുറേ ദൂരം ഉണ്ട്‌ കുട്ടപ്പായിയോട്‌ പറയല്ലേ.. ലെഫ്റ്റിക്കി റൈറ്റിക്കി പറഞ്ഞോണ്ടിരുന്നാല്‍ മതി.

തഥാ പിന്നേം വിളിക്കുന്നു കട്ട്‌ ചെയ്യട്ടേ?

ലെഫ്റ്റ്‌ റൈറ്റ്‌ ലെഫ്റ്റ്‌ റൈറ്റ്‌. അയ്യോടാ നമ്മളു യു എ ഇ യില്‍ എത്തിയാ ഒരു ഒട്ടകം!!!
അതു വഴി ബ്ലോക്കാക്കിയിരിക്കുവാ റൈറ്റിലോട്ടു പോട്ടെ..

ഇതു തന്നല്ലേ നമ്മളാദ്യം വന്ന വഴി?

ഏയ്‌ അതൊക്കെ തോന്നലാ ഞാനല്ലേ വഴി പറയുന്നത്‌.

ഇപ്പോള്‍ തന്നെ ഫുള്ളാ ഞാനല്ല കാറ്‌ പീലിക്കുട്ടി വന്നാല്‍ എവിടിരിക്കും?

കിരണ്‍സ്‌ പിന്നോട്ട്‌ പോര്‌ ചാത്തനും കൊച്ചനും ഫ്രന്റിലിരിക്കട്ടെ പിന്നേം ഫുട്ബോള്‍ കളിക്കാനുള്ള സ്ഥലം കിടക്കും.

അല്‍പ സമയത്തിനുള്ളില്‍ പീലിം വണ്ടീല്‍ കയറി.

ഈ വഴി നേരെ പോയാല്‍ ഓള്‍ഡ്‌ മദ്രാസ്‌ റോഡിലെത്തും വേറേ എഴുപ്പ വഴിയുണ്ട്‌.

വേണ്ട അങ്ങനെ കുറേ ഷോട്‌ കട്‌ എടുത്തതാ ഇത്രേം വൈകിയത്‌.

ആരുടെയെങ്കിലും കയ്യില്‍ റൂട്ട്‌ മാപ്‌ ഉണ്ടോ?

ഉണ്ട്‌ വീട്ടിലാ തിരിച്ച്‌ പോയി എടുത്ത്‌ വന്നാലോ?

നമുക്ക്‌ ചോച്ച്‌ ചോച്ച്‌ പോവാം.

ഹൂഡി സര്‍ക്കിളില്‍ വച്ച്‌. കുട്ടപ്പായി കന്നഡയില്‍ വഴി ചോദിക്കുന്നു.
അവസാനം താങ്‌ക്‍സ്‌.
അതിന്റെ കന്നഡ എന്താടോ? താങ്‌ക്‍സിന്റെ

ധന്യവാദലു.

പക്ഷേ കൃഷ്ണാ ഫാം റെയില്‍വേ ഗേറ്റ്‌ കഴിഞ്ഞ്‌ വലത്തോട്ട്‌ എന്നാ മാപ്പില്‍ കണ്ടത്‌ എന്നാ ഓര്‍മ.

ഗേറ്റ്‌ കഴിഞ്ഞ്‌ ഒന്നൂടെ ചോദിക്കാം

ഗേറ്റ്‌ കഴിഞ്ഞു.

സാര്‍ ഇല്ലി കൃഷ്ണാ ഹാള്‍......

ലെഫ്റ്റ്‌.
നീ ചോദിച്ചതു ഹാളല്ലേ?

അതും ഫാമും ഒക്കെ ഒന്നു തന്നെഡേ.

കുറച്ചു കൂടി ലെഫ്റ്റും റൈറ്റും.

ഒനും കാണുന്നില്ലാലൊ? ഒന്നൂടേ ചോദിക്ക്‌ ?

ഞാന്‍ ത്രേസ്യാകൊച്ചിനെ വിളിക്കട്ടെ ഇവിടെവിടെങ്ങാണ്ടാ താമസം അതോണ്ട്‌ പരിചയം കാണും.

ഹലോ. ഞങ്ങളോക്കെ എപ്പോഴേ എത്തി നിങ്ങളെവിടെപ്പോയി കിടക്കുവാ?

റെയില്‍വേ ഗേറ്റ്‌ കഴിഞ്ഞ്‌ ലെഫ്റ്റോ ചുമ്മാതല്ല റൈറ്റിലേക്കാ വരേണ്ടത്‌ വണ്ടി തിരിച്ചു വിട്‌.

ദൈവമേ !!!

വണ്ടി തിരിച്ചു വിട്‌ ഇനി ആരോടും വഴി ചോദിക്കണ്ട.

ദേ കിടക്കുന്നു കൃഷ്ണാ ഹാള്‍(ഹാള്‍ വേ ഫാം റേ) ദൈവമേ ചുമ്മാതല്ല എല്ലാരും ലെഫ്റ്റ്‌ ലെഫ്റ്റ്‌ എന്നു പറഞ്ഞത്‌.

റെയിവേ ഗേറ്റില്‍ നിന്നുള്ള റൈറ്റിലേക്ക്‌ കടന്നു.

കുറേ സമയമായി ഒരു തീവണ്ടി നമ്മളെ പിന്തുടരുന്നുണ്ട്‌.

ദേണ്ടെ ഒരു ബോര്‍ഡ്‌ കൃഷ്ണാ ഫാം 2 കിമി.

ശരിയായ വഴി തന്നെ. ഒരു ബോര്‍ഡും കൂടി കൃഷ്ണാ ഫാം 1.5 കിമി.

രക്ഷപ്പെട്ടു.

ഇതെന്താ റോഡ്‌ പൈപ്പ്‌ വച്ച്‌ ബ്ലോക്കാക്കിയിരിക്കുന്നേ? അതിന്റെ സൈഡിലൂടെ വിട്‌.

അവരെ വിളിച്ചാലോ. വിളി വിളി.

ബ്ലോക്കാ എവിടെ ഞങ്ങളൊന്നും കണ്ടില്ലാലൊ? നിങ്ങളെവിടെയാ

പിന്നേം വഴി തെറ്റി. നിര്‍ത്ത്‌ നിര്‍ത്ത്‌ ഇനി ഇറങ്ങി നടക്കാം.

പിന്നേം പലരും നേര്‍വഴിക്ക്‌ ഞങ്ങളെ എത്തിക്കാനുള്ള വിഫല ശ്രമങ്ങള്‍.

നിങ്ങളു 2 കിമി ബോര്‍ഡ്‌ കണ്ടോ ... കണ്ടു
1.5 കിമി ബോര്‍ഡ്‌ കണ്ടോ കണ്ടു.
1 കിമി ബോര്‍ഡ്‌ കണ്ടോ...കണ്ടില്ല.

കുട്ടന്‍സും രാജേഷ്‌ കെപിയും നിങ്ങളെ അന്വേഷിക്കാന്‍ വരുന്നുണ്ട്‌ ആരും പേടിക്കരുത്‌. ഞങ്ങല്‍ റിസോര്‍ട്ടിന്റെ പുറത്ത്‌ നില്‍ക്കാം.

കൃഷ്ണാ ഫാമോ ഇവിടുന്ന് ലെഫ്റ്റ്‌.

പിന്നേം ലെഫ്റ്റാ ദൈവമേ എന്തായാലും വിട്‌.

ദോ ആരോ നില്‍ക്കുന്നു പുറത്തിറങ്ങി നില്‍ക്കാംന്ന് അവരു പറഞ്ഞതാ അങ്ങോട്ട്‌ വിട്‌.

ഇവിടുണ്ടായിരുന്ന ആളെവിടെ ഭൂതമായിരുന്നാ. ചാത്താ നീ ആരെയാ കണ്ടത്‌?

ഈ കൊച്ച്‌ പിള്ളാരു പേടിച്ചാ ഇങ്ങനാ ഇല്ലാത്തതു പലതും കാണും

അന്വേഷണ സംഘം :നിങ്ങളെവിടെ എത്തി ?

ഗാരേജു കണ്ടോന്നോ ഗാരേജു പോയിട്ട്‌ ഇവിടൊന്നും ഒരു മനുഷ്യനെപ്പോലും കാണാനില്ലാ കര്‍ണ്ണാടക ബോര്‍ഡറു കഴിഞ്ഞാ!!!

എന്ത്‌ ഗാരേജല്ലാ കാബേജെന്നോ ഓ കാബേജ് പാടം!! ആ കണ്ടു കണ്ടു അപ്പോള്‍ ഞങ്ങളെത്തി അല്ലേ.

ആ നിങ്ങളെത്തിക്കാണും ഇനി ഞങ്ങള്‍ തിരിച്ചെത്താനുള്ള വഴി കണ്ടു പിടിക്കട്ടേ....

അങ്ങനെ നിശ്ചയിച്ച സമയത്തിനും അര മണിക്കൂര്‍ വൈകി (അരമണിക്കൂറെന്നു വച്ചാല്‍ ഒരു നാല്‍പതു നാല്‍പത്തഞ്ചു മിനിറ്റ്‌ വരും എന്നോര്‍ക്കുക) അദ്ധ്യക്ഷനും സംഘവും മീറ്റ്‌ നടത്താനുദ്ദേശിച്ച റിസോര്‍ട്ടിന്റെ പിന്നിലൂടെ ചുറ്റിക്കറങ്ങി എത്തിച്ചേര്‍ന്നതോടെ.

ബാംഗ്ലൂര്‍ മീറ്റിന്റെ തിരശ്ശീല ഉയരുന്നു.

വാല്‍ക്കഷ്ണം:
വഴി തെറ്റാതെ അവിടെ എത്തിയത് വളരെ ചുരുക്കം മാത്രം..

ആറാം മീറ്റ്‌ ചിത്രങ്ങള്‍

2007-08-12T10:03:00.000+05:30

ബൂലോകത്തില്‍ കമന്റ്‌ പോസ്റ്റ്‌ അഗ്രഗേറ്ററുകളുടെ പ്രസക്തിയെക്കുറിച്ചു തുറന്ന ചര്‍ച്ച - 1

ബൂലോകത്തില്‍ കമന്റ്‌ പോസ്റ്റ്‌ അഗ്രഗേറ്ററുകളുടെ പ്രസക്തിയെക്കുറിച്ചു തുറന്ന ചര്‍ച്ച - 2

ഗ്രൂപ്പ്‌ ഫോട്ടോ - 1

ഗ്രൂപ്പ്‌ ഫോട്ടോ - 2

കുറുമാന്‍ - ഈ ക്യാമറാ അത്ര പോരാ... :)

ബാംഗളൂര്‍ മീറ്റ് വിശേഷങ്ങള്‍

2007-08-12T09:04:00.000+05:30

മാന്യ ബൂലോഗരെ

ബാംഗളൂര്‍ ബ്ലോഗ്ഗെര്‍ കുട്ടപ്പായിയുടെ ആദ്ധ്യക്ഷതയില്‍ ചേര്‍ന്ന,മൂന്നു സംസ്ഥാനങ്ങളില്‍ നിന്നുമായി മുപ്പതില്‍ അധികം സജീവ ബ്ലോഗ്ഗേര്‍സ് പങ്കെടുത്ത ആറാം ബാംഗളൂര്‍ ബ്ലോഗ്ഗേര്‍സ് മീറ്റ് വളരെ വ്യത്യസ്ഥത പുലര്‍ത്തുന്ന ഒന്നായിരുന്നു. കൊച്ചിയില്‍ പ്രകാശനം ചെയ്യപ്പെട്ട ,കുറുമാന്റെ “എന്റെ യൂറോപ്പ് സ്വപ്നങ്ങള്‍“ മീറ്റില്‍ ഒരിക്കല്‍ കൂടെ പ്രകാശിപ്പിക്കപ്പെട്ടു.ചെന്നൈ ബ്ലോഗ്ഗര്‍ ബെന്നിയാണ് പുസ്തകത്തിന്റെ പ്രതി,ബാംഗളൂര്‍ ബ്ലോഗ്ഗെര്‍ കൊച്ചു ത്രേസ്യയ്ക്ക് നല്‍കിക്കൊണ്ട് പ്രകാശന കര്‍മ്മം നിര്‍വഹിച്ചത്. തുടര്‍ന്ന് ബെന്നി ചെയ്ത പ്രസംഗത്തില്‍ ബ്ലോഗ്ഗുകളുടെ സാദ്ധ്യതകളെ കുറിച്ചും യൂറോപ്പ് സ്വപ്നത്തില്‍ കുറുമാന്‍ കാണിച്ച എഴുത്തിന്റെ ആര്‍ജ്ജവത്തെ കുറിച്ചും സംസാരിച്ചു. പിന്നീട് ആശംസാ പ്രസംഗം നടത്തിയ,കുട്ടിച്ചാത്തന്‍,ദേവദാസ് എന്നിവര്‍ യൂറോപ്പ് സ്വപ്നങ്ങളെ കുറിച്ച് ആധികാരികമായി സംസാരിക്കുകയുണ്ടായി. ആശംസകള്‍ക്ക് നന്ദി പറഞ്ഞു കൊണ്ട് കുറുമാന്‍ നടത്തിയ പ്രൌഡോജ്ജ്വല പ്രസംഗം ബ്ലോഗ്ഗേര്‍സിന് ഒരു പുത്തന്‍ അനുഭവമായിരുന്നു.

തുടര്‍ന്ന് മീറ്റില്‍ പങ്കെടുത്ത 32 ബ്ലോഗ്ഗേര്‍സിനേയും പരിചയപ്പെടുത്തുക എന്ന കര്‍ത്തവ്യമായിരുന്നു. അത്, തഥാഗതന്‍ എന്ന ഞാന്‍ നിര്‍വഹിച്ചു. അതിനു ശേഷം ശ്രീ.കുമാര്‍, ബ്ലോഗ്ഗുകളും അഗ്രിഗേറ്ററുകളും എന്ന വിഷയത്തെ കുറിച്ച് വളരെ ഗൌരവതരമായ ചര്‍ച്ചയ്ക്ക് വഴി ഒരുക്കി കൊണ്ട് നടത്തിയ പ്രഭാഷണവും ശ്രദ്ധേയമായി.

പിന്നീട് ആദ്യമായി മീറ്റില്‍ പങ്കെടുക്കുന്ന അംഗങ്ങല്‍ ഓരോരുത്തരായി സ്വയം പരിചയപ്പെടുത്തുകയും ഈ മീറ്റ് അവരില്‍ എന്തു സ്വാധീനമാണ് ചെലുത്തിയത് എന്ന് അവരുടെ സ്വന്തം ഭാഷയില്‍ സംസാരിക്കുകയും ഉണ്ടായി. കൊച്ചു ത്രേസ്യ,ജാസൂട്ടി,സുജിത് ഭക്തന്‍,അരവിശിവ,ഷാനവാസ്,ശ്രീശോഭ്,ജോജു,ബിജോയ് തുടങ്ങിയ,ആദ്യമായി ഒരു ബ്ലോഗ്ഗ് മീറ്റില്‍ പങ്കെടുക്കുന്ന സുഹൃത്തുക്കള്‍ എല്ലാവരും,ഇനിയും ഇതു പോലെ ഉള്ള മീറ്റുകള്‍ സംഘടിപ്പിക്കണം എന്നും ബ്ലോഗ്ഗിനെ കുറിച്ചും മറ്റു സാഹിത്യ സാംസ്കാരിക രാഷ്ട്രീയ കാര്യങ്ങളെ കുറിച്ചും ഗൌരവതരങ്ങളായ ചര്‍ച്ചകള്‍ സംഘടിപ്പിക്കണം എന്നും ഒരു പോലെ ആവശ്യപ്പെട്ടു.

പിന്നീട് കിരണ്‍സ്,കൊച്ചന്‍,പീലിക്കുട്ടി,രാജേഷ് എന്നിവരുടെ ഗാനാലാപനവും,കുറുമാന്റെ നാടന്‍ പാട്ടുകളും,കവിതാലാപനവും ഉണ്ടായി.കുട്ടന്‍സിന്റെ നന്ദി പ്രകടനത്തോടെ മീറ്റിനു തിരശ്ശീല വീഴുകയും കൃഷ്ണാ ഫാം ഒരുക്കിയ സവിശേഷ ഡിന്നര്‍ എല്ലാവരും നന്നായി അസ്വദിക്കുകയും ചെയ്തു. രാത്രി 9.30 മണിയോടെ വീണ്ടും വീണ്ടും തമ്മില്‍ കാണാമെന്ന് അന്യോന്യം ഉറപ്പുനല്‍കി എല്ലാവരും പിരിഞ്ഞു പോകുകയുണ്ടായി..

ഈ മീറ്റില്‍ പങ്കെടുക്കാനായി ഞങ്ങളുടെ ക്ഷണം സ്വീകരിച്ച് കൊച്ചിയില്‍ നിന്നും എത്തിയ ശ്രീ.കുമാര്‍,ഇക്കാസ്,പച്ചാളം,കലേഷ് എന്നിവര്‍ക്കും,ചെന്നൈല്‍ നിന്നും എത്തിയ ബെന്നി,വിനയന്‍,കൊച്ചന്‍,സിജു,ദേവദാസ് എന്നിവര്‍ക്കും,നമ്മുടെ എല്ലാം പ്രിയങ്കരനായ കഥാകാരന്‍ ശ്രീ കുറുമാനും ബാംഗളൂര്‍ ബ്ലൊഗ്ഗേര്‍സിന്റെ അകൈതവമായ നന്ദി.

(കൂടുതല്‍ ചിത്രങ്ങള്‍ കുമാര്‍,കലേഷ്,പച്ചാളം,ചന്ദ്രക്കാറന്‍,കുട്ടിച്ചാത്തന്‍,സിജു,ആര്‍ദ്രം.കൊച്ചു ത്രേസ്യ എന്നിവര്‍ പോസ്റ്റ് ചെയ്യുന്നതായിരിക്കും.ഗ്രൂപ്പ് ഫോട്ടൊയില്‍ കാണാത്ത അഞ്ചോ ആറോ പേര്‍ ഫോട്ടൊ എടുക്കുകയാണെന്ന് അനുമാനിക്കു)

കുറുമാന്റെ “ഏന്റെ യൂറോപ്പ് സ്വപ്നങ്ങളുടെ” ബാംഗളൂര്‍ പ്രകാശനം അഥവ ആറാം ബാംഗളൂര്‍ മീറ്റ്

2007-07-19T17:53:00.000+05:30

മാന്യ ബൂലോഗരേ

ജൂണ്‍ 3ആം തിയ്യതിയിലെ മീറ്റിനു ശേഷം( ശ്രീജിത്തിന്റെ നിഷ്ക്രമണത്തിനു ശേഷമോ) ഉറക്കത്തിലായ ബാംഗളൂര്‍ ബ്ലൊഗ്ഗെര്‍സിനെ ഉണര്‍ത്താന്‍ ഇതാ ഒരു മീറ്റ്..

നമുക്കേവര്‍ക്കും പ്രിയങ്കരനായ ശ്രീ രാഗേഷ് കുറുമാന്റെ “എന്റെ യൂറോപ്പ് സ്വപ്നങ്ങള്‍” എന്ന ജീവിതാനുഭവ - യാത്രാവിവരണ നോവല്‍ ആഗസ്റ്റ് 5ആം തിയ്യതി കൊച്ചിയില്‍ വെച്ച് പ്രകാശനം ചെയ്യപ്പെടുകയാണല്ലൊ. ബാംഗളൂര്‍ ബ്ലൊഗ്ഗേര്‍സിനേവര്‍ക്കും പ്രിയങ്കരനായ ശ്രീ.കുറുമാന്‍,ആഗസ്റ്റ് 11 നു,ബാംഗളൂര്‍ വരാന്‍ സന്നദ്ധത കാണിക്കുകയും അതിനോടനുബന്ധിച്ച് ബാംഗളൂര്‍ ബ്ലോഗ്ഗേര്‍സ് എല്ലാവരും ഒരിക്കല്‍ കൂടെ ഒത്തു ചേരാന്‍ തീരുമാനിക്കുകയും ചെയ്തിരിക്കുന്നു. തദവസരത്തില്‍ ശ്രീ.കുറുമാന്റെ നോവലിന്റെ ബാംഗളൂര്‍ പ്രകാശനവും നടക്കുന്നതാണ്..

ചെന്നൈയിലും കൊച്ചിയിലും ഉള്ള ചില ബ്ലോഗ്ഗേര്‍സും ഈ മീറ്റില്‍ പങ്കെടുക്കാന്‍ തയ്യാറായിട്ടുണ്ട്..

പതിനഞ്ച് പേരില്‍ ഒതുങ്ങിയിരുന്ന ബാംഗളൂര്‍ ബൂലോഗം ഇപ്പോല്‍ 30ഇല്‍ അധികം അംഗങ്ങളോടെ ഈ ലോകത്തിലെ തന്നെ രണ്ടാമത്തെ വലിയ ബൂലോഗ കൂട്ടായ്മയായി മാറിയിരിക്കുന്നു..

എല്ലാവര്‍ക്കും ഹൃദയംഗമായ സ്വാഗതം

മലയാളം ബ്ലോഗേഴ്സിനിതാ SMS ഗ്രൂപ്പും

2007-07-19T16:38:00.000+05:30

ഗൂഗിളിലും യാഹുവിലും ഒക്കെ ഗ്രൂപ്പുകളുണ്ടാക്കി അതില്‍ ജോയിന്‍ ചെയ്താണല്ലോ ഇത്രയും നാളും ലോകത്തിലെ മലയാള ബ്ലോഗേഴ്സെല്ലാവരും തമ്മില്‍ ആശയവിനിമയം നടത്തിയിരുന്നത്. ബാംഗ്ലൂര്‍ബ്ലോഗേഴ്സ് , ഹൈദരബാദലു വിശേഷഗളു ഒക്കെ ആ ഇനത്തില്‍പ്പെട്ടവയാണ്.

എന്നാല്‍ ഇപ്പോള്‍ നിങ്ങള്‍ക്കു വെറും മൂന്നു രൂപാ ചെലവില്‍ ഇന്ത്യയിലെ എല്ലാ മലയാളബ്ലോഗേഴ്സുമായും ആശയവിനിമയം നടത്താം.

അതെങ്ങനെയെന്നല്ലേ ?ഓരോ സ്റ്റെപ്പായി ഞാന്‍ പറയാം. ആദ്യമായി മൊബൈല്‍ ഫോണ്‍ ഒന്നു കയ്യിലെടുത്തു പിടിച്ചോളൂ. ( ബാലന്‍സ് ഉണ്ടായിരിക്കണേ )

Step 1: മുഴുവന്‍ ക്യാപ്പിറ്റല്‍ ലെറ്ററില്‍ ഇതുപോലെ എസ് എം എസ് ചെയ്യുക. REG to 9845398453
ഇപ്പോള്‍ നിങ്ങള്‍ക്കു ഒരു മെസ്സേജ് ലഭിക്കും. അതില്‍ നിങ്ങള്‍ക്കു ലഭിക്കുന്ന പാസ് വേര്‍ഡ് ഉപയോഗിച്ച് ഈ സൈറ്റില്‍ കയറി (മൈ ടുഡേ എന്ന സൈറ്റില്‍ നിന്നാണു നമുക്കു ഈ സേവനം ഉപയോഗിക്കുവാന്‍ സാധിക്കുന്നത്. ) രജിസ്റ്റര്‍ ചെയ്യുക.
http://www.mytoday.com/

Step 2:
രജിസ്റ്റര്‍ ചെയ്തതിനു ശേഷം START MALBLOGGERS എന്നു 757585 നമ്പറിലേക്കു എസ് എം എസ് ചെയ്യുക. അപ്പോള്‍ നിങ്ങള്‍ക്കു ഇതുപോലെ ഒരു എസ് എം എസ് ലഭിക്കും.

Welcome to MALBLOGGERS. To publish, sms PUB MALBLOGGERS message to 757585. To stop receiving updates, sms STOP MALBLOGGERS to 757585.

Step 3: ഇപ്പോള്‍ നിങ്ങള്‍ മല്‍ബ്ലോഗേഴ്സ് മോബില്‍ അംഗമായി ക്കഴിഞ്ഞു.
For More Details: http://pub.mytoday.com/help/index.php

Step 4: ഉപയോഗം: നിങ്ങള്‍ ഇപ്പോള്‍ രജിസ്റ്റര്‍ ചെയ്തതു പോലെ പലരും ഈ മോബില്‍ രജിസ്റ്റര്‍ ചെയ്തു കാണുമല്ലോ. ആ രജിസ്റ്റര്‍ ചെയ്തവരാരെങ്കിലും ഈ മോബിലേക്കു മെസ്സേജ് അയച്ചാല്‍ ആ മെസേജ് ഈ മോബില്‍ ജോയിന്‍ ചെയ്ത എല്ലാവര്‍ക്കും അപ്പോള്‍ തന്നെ ലഭിക്കും.

Step 5: എങ്ങനെയാണു ഞാന്‍ മോബിലേക്കു മെസേജ് അയക്കുക ?
PUB MALBLOGGERS Hi We r decided to meet 2morrow. എന്ന ഫോര്‍മാറ്റില്‍ 757585 ലേക്കു എസ് എം എസ് അയച്ചാല്‍ മതിയാകും. ആര്‍ക്കെങ്കിലും ഈ മെസേജിനു മറുപടി അയക്കണമെങ്കില്‍ ഇതേ ഫോര്‍മാറ്റില്‍ തന്നെ 757585 ലേക്കു എസ് എം എസ് അയച്ചാല്‍ മതിയാകും. ഓര്‍ക്കുക PUB MALBLOGGERS എന്നതാണു മല്‍ബ്ലോഗേഴ്സിനെ സൂചിപ്പിക്കുന്നത്.

757585 ലേക്കു നിങ്ങള്‍ അയക്കുന്ന ഓരോ മെസേജിനും 3 രൂപാ നിരക്കായിരിക്കും. എന്നാല്‍ രജിസ്റ്റര്‍ ചെയ്യാനായി അയക്കുന്ന മെസേജിനു ലോക്കല്‍ മെസേജിന്റെ പൈസയേ പോവുകയുള്ളു.

എന്തിനിനി സംശയിക്കണം. ഇപ്പോള്‍ തന്നെ രജിസ്റ്റര്‍ ചെയ്യൂ... മൊബൈല്‍ ഗ്രൂപ്പിലൂടെ സന്ദേശങ്ങള്‍ കൈമാറൂ. വെറും മൂന്നു രൂപായ്ക്കു പല ആളുകള്‍ക്കു മെസേജ് അയക്കുക എന്നത് ഒരു നല്ല കാര്യമല്ലേ?

താങ്ക്സ് മൈ ടുഡേ !!!!!!!

For More Details Contact MALBLOGGERS mob Owner: 09986489760

മീറ്റ് ചിത്രങള്‍

2007-06-06T10:39:00.000+05:30

മീറ്റ് നടന്ന മണിപ്പാല്‍ കൌണ്ടിയ്ക്കു മുന്‍പില്‍ ബ്ലോഗ്ഗേര്‍സ്

സ്വാഗതം പറയുന്ന മഴനൂല്‍

മീറ്റ് ഉദ്ഘാടനം ചെയ്യുന്ന കിരണ്‍സ്

ഹോ എന്തിര് ഗ്ലാമറണ്ണാ

ശ്രീജിത്തും കുട്ടിച്ചാത്തനും

ശ്രീജിത്

തന്നെ പൊക്കി പറഞ്ഞ പതിനഞ്ചോളം ബ്ലോഗ്ഗേര്‍സിനു നന്ദി പറയുന്ന ശ്രീജിത്ത്

രന്‍‌ജിത്ത് (rr)

കുട്ടപ്പായി (ജെര്‍മ്മനിയില്‍ നിന്നും വന്നശേഷം കുട്ടപ്പായിയ്ക്കൊരു ബോറീസ് ബക്കര്‍ ലുക്ക്)

നളന്‍

തഥാഗതന്‍ ( പതിനഞ്ച് പേരെ പങ്കെടുപ്പിക്കാനുള്ള ഒരു ബുദ്ധിമുട്ടേ)

ഗാനരചയിതാവായ കുട്ടന്‍സ്

ബൊമ്മനഹള്ളിയിലെ എരുമകളെ കുറിച്ച് സംസാരിക്കുന്ന രാജെഷ് കെ പി ( അദ്ദേഹത്തിന്റെ കഥയാണ് )

രാജേഷ് കെ.പി

ചന്ദ്രക്കാറന്‍

അജിത്ത് അഥവാ ഗോവക്കാരന്‍ പെരേര

ആര്‍ദ്രം

കുട്ടിച്ചാത്തന്‍

ചന്ദ്രക്കാറനും മഴനൂലും

കിരണ്‍സും തഥാഗതനും

ദേവനുമായി ഫോണില്‍

എസ്‌ എല്‍ ആറില്‍ ചിത്രങ്ങള്‍ പിറക്കുമ്പോള്‍...

2007-06-04T17:08:00.001+05:30

നാലാം മീറ്റു മുതല്‍ ചന്ത്രക്കാരന്റെ കാമറയില്‍ നോട്ടമിട്ടിരുന്ന ശ്രീജിത്തിന്‌ ഇന്നലെ (ജൂണ്‍ മൂന്ന്) നടന്ന മീറ്റിലാണ്‌ അതിലൊന്നു പണിയാന്‍ സാധിച്ചത്‌.

അദ്ദേഹത്തിന്റെ അതുല്യമായ കലാപാടവത്തിന്റെ സാക്ഷ്യപത്രമായൊരു ചിത്രം നിങ്ങള്‍ക്കായി സമര്‍പ്പിയ്ക്കുന്നു.

പ്രത്യേക ശ്രദ്ധയ്ക്ക്‌:

1) സമയം - ഉദ്ദേശം നാലരമണി
2) അന്തരീക്ഷം - തെളിഞ്ഞ ആകാശത്തില്‍ ജ്വലിയ്ക്കുന്ന സൂര്യന്‍
3) എടുത്ത/എടുക്കാന്‍ ഉദ്ദേശിച്ച ചിത്രം - നീലാകാശത്തില്‍ കൂട്ടമായ്‌ പറന്നു പോയ പക്ഷിക്കൂട്ടങ്ങള്‍
4) കാമറ - canon 350 d

-----------------

ചിത്രത്തിനായി ഇവിടെ ക്ലിക്കുക

-----------------

അരാധകര്‍ നിര്‍ബന്ധിയ്ക്കുകയാണെങ്കില്‍ ആ കരവിരുതില്‍ വിരിഞ്ഞ മറ്റു ചിത്രങ്ങളും പോസ്റ്റാം; നിര്‍ബന്ധിയ്ക്കണം.

അഞ്ചാം ബാംഗളൂര്‍ ബ്ലോഗ്ഗേര്‍സ് മീറ്റ്

2007-06-04T09:44:00.000+05:30

മണിപ്പാല്‍ കൌണ്ടി റിസോര്‍ട്ടില്‍ വെച്ച്, ഇന്നലെ (ജൂണ്‍ 3) അഞ്ചാം ബാംഗളൂര്‍ ബ്ലോഗ്ഗേര്‍സ് മീറ്റ് നടന്നു. ബാംഗളൂരിലെ മിക്കവാറും എല്ലാ ആക്ടീവ് ബ്ലൊഗ്ഗേര്‍സും മീറ്റില്‍ പങ്കെടുക്കുകയുണ്ടായി.അമേരിക്കയിലേയ്ക്ക് പോകുന്ന പ്രിയപ്പെട്ട ബാംഗളൂര്‍ ബ്ലൊഗ്ഗെര്‍ ശ്രീജിത്തിനുള്ള യാത്രയയപ്പു കൂടെ ആയിരുന്നു ഈ മീറ്റ്

ബ്ലോഗ്ഗര്‍ മഴനൂലിന്റെ സ്വാഗത പ്രസംഗത്തോടെയാണ് ആരംഭിച്ച മീറ്റ് തുടര്‍ന്ന് കിരണ്‍സിന്റെ അദ്ധ്യക്ഷ പ്രസംഗത്തിലേയ്ക്കും പിന്നീട് സ്വയം പരിചയപ്പെടുത്തലിലേയ്ക്കും നീങ്ങി. ജെര്‍മ്മനിയില്‍ നിന്നും തിരിച്ചു വന്ന ബ്ലോഗ്ഗര്‍ കുട്ടപ്പായി “എന്റെ ജെര്‍മ്മന്‍ അനുഭവങ്ങള്‍” എന്ന പ്രബന്ധം അവതരിപ്പിച്ച് സംസാരിച്ചു. പിന്നീട്, മീറ്റില്‍ പങ്കെടുത്ത പതിനഞ്ചോളം അംഗങ്ങളും ശ്രീജിത്തിന് ആശംസകള്‍ അര്‍പ്പിച്ച് കൊണ്ട് സംസാരിച്ചു. ശ്രീജിത്തിന്റെ മറുപടി പ്രസംഗത്തില്‍ ബ്ലോഗ്ഗിങ് കൊണ്ട് ലഭിച്ച സൌഹൃദങ്ങളെ കുറിച്ച് പറഞ്ഞപ്പോള്‍,അദ്ദേഹം വികാര നിര്‍ഭരനായി .

പിന്നീട് ഒരു മണിക്കൂര്‍ നേരം മുഴുവന്‍ അംഗങ്ങളും വളരെ ആക്റ്റീവ് ആയി പങ്കെടുത്ത അതീവ ഗൌരവതരമായ് ചര്‍ച്ച നടന്നു
ബ്ലോഗ്ഗിന്റെ ഇന്നത്തെ അവസ്ഥയായിരുന്നു ചര്‍ച്ചാ വിഷയം.ചര്‍ച്ചയ്ക്കിടയില്‍ ഞങ്ങള്‍ ,യാത്രാമൊഴി,ദില്‍ബാസുരന്‍, ഇബ്രു ,ബെന്നി എന്നിവരെ അങ്ങോട്ട് വിളിക്കുകിര്‍കയും അവരുടെ അഭിപ്രായങ്ങളും നിര്‍ദ്ദേശങ്ങളും സ്വീകരിക്കുകയുണ്ടായി. എല്ലാ ബാംഗളൂര്‍ ബ്ലോഗ്ഗേര്‍സിനും ഒരു പോലെ പ്രിയങ്കരനായ കുറുമാന്‍ ഞങ്ങളെ ഇങ്ങോട്ട് വിളിച്ച് ആശംസകള്‍ നേര്‍ന്നു.

ചര്‍ച്ചയ്ക്കൊടുവില്‍ കിരണ്‍സിന്റെ ഗാനാലാപനത്തോടെ മീറ്റ് ,ഈറ്റിലേയ്ക്ക് നീങ്ങി.ഡിന്നറിനു ശേഷം, വീണ്ടും ഇതു പോലെ ഉള്ള മീറ്റും ചര്‍ച്ചകളും സംഘടിപ്പിക്കാമെന്നു പ്രഖ്യാപിച്ച് കൊണ്ട് അംഗങ്ങള്‍ പെരുമഴയിലൂടെ വീടുകളിലേയ്ക്ക് നീങ്ങി..

മീറ്റ് ചിത്രങ്ങള്‍ കുട്ടിച്ചാത്തന്‍,ചന്ദ്രക്കാറന്‍,ആര്‍ദ്രം,ശ്രീജിത്ത്,കുട്ടപ്പായി എന്നിവര്‍ പോസ്റ്റ് ചെയ്യുന്നതായിരിക്കും..

വീണ്ടും അപരന്‍ സ്പീക്കിംഗ്‌

2007-03-10T16:24:00.000+05:30

ട്‌ര്‍ണീം ട്‌ര്‍ണീം....

ചാത്തന്‍: ഹലോ ആരാ?

അപരന്‍: ആരാന്ന് ഞാന്‍ പറഞ്ഞറിയിക്കണം അല്ലേഡാ?

ചാത്തന്‍: നാട്ടീന്നാന്ന് മനസ്സിലായി.ഈ നമ്പറ്‌ പരിചയമില്ലാലൊ?

അപരന്‍: ശബ്ദം കേട്ടിട്ട്‌ മനസ്സിലായില്ലേ.

ചാത്തന്‍: ഓ നീയായിരുന്നോ, എന്താ ഇത്ര അത്യാവശ്യമായിട്ട്‌ വിളിച്ചത്‌, വല്ല വിശേഷവുമുണ്ടോ? നിന്റെ കല്യാണം വല്ലതും ഉറപ്പിച്ചാഡേയ്‌?

അപരന്‍: അതേടാ വിശേഷമുണ്ട്‌, ഇവിടല്ല അവിടെ ഞാന്‍ അങ്ങ്‌ തിരിച്ച്‌ വന്നിട്ട്‌. ഒരുത്തനെ ആശുപത്രീല്‍ കൊണ്ടുപോകാനുണ്ട്‌.

ചാത്തന്‍: അയ്യോ അടുത്ത ആഴ്ച ഞാന്‍ നാട്ടിലേക്ക്‌ പോകുന്നുണ്ടെന്ന് പറഞ്ഞില്ലേ. ഈയാഴ്ച ഹര്‍ത്താലുണ്ടാകാന്‍ ചാന്‍സുണ്ടെന്നും അടുത്ത ആഴ്ച നമ്മള്‍ക്ക്‌ ഒരുമിച്ച്‌ പോകാമെന്നും ഇന്നലേം കൂടി ഞാന്‍ പറഞ്ഞിരുന്നതല്ലേ. അത്‌ കേള്‍ക്കാതെ നീ ചാടിക്കേറിപ്പോയതെന്തിനാ? അല്ലാ ഹര്‍ത്താലുണ്ടായിരുന്നോ?

അപരന്‍: ദുഷ്ടാ, ആ കരിനാക്കെടുത്ത്‌ വളയ്ക്കല്ലേ വളയ്ക്കല്ലേ ന്ന് ഒരു നൂറ്‌ പ്രാവശ്യം ഞാന്‍ പറഞ്ഞതാ.

ചാത്തന്‍: ഹെന്ത്‌ കരിനാക്ക്‌? നാട്ടില്‍ ഒരുത്തനെ തട്ടീട്ടുണ്ടെന്നും കുറേക്കാലമായി ഹര്‍ത്താലൊനും ഇല്ലാത്തതു കൊണ്ട്‌ ഈ ആഴ്ചയിലെപ്പോഴെങ്കിലുമായി ഒന്ന് കാണാന്‍ സാധ്യതയുണ്ടെന്നും മുന്‍കൂട്ടിപ്പറഞ്ഞ്‌ തന്നതാ ഇപ്പോള്‍ കുറ്റം? അപ്പോള്‍ ഹര്‍ത്താല്‍ എങ്ങനെ ആസ്വദിച്ചാ?

അപരന്‍: നീ എന്നേം കൊണ്ടേ പോകൂ അല്ലേഡാ, അമ്പലങ്ങള്‍ പോലും തുറന്നില്ല. ടിവി കണ്ട്‌ കണ്ട്‌ മരിച്ചു.

ചാത്തന്‍: അത്‌ ശരി അപ്പോ നിന്റെ ഒരുദിവസത്തെ പെണ്ണ്‌ കാണലും വെള്ളത്തിലായി അല്ലേ? എനിക്കതങ്ങിഷ്ടപ്പെട്ടു.

അപരന്‍: പെണ്ണ്‌ കാണലോ ആര്‌ ഞാനോ, നിന്നോടാരാ ഇല്ലാത്തതെല്ലാം പറഞ്ഞ്‌ തരുന്നത്‌?ആരോ വിളിക്കുന്നുണ്ടെന്ന് തോന്നുന്നു, ഇനി തിരിച്ചെത്തീട്ട്‌ കാണാം വെക്കട്ടെ..

ചാത്തന്‍ മനോഗതം-- തത്‌കാലം തടിതപ്പി. ഇനിപ്പോ അവനെ കാണാതെ ഒന്ന് രണ്ട്‌ ആഴ്ച മുങ്ങി നടക്കണം.--

പാവം പാവം അപരന്‍

2007-01-26T01:29:00.000+05:30

പ്ലീസ്‌ ഒരു കദന കഥ കേട്ട്‌ ചിരിക്കുന്നവര്‍ ഹൃദയമില്ലാത്തവരാണേ...

ഒരു ഫോണ്‍ വിളി.

ചാത്തന്‍: നീ വരുന്ന വെള്ളിയാഴ്ച നാട്ടില്‍ പോകുന്നുണ്ടോ?

അപരന്‍: ഇല്ലാലൊ. നീ പോകുന്നുണ്ടോ?

ചാത്തന്‍: ആ പോകണമെന്നു വിചാരിക്കുന്നു. നീ പോകുന്നില്ലാന്ന് തീര്‍ച്ചയല്ലേ.

അപരന്‍: അതെ.... അല്ലാ ഞാന്‍ പോകുന്നുണ്ടോ എന്ന് അറിയാനെന്താ തിരക്ക്‌?
ഇതിപ്പോള്‍ രണ്ട്‌ മൂന്ന് തവണയായല്ലോ. ഇന്നേവരെ നമ്മള്‍ ഒരുമിച്ചൊന്നും നാട്ടില്‍ പോയിട്ടില്ലാലൊ.

ചാത്തന്‍: അ അ അതു ശരിയാ, എന്നാലും നമ്മളു ഒരേ നാട്ടുകാരായിട്ട്‌ ഒന്ന് ചോദിച്ചില്ലാന്നു വേണ്ട.

അപരന്‍: എന്നിട്ട്‌ ഞാന്‍ അഥവാ പോകുന്നുണ്ടെന്ന് പറഞ്ഞാല്‍ നീ പോകുന്നില്ലാ വെറുതെ ചോദിച്ചതാന്നല്ലേ പറയാറ്‌?

ചാത്തന്‍: അത്‌ അത്‌.. ഞാന്‍ അപ്പോള്‍ പോകാത്തതു കൊണ്ടല്ലേ

അപരന്‍: സത്യം പറ നമ്മള്‍ തമ്മില്‍ ഒരു തവണയല്ലേ നേരില്‍ കണ്ടിട്ടുപോലുമുള്ളൂ. എന്നിട്ടും എപ്പോഴും ഞാന്‍ പോകുന്നുണ്ടോന്നറിയുന്നതെന്തിനാ?

ചാത്തന്‍: അത്‌ പിന്നെ നിനക്ക്‌ വിരോധം ഒന്നും തോന്നരുത്‌. നീ എന്ന് നാട്ടില്‍ പോകാന്‍ തീരുമാനിച്ചാലും അന്ന് ഹര്‍ത്താലോ വാഹനപണിമുടക്കോ കല്ലേറോ കാണും ചുരുങ്ങിയപക്ഷം ആ പോകുന്ന ബസ്സിന്റെ ടയര്‍ വെടിതീര്‍ന്നെങ്കിലും പോകും. മുന്‍കൂട്ടി അറിയാന്‍ പറ്റുമെങ്കില്‍ എനിക്കാ ആഴ്ചയിലെ യാത്ര മാറ്റിവയ്ക്കാമല്ലോ...

അപരന്‍:.......................

മൊബൈലില്‍ കാള്‍ എന്‍ഡ്‌ ബട്ടണ്‍ ഉള്ളത്‌ എത്ര നന്നായി...

വീരഭദ്രന്‍ ഇല്ലാത്ത മിനി മീറ്റ്‌

2006-12-11T11:36:00.000+05:30

മദിരാശിയില്‍ നിന്നും വന്ന പൊന്നമ്പലം എന്ന ബ്ലോഗറെ ആദരിയ്ക്കാനായി ഇന്നലെ ഒത്തുകൂടിയ ബാംഗളൂര്‍ ബ്ലോഗ്ഗേര്‍സ് മിനി മീറ്റ് വീരഭദ്രന്റെ അസാന്നിദ്ധ്യത്തിലും ഗംഭീരമായി. വീരഭദ്രന്‍ ഇല്ലാത്ത ബാംഗളൂര്‍ മീറ്റോ എന്നു ചോദിച്ച് മറ്റു ദേശങ്ങളില്‍ ഉള്ള ബ്ലോഗ്ഗേര്‍സ് അദ്ഭുതം കൂറുമെന്നറിയാം.. പക്ഷെ എന്തു ചെയ്യാം അങ്ങനെ സംഭവിച്ചു പോയി
( ബഹു : പൊന്നമ്പലം, വീരഭദ്ര വിരോധി ആയതാണ് സംഭവം ഇങ്ങനെ ആകാന്‍ കാരണം)

ശ്രീജിത്തിന്റെ അറിയിപ്പനുസരിച്ച് ഫോറത്തില്‍ എത്തിയപ്പോള്‍ അവിടെ പൊന്നമ്പലവും കുട്ടിച്ചാത്തന്‍ എന്ന ബ്ലോഗറും റെഡിയായിരുന്നു. പിന്നീട് ആര്‍ദ്രവും, കിരണ്‍സും മഴനൂലും വേറെ ഒരു Would Be Blogger ആയ സ്മിതയും എത്തിച്ചേര്‍ന്നു. Transit-ഇല്‍ നിന്നും കോള്‍ഡ് കോഫിയും കുടിച്ച് പിന്നീട് കൈരളിയില്‍ നിന്നും കേരളാ ഭക്ഷണവും കഴിച്ച് പിരിഞ്ഞ മീറ്റ്, മീറ്റുകളുടെ അപ്പച്ചനാകുകയായിരുന്നു (Father of All meets).

നമ്മള്‍ ഇങ്ങനെ ആഴ്ച്കയ്ക്കാഴ്ച്കയ്ക്ക് മീറ്റു നടത്തിയാല്‍ മറ്റു ദേശക്കാര്‍ എന്തു കരുതും എന്ന ചോദ്യത്തിന്, നമ്മുടെ മീറ്റില്‍ പങ്കെടുക്കാന്‍ ഒരു ബ്ലോഗര്‍ക്ക് പരമാവധി യാത്ര ചേയ്യേണ്ട ദൂരം 15 കിലോമീറ്റര്‍ മാത്രമാണെന്നും അതു കൊണ്ട്‌ നമുക്കു തോന്നുമ്പോള്‍ ഒക്കെ നമ്മള്‍ മീറ്റ് നടത്തുമെന്നും ആണയിട്ട ബാംഗളൂര്‍ ബ്ലോഗേര്‍സ് വിട പറയാന്‍ മടിയ്ക്കുന്ന മനസ്സുമായി ഫോറത്തിന്റെ മുന്‍പില്‍ നിന്നും സ്വയം പിരിഞ്ഞു പോകുകയാണുണ്ടായത്.. വീരഭദ്രനു മുന്‍പ് ഊണുകഴിയ്ക്കില്ല എന്ന് പറഞ്ഞ മഴനൂല്‍, കടുവ എന്ന ചങ്ങാതിയോടൊപ്പം വീരഭദ്രശാല അന്വേഷിച്ച് പോകുകയും ഉണ്ടായി
(ചിത്രങ്ങള്‍ ആര്‍ദ്രം പോസ്റ്റുന്നതാണ്)

അത്താഴ വിശേഷങ്ങള്‍: നാലാം ബാംഗ്ലൂര്‍ ബ്ലോഗേര്‍സ് മീറ്റ്

2006-12-06T09:25:00.000+05:30

ചന്ദ്രക്കാറന്റെ മദ്യപാനാസക്തി കണ്ടിട്ട് മദ്യമേ വിഷമേ, വിഷ മദ്യമേ എന്ന് പറഞ്ഞ് കൊടുക്കുന്ന തഥാഗതന്‍.

അവസാനം ചന്ദ്രക്കാറന്‍ വിജയിച്ചു. മദ്യ വിഷമാണെങ്കിലും അത് കുടിച്ചില്ലെങ്കില്‍ വിഷമമാണെന്ന് തഥാഗതനെ ബോധ്യപ്പെടുത്തി. തഥാഗതന്‍ തന്റെ പെഗുമായി.

കിരണ്‍ പാടുന്നു. രംഗത്ത് പാട്ടു കേട്ട് ഉറങ്ങിപ്പോയ അജിത്തും കണ്ണുകള്‍ ആര്‍ദ്രമായ ആര്‍ദ്രവും.

ചന്ദ്രക്കാറന്റെ കത്തി കേട്ട് നെറ്റിയില്‍ കൈ വച്ച മഴനൂല്‍. ബോറടിച്ച് വേറെ ഒരു പണിയും ഇല്ലാതെ സ്വന്തം മൊബൈല്‍ ആകാശത്തേക്കെറിഞ്ഞ് പിടിക്കുന്ന ശ്രീജിത്ത്.

ബില്ലു വന്നപ്പോള്‍ ഞെട്ടിയ കുട്ടപ്പായി. അടുത്ത്, ഉറക്കം നടിക്കുന്ന ശ്രീജിത്തും എഴുന്നേറ്റോടാന്‍ തുടങ്ങുന്ന മഴനൂലും.

ഗോ കാര്‍ട്ടിങ്ങ്: നാലാം ബാംഗ്ലൂര്‍ ബ്ലോഗേര്‍സ് മീറ്റ്

2006-12-06T09:12:00.000+05:30

ഗോ കാര്‍ട്ടിങ്ങ് ട്രാക്കില്‍ റേസിങ്ങിനായി തയ്യാറെടുക്കുന്ന ബാംഗ്ലൂര്‍ ബ്ലോഗേര്‍സ്
മുന്നില്‍ നിന്നും പിന്നിലേയ്ക്ക്: ചന്ദ്രക്കാറന്‍, മഴനൂല്‍, ശ്രീജിത്ത്, ആര്‍ദ്രം, അതിനും പിന്നിലുള്ളവരെ കാണാന്‍ മേല.

അഭിവാദ്യങ്ങള്‍ അഭിവാദ്യങ്ങള്‍ ആയിരമായിരം അഭിവാദ്യങ്ങള്‍.
ചന്ദ്രക്കാറന്‍ വണ്ടി ഫ്ലാഗ് ഓഫ് ചെയ്യുമ്പോള്‍ എല്ലാവരേയും കൈ ഉയര്‍ത്തി അഭിവാദ്യം ചെയ്യുന്നു.

മത്സരഓട്ടത്തിനിടയ്ക്ക് തനിക്കെന്തെങ്കിലും സംഭവിച്ചാല്‍ തന്റെ സ്വത്തുക്കള്‍ ബാംഗ്ലൂര്‍ ബ്ലോഗേര്‍സ് അസ്സോസിയേഷന് നല്‍കണമെന്ന് വില്‍‌പത്രത്തില്‍ ഒപ്പിടുന്ന കുട്ടപ്പായി. പിന്നില്‍ കിരണ്‍സ്.

ഈ റേസ് എപ്പൊ ജയിച്ചു എന്ന് ചോദിച്ചാല്‍ മതി എന്ന ആത്മവിശ്വാസവുമായി ഈ അമേസിങ്ങ് റേസിനു മുന്‍പ് കുട്ടപ്പായി.

പീലിക്കുട്ടിയും രാധയും റേസിനു മുന്‍പ്. ജഡ്ജസ് പ്ലീസ് നോട്ട്: കൈ ഉയര്‍ത്തിക്കാട്ടുന്നത് പീലിക്കുട്ടി.

പീലിക്കുട്ടിയും രാധയും റേസിനു ശേഷം. ട്രാക്കിനരികില്‍ ഇട്ടിരുന്ന പകുതിയിലധികം ടയറുകള്‍ ഇടിച്ച് ട്രാക്കിലേയ്ക്ക് ഇട്ടതിന്റെ ആത്മവിശ്വാസം അവരുടെ മുഖത്ത്. നിലം തൊട്ട് നില്‍ക്കുന്ന കാര്‍ട്ടിങ്ങ് വണ്ടിയുടെ അടിയില്‍ പോയി ആ മുഖം പകര്‍ത്താന്‍ ആയില്ല. എല്ലാരും ഒന്ന് ക്ഷമി.

ബംഗ്ലുൂര്‍ ബ്ലോഗേഴ്സ്‌ മീറ്റ്‌ - കൂടുതല്‍ ചിത്രങള്‍

2006-12-05T23:04:00.000+05:30

പച്ചവെള്ളം പച്ചമുളകിട്ടു കുടിയ്ക്കുന്നയാള്‍

2006-12-05T17:52:00.000+05:30

പച്ചവെള്ളത്തില്‍ പച്ചമുളകിട്ട് ആസ്വദിച്ച് കുടിയ്ക്കുന്ന ബ്ലൊഗ്ഗര്‍

ഉത്ഘാടന ചിത്രങ്ങള്‍: നാലാം മീറ്റ്

2006-12-05T15:36:00.000+05:30

ഇടത്തുനിന്ന് വലത്തോട്ട്:

നാലാം മീറ്റ് ഉത്ഘാടനം ചെയ്യുന്ന തഥാഗതന്‍.

പുതുതായി വാങ്ങിയ ക്യാമറയുടെ ഡെമോ നടത്തുന്ന ചന്ദ്രക്കാരന്‍

മീറ്റില്‍ ആദ്യമായുണ്ടായ സ്ത്രീസാന്നിധ്യം ആസ്വദിക്കുന്ന മഴനൂല്‍.

മീറ്റ് ഉത്ഘാടനം ആസ്വദിക്കുന്ന കുട്ടപ്പായി.

നാലാം മീറ്റ് ശ്രീജിത്തിനെ ബൂലോകത്തിലെ ഏറ്റവും വലിയ മണ്ടനുള്ള അവാര്‍ഡായ പൊന്നാടയും തലപ്പാവും നല്‍കി ആദരിച്ചപ്പോള്‍ (ഇത് സാധാരണ കര്‍ണ്ണാടകയിലെ മണ്ടന്മാര്‍ക്കാണ് നല്‍കാറുള്ളത്. യവന്‍ അവരേക്കാളും വലിയ മണ്ടന്‍ ആയതുകൊണ്ട് ഇത് തന്നെ കൊടുത്തു) .

കന്നട ഭാഷ സ്വന്തം ബ്ലോഗില്‍ ഉപയോഗിച്ച ഒരേയൊരു ബാംഗ്ലൂര്‍ ബ്ലോഗര്‍ ആയ കുട്ടപ്പായിയെ തഥാഗതന്‍ കര്‍ണ്ണാടകയിലെ പരമ്പരാഗത വസ്ത്രമായ ഉത്തരീയം അണിയിച്ച് അഭിനന്ദിക്കുന്നു.

അല്‍പ്പന് മീറ്റിന് തലപ്പാവും പൊന്നാടയും കൊടുത്താല്‍ അതും തണല് എന്നതിന്റെ ഉദാഹരണമായി കിട്ടിയ സമ്മാനങ്ങള്‍ വച്ച് ശ്രീജിത്ത് ഫോട്ടോയ്ക്ക് പോസ് ചെയ്യുന്നു. പിറകില്‍ ലവന് ചെയ്യാമെങ്കില്‍ എനിക്കായിക്കൂടേ എന്നും പറഞ്ഞ് ഒരുങ്ങുന്ന കുട്ടപ്പായി.

റിപ്പോര്‍ട്ട്: നാലാം ബാംഗ്ലൂര്‍ ബ്ലോഗേര്‍സ് മീറ്റ്

2006-12-05T00:48:00.000+05:30

നാലാം ബാംഗ്ലൂര്‍ ബ്ലോഗേര്‍സ് മീറ്റ് മുന്‍‌നിശ്ചയിച്ചപ്രകാരം മംഗളപരമായി ഇക്കഴിഞ്ഞ ഡിസംബര്‍ മൂന്നാം തീയതി കൊണ്ടാടി. മുന്നേ തന്നെ നല്ല സുഹൃത്തുക്കളായിരുന്നവരും പുതുതായി ബ്ലോഗിങ്ങ് രംഗത്ത് പിച്ചവച്ച് തുടങ്ങിയവരും ഈ മീറ്റില്‍ ആവേശത്തോടെ പങ്കെടുത്തു.

തുടക്കം

പീലിക്കുട്ടിയായിരുന്നു ആദ്യമെത്തിയത്. മൂന്ന് മണിക്ക് തുടങ്ങാന്‍ നിശ്ചയിച്ച മീറ്റിന് രണ്ടേമുക്കാലോടെ തന്നെ എത്തി തന്റെ ശുശ്കാന്തി തെളിയിച്ചു പീലിക്കുട്ടി. വെള്‍ക്കം ഡ്രിങ്ക് എന്ന സാധനം ആദ്യമേ കുടിച്ച് തീര്‍ക്കാനുള്ള ഒരു ത്വരയുടെ ഭാഗമാണ് ഇതെന്ന് ചില ദോഷൈകദൃക്കുക്കള്‍ ആരോപണം ഉന്നയിച്ചെങ്കിലും അത് പീലിക്കുട്ടിയുടെ പ്രഭാവത്തിനുമുന്നില്‍ വിലപോയില്ല. തുടര്‍ന്നെത്തിയ ശ്രീജിത്തും മഴനൂലും ഈ കുട്ടിയുടെ പീലി കണ്ട് വീണു പോയി എന്നുപറഞ്ഞ ദോഷൈകദൃക്കുക്കള്‍ മുന്നേ പറഞ്ഞവര്‍ തന്നെയാണോ എന്ന വിഷയത്തില്‍ ഇപ്പോഴും തര്‍ക്കം നിലനില്‍ക്കുന്നതിനാല്‍ ഒരു സ്ഥിതീകരണം ഇതു വരെ കമ്മിറ്റി ആപ്പീസില്‍ ലഭിച്ചിട്ടുമില്ല. കുറച്ച് നിമിഷങ്ങള്‍ക്ക് ശേഷം പിറകില്‍ നിന്ന് ഒരു വിളി വന്നു. “ഡ്രൈവര്‍ര്‍‌ര്‍...”. “യെസ്, സര്‍” എന്നും പറഞ്ഞ് മഴനൂല്‍ തിരിഞ്ഞു നോക്കി. മുറ്റത്ത് ഒരു തഥാഗതന്‍. അദ്ദേഹം സ്വന്തം ഡ്രൈവറെ വിളിച്ചപ്പോള്‍ മഴനൂല്‍ തിരിഞ്ഞ് നോക്കിയത് ടിപ്പ് കിട്ടുമെന്ന പ്രതീക്ഷയിലാണെന്നാണ് പൊതുവേയുള്ള സംസാരം.

അധികം വൈകാതെ ഒരു കാല്‍ ഗോകര്‍ണ്ണത്തും മറ്റേക്കാല്‍ കാസര്‍ഗോഡിലും വയ്ക്കുന്ന തരത്തില്‍ നടന്നുകൊണ്ട് തെങ്ങിനൊക്കെ എന്താ ഒരു വാട്ടം എന്ന് മട്ടില്‍ ആകാശത്ത് കണ്ണും നട്ട് കുട്ടപ്പായി ആഗതനായി. അവിടത്തെ ലോക്കല്‍ പയ്യന്‍സ് ആര്‍ദ്രവും ഉടനേ തന്നെ എത്തി. തുടര്‍ന്നങ്ങോട്ട് ഫോണ്‍ കോളുകളുടെ ബഹളമായിരുന്നു. എം.ജി.റോഡിന്റെ അപ്പുറത്ത് ഒരു വലിയ കുഴി ആണെന്ന്‍ അത്ര നാളും‍ വിശ്വസിച്ചിരുന്ന ചന്ദ്രക്കാറനും, ബാംഗ്ലൂര്‍ സിറ്റിയുടെ ഒരറ്റത്ത് നിന്ന് മറ്റേയറ്റം വരെ യാത്ര ചെയ്തു വരികയായിരുന്ന രാധയും, ഓട്ടോയിലിരുന്ന് ലൈവ് അപ്ലേറ്റ് കൊടുത്തുകൊണ്ട് കിരണും ആര്‍.ടി.നഗറിലെ പട്ടേത്സ് ഇന്‍ എന്ന റിസോര്‍ട്ടില്‍ കുട്ടപ്പായിയുടെ നേതൃത്വത്തിലുണ്ടായിരുന്ന കണ്ട്രോള്‍ റൂമുമായി ബന്ധപ്പെട്ട് ബദ്ധപ്പെട്ട് സ്ഥലത്ത് എത്തിച്ചേര്‍ന്നു. നാട്ടില്‍ നിന്ന് വന്ന ഒരാളെ കെട്ടുകെട്ടിച്ച് പായ്ക്ക് ചെയ്തു വിട്ടതിനു ശേഷം മാത്രമേ വരാന്‍ പറ്റുകയുള്ളൂ എന്നുപറഞ്ഞ അജിത്ത് വൈകുമെന്ന് നേരത്തേ അറിയിച്ചിരുന്നതിനാല്‍ പരിപാടികള്‍ അദ്ദേഹത്തിനുവേണ്ടി കത്തുനില്‍ക്കാതെ ഉടന്‍ തുടങ്ങാന്‍ തീരുമാനമായി.

ഉത്ഘാടനം

ഏകദേശം നാലരയോടുകൂടി മുന്നുമണിയ്ക്ക് തുടങ്ങാനിരുന്ന മീറ്റ് ഔദ്യോഗികമായി ഉത്ഘാടനം ചെയ്യപ്പെട്ടു. കാണാന്‍ അറുപത് പറയുമെങ്കിലും മനസ്സുകൊണ്ട് ഇരുപത് മാത്രമാണെന്ന് സ്വയം അവകാശപ്പെടുന്ന തഥാഗതനാണ് മീറ്റ് ഉത്ഘാടനം ചെയ്തത്. പരമ്പരാഗത രീതിയില്‍ ഉത്ഘാടനം ചെയ്യാന്‍ ഏഴു തിരിയിട്ട വിളക്കോ, അറ്റ്ലീസ്റ്റ് ഒന്നു മുറിക്കാന്‍ ഒരു നാടയോ ഒരുക്കാക്കുന്നതില്‍ സംഘാടകര്‍ അലംഭാവം വരുത്തിയതിനാല്‍ ഹാളിലെ ലൈറ്റ് ഓണ്‍ ചെയ്താണ് ഈ മഹത്തായ കൂട്ടുചേരല്‍, ഉത്ഘാടനം ചെയ്യപ്പെടുകയുണ്ടായത്. മുന്‍‌നിശ്ചയിച്ച പ്രകാരം നടക്കേണ്ടിയിരുന്ന കവലപ്രസംഗങ്ങള്‍, മറ്റുള്ളവരെ കാത്ത് നിന്ന നേരം കൊണ്ട് കുട്ടപ്പായി, തഥാഗതന്‍, ശ്രീജിത്ത് എന്നിവര്‍ നടത്തിക്കഴിഞ്ഞിട്ടുണ്ടായിരുന്നതിനാല്‍ അതൊഴിവാക്കി നേരെ വ്യക്തിപരിചയത്തിലേയ്ക്ക് കടക്കാന്‍ സംഘാടകസമിതി തീരുമാനമെടുക്കുകയാണുണ്ടായത്.

പുതുതായി വാങ്ങിയ ക്യാമറയുടെ ഉത്ഘാടന പടം പിടുത്തം ചന്ദ്രക്കാറന്‍ തകൃതിയായി നടത്തുന്നതിനിടയില്‍, തഥാഗതന്‍ തന്നെക്കുറിച്ച് നാലു പുറത്തില്‍ കവിയാതെ ഉപന്യസിച്ചു. കണ്ടിരുന്ന കിരണ്‍ ഉടന്‍ പത്തില്‍ എട്ട് മാര്‍ക്ക് നല്‍കി എന്ന്‍ സ്ഥിതീകരിക്കാനാവാത്ത റിപ്പോര്‍ട്ടുകളുണ്ട്. വേദിയുടെ മൂലയ്ക്ക് ഇരുന്നിരുന്ന മഴനൂലുകള്‍ അവിടെ നിന്നുകൊണ്ട് ആനക്കൊമ്പ് പോലെ പുറത്തേയ്ക്ക് നീളുന്ന പുകക്കുഴലുകള്‍ കൊണ്ട് സ്മോക്ക് ഇഫക്റ്റ് നല്‍കിയത് ആ വൈകുന്നേരം വര്‍ണ്ണാഭമാക്കി. അടഞ്ഞ ആ മുറിയ്ക്കുള്ളില്‍ ശബ്ദം മാറ്റൊലി കൊണ്ട് ഡോള്‍ബി ഇഫക്റ്റ് നല്‍കുന്നുണ്ടായിരുന്നതിനെ ആര്‍ദ്രം പ്രകീര്‍ത്തിക്കുകയുണ്ടായി. മലയാളം ചാറ്റില്‍ പണ്ടുമുതലേ ഉണ്ടായിരുന്ന തഥാഗതനും കിരണും പഴയ കാല അനുഭവങ്ങള്‍ പങ്കുവച്ചത് സദസ്യരില്‍ കൌതുകമുണര്‍ത്തി. സ്വന്തമായി വെബസൈറ്റുകള്‍ നടത്തുന്ന കിരണും അജിത്തും മലയാളം ബ്ലോഗ് പോര്‍ട്ടല്‍ ടീമും പോര്‍ട്ടല്‍ നടത്തിപ്പിന്റെ വിവിധ സാങ്കേതിക വശങ്ങളെക്കുറിച്ച് ചര്‍ച്ച തുടങ്ങിയപ്പോള്‍ പട്ടി ചന്തയ്ക് പോയ പോലെ ഇരുന്ന കുട്ടപ്പായി ഒരു മൂലയിലിരുന്ന് കോട്ടുവായ് മത്സരത്തിന് പങ്കാളിത്തം ക്ഷണിച്ചുകൊണ്ട് പ്രമേയം പാസ്സാക്കി പ്രതിഷേധിച്ചു. ആദ്യമായി മീറ്റിന് ഉണ്ടായ സ്ത്രീസാന്നിധ്യമായ പീലിക്കുട്ടിയും രാധയും തങ്ങളും വളര്‍ന്ന് വരുന്ന ബ്ലോഗ് വസന്തമാണെന്ന് ആണയിട്ട് പറഞ്ഞുകൊണ്ടേയിരുന്നു.

ഏറ്റവും പ്രിയങ്കരമായ ബ്ലോഗുകള്‍ ഓരോരുത്തരോടും ചോദിച്ചപ്പോള്‍ മുന്‍‌മീറ്റുകള്‍ പോലെ തന്നെ ഇത്തവണയും മൊത്തമായും ചില്ലറയായും അരവിന്ദന്‍ വിജയിയായി തന്നെ നിന്നു. ബാംഗ്ലൂര്‍ ചോരയാണ് ആ രക്തത്തില്‍ ഓടുന്നത് എന്ന ഒരു പ്രാദേശിക വാദം അപ്പോള്‍ ഉയരുകയുണ്ടായി. ദില്‍ബാസുരനും തൊട്ടുപിന്നേയെത്തിയത് ആ വാദം അരക്കിട്ടുറപ്പിച്ചു. തുടര്‍ന്ന് വിശാലന്റെ അടുത്തൂടെ പോയ കാറ്റൊന്ന് കൊള്ളാന്‍ യോഗമുണ്ടായിരുന്നെങ്കില്‍ എന്ന് പലരും നെടുവീര്‍പ്പിടുകയും യൂറോപ്പില്‍ പോയി ബോര്‍ഡറില്‍ കള്ളനും പോലീസും കളിച്ച കുറുമാന്റെ പച്ചയായ ജീവിതാനുഭവങ്ങളുടെ ആവിഷ്കാരത്തിനു തുല്യമായ ഒന്നും ഇന്നേ വരെ ബ്ലോഗില്‍ കണ്ടിട്ടില്ലെന്ന് ഐക്യകണ്ഠേന അഭിപ്രായമുയരുകയും ചെയ്തു. ഇതിന്റെ ഇടയ്ക്ക് ചില ലോലഹൃദയരെ ശ്രീജിത്ത് കണ്ണുരുട്ടിക്കാണിച്ച് അദ്ദേഹത്തിന്റെ പേരും ഇടയ്ക്ക് പറയിപ്പിക്കുകയുണ്ടായെങ്കിലും അത് കടലില്‍ കലക്കിയ കായം പോലെ ആരും ശ്രദ്ധിച്ചില്ല. അങ്ങിനെ കൊച്ച് കൊച്ച് തമാശകളും അഭിപ്രായങ്ങളുമായി മുന്നോട്ട് പൊയ്ക്കൊണ്ടിരുന്ന ചടങ്ങില്‍ ചിലര്‍ ആകാശത്ത് സ്റ്റിയറിങ്ങ് വീല്‍ തിരിക്കുന്നതും കസേരയില്‍ ആക്സിലറേറ്റര്‍ പോലെ ചവിട്ടുന്നതും കണ്ട് കാര്യം മനസ്സിലാക്കിയ തഥാഗതാധ്യക്ഷന്‍ ചടങ്ങ് അടുത്തയിനത്തിലേക്ക് കടക്കുന്നതായി പ്രഖ്യാപിച്ചു.

ഗോ-കാര്‍ട്ടിങ്ങ്

ബിഗ് സൈസ് വണ്ടികള്‍ ഓടിച്ച് പരിചയിച്ച വലിയ പുലികള്‍ക്ക് കുഞ്ഞ് കാര്‍ട്ടിങ്ങ് വണ്ടി കൌതുകമുളവാക്കുന്നതായിരുന്നു. ചിലരെങ്കിലും ഇത് ആദ്യം പരീക്ഷിക്കുന്നതും. അതു കൊണ്ട് തന്നെ ആദ്യത്തെ കുറച്ച് നേരത്തെ കാത്തിരുപ്പ് ആശങ്കകളുടെതും സ്റ്റ്രാറ്റെജി പ്ലാനിങ്ങുകളുടേതുമായി. താത്പര്യമില്ലെന്ന് പറഞ്ഞ് ഒഴിയാന്‍ ശ്രമിച്ച രാധ-പീലിക്കുട്ടി കൂട്ടുകാരികള്‍ പരിപാടിയില്‍ പങ്കെടുക്കാന്‍ പിന്നീട് താത്പര്യം കാണിച്ചതോടുകൂടി എല്ലാവരും ആവേശപൂര്‍വ്വം പങ്കെടുക്കുന്ന ഒരു പരിപാടിയായി അതുമാറി. ഡ്രൈവറെ വച്ചോടിക്കാന്‍ പറ്റിയ കാര്‍ അവിടെ ഉണ്ടായിരുന്നില്ലെന്നതിനാല്‍ തഥാഗതന്‍ ഈ ഇനത്തില്‍ പങ്കെടുക്കാതെ പിന്മാറുകയാണുണ്ടായത്.

ആവേശപൂര്‍ണ്ണമായ മത്സരമായിരുന്നു ചന്ദ്രക്കാറനും മഴനൂലും ശ്രീജിത്തും ആര്‍ദ്രവും തമ്മില്‍ നടന്നത്. എങ്കിലും, തലയുടെ ഇരട്ടി വലിപ്പമുണ്ടായിരുന്ന ഹെല്‍മെറ്റുകളിട്ട് തലങ്ങും വിലങ്ങും ചീറിപ്പാഞ്ഞ് നടന്ന ഇവര്‍ ആരെയൊക്കെയോ എപ്പോഴൊക്കെയോ വെട്ടിച്ച് കടന്നുപോയെങ്കിലും ആര്‍ക്കും പരസ്പരം മനസ്സിലാകുന്നുണ്ടായിരുന്നില്ല എന്നതിനാല്‍ വിജയിയെ കണ്ടുപിടിക്കാനാകാതെ പിരിയുകയായിരുന്നു. ഇടയ്ക്ക് ട്രാക്കിനു ചുറ്റും നിരത്തിയിട്ടിരുന്ന ടയറുകളുടെ ഗുണനിലവാര പരിശോധന ചന്ദ്രക്കാറന്‍ നടത്തിയെങ്കിലും അത് പീലിക്കുട്ടി-രാധ എന്നിവരുടെ നേതൃത്വത്തിലുണ്ടായിരുന്ന ടയര്‍ ടെസ്റ്റിന്‍ കാറിന്റെ പരിശോധനാനിലവാരത്തിന്റെ പത്തിലൊന്നുപോലും എത്തിയില്ല. ട്രാക്കില്‍ സ്വന്തം വണ്ടിയോടിക്കുന്നതിനുപകരം ട്രാക്കിലേയ്ക്ക് ടയര്‍ ഇടിച്ചിട്ടിട്ട് അവിടുത്തെ തൊഴിലാളികളെ തലങ്ങും വിലങ്ങും ഓടിക്കുന്ന നവീനമായ ഒരു കാര്‍ട്ടിങ്ങ് രീതിയാണ് അവര്‍ അവിടെ പരീക്ഷിച്ചത്. പരീക്ഷണം വിജയകരമായിരുന്നുവെന്ന് കാര്‍ട്ടിങ്ങ് കഴിഞ്ഞയുടനേ നടന്ന പത്രസമ്മേളനത്തില്‍ രണ്ടും പേരും അവകാശപ്പെട്ടു. ആള്‍ത്തിരക്ക് കൂടുതലായിരുന്നതിനാല്‍ അടുത്ത് റൌണ്ടില്‍ മാത്രം ഇടം കിട്ടിയ കുട്ടപ്പായിയും ഈ ഇനം നന്നായി ആസ്വദിക്കുന്നത് കാണാമായിരുന്നു. അനുവദിക്കപ്പെട്ട ആറ് ചുറ്റുകള്‍ക്ക് ശേഷം നിര്‍ത്താന്‍ ആവശ്യപ്പെട്ട ജീവനക്കാരോട് “ബ്രെയ്ക്കെവിടെ?” എന്ന് ചോദിച്ച് കുട്ടപ്പായി വീണ്ടും ചുറ്റല്‍ തുടര്‍ന്നു. അവസാനം കുട്ടപ്പായി ബ്രേക്ക് കണ്ടു പിടിച്ചപ്പോഴേക്കും മൂന്ന്-നാല് റൌണ്ട് വീണ്ടും കഴിഞ്ഞിരുന്നു.

ഡിന്നര്‍

കാര്‍ട്ടിങ്ങിന്റെ ആവേശവുമായി എല്ലാവരും ഓടിയെത്തിയത് തീന്‍‌മേശയിലേയ്ക്കാണ്. സ്വാഭാവികമായും തന്റെ കഴിഞ്ഞ റൌണ്ടിലെ പകടനം മെച്ചപ്പെടുത്താനുള്ള ഒരു വേദിയായി എല്ലാവരും ഇതിനെക്കണ്ടു. കൂടുതല്‍ റൌണ്ടുകള്‍ വേഗത്തില്‍ തീര്‍ക്കുവാനായി അവനവനുമായി എല്ലാവരും നടത്തിയ ഈ മത്സരത്തില്‍ എല്ലാവരും ഭേദപ്പെട്ട പ്രകടനമാണ് കാ‍ഴ്ചവച്ചത്. ആല്‍ക്കഹോള്‍ അടങ്ങിയ ശീതളപാനീയത്തിന്റെ മത്സരത്തില്‍ കുട്ടപ്പായി ആദ്യമേ തോറ്റു പിന്മാറിയെങ്കിലും മഴനൂലും ചന്ദ്രക്കാറനും തഥാഗതനും ആവേശപൂ‍ര്‍വ്വം മത്സരിച്ചു. കഴിഞ്ഞ മീറ്റില്‍ താന്‍ സ്ഥാപിച്ച വ്യക്തിഗത റെക്കോര്‍ഡ് ചന്ദ്രക്കാറന്‍ മെച്ചെപ്പെടുത്തി. മദ്യനൂല്‍ പക്ഷെ മീറ്റിനു ശേഷവും ബാറുകളില്‍ നിന്ന് ബാറുകളിലേയ്ക്ക് സഫറോം കീ സിന്ദജി അങ്ങിനെയൊന്നും ഖതം ഹോ ജാതേ നഹീ ഹേം എന്നും പറഞ്ഞ് കൊണ്ട് കിട്ടുന്നിടത്തെല്ലാം ഒരു പിടി മണ്ണുവാരിയിട്ട് പ്രയാണം തുടര്‍ന്നതായാണ് അദ്ദേഹത്തെ വീട്ടില്‍ കൊണ്ടുവിട്ട ശ്രീജിത്ത് പറഞ്ഞ് പരത്തിയതായി അറിവായിട്ടുള്ളത്. തഥാഗതന്‍ പക്ഷെ തന്റെ കഴിവിന്റെ പരമാവധി അവിടെ വച്ച് തന്നെ കഴിച്ച് തീര്‍ത്തു.

കഴിഞ്ഞ മീറ്റിന് ആവേശം വാനോളമുയര്‍ത്തിയ വെറുതേ കിടന്ന് തര്‍ക്കിക്കല്‍ മത്സരം ഇത്തവണയും അതിന്റെ ഔന്നിത്യങ്ങളില്‍ തന്നെ നിലകൊണ്ടു. കഴിഞ്ഞ തവണത്തെ വിജയിയായ ചന്ദ്രക്കാറന്‍ തന്നെ ഇത്തവണയും വിജയിച്ച് ഈ രംഗത്തെ അനിഷേധ്യ ജേതാവാണെന്ന് തെളിയിച്ചു. എന്നാല്‍ കഴിഞ്ഞ തവണത്തേതില്‍നിന്നും വിഭിന്നമായി ഇത്തവണ ശക്തമായ വെല്ലുവിളികളാണ് ചന്ദ്രക്കാറന് നേരിടേണ്ടി വന്നത്. തഥാഗതന്‍ ഇന്നല്ലെങ്കില്‍ നാളെ ഈ കിരീടം ഞാന്‍ മേടിച്ചെടുക്കും എന്നും പറഞ്ഞ് കട്ടയ്ക്ക് കട്ടയ്ക് നിന്നു മത്സരം തീപാറുന്നതരമാക്കി. മറ്റുള്ളവരുടെ നാക്ക്, ഊണ് കഴിച്ച പാത്രം നക്കിത്തുടയ്ക്കുകയും കൂടെ ചെയ്തതിനു ശേഷം വെറുതേ ഇരിക്കേണ്ട ഒരു സ്ഥിതിവിശേഷമായിരുന്നു പിന്നീട് കുറേ നേരം. അതിനൊരറുതി കൊടുത്തു കൊണ്ട് വെറൈറ്റി എന്റെര്‍ടെയിന്റ്മെന്‍സ്റ്റിനു മറ്റ് സഹൃദയരുടെ ഇടപെടല്‍ മൂലം തുടക്കമായി.

വെറൈറ്റി എന്റെര്‍ടെയിന്റ്മെന്റ്സ്

ബ്ലോഗ്‌സ്വരയുടെ മുന്നണിപ്പോരാളിയും പിന്നണിഗായകനുമായ കിരണിന്റെ അനുഗ്രഹീത ശബ്ദത്തില്‍ ചില പാട്ടുകളുമായി ഈ ഇനത്തിന് തുടക്കമായി. എല്ലാവരേയും സ്വന്തം സ്വരം കൊണ്ട് ഉടന്‍ തന്നെ കിരണ്‍ കയ്യിലെടുത്തു. തുടര്‍ന്ന് പീലിക്കുട്ടിയും മഴനൂലും തങ്ങളെക്കൊണ്ടാകുന്ന രീതിയില്‍ പാട്ടിന്റെ ഈ വേദി അലങ്കരിച്ചു. അറിയാവുന്ന പണിയ്ക്ക് പോയാല്‍ മതി എന്ന ഒരു തത്വസംഹിതയുടെ വക്താക്കളായ കുട്ടപ്പായി, ആര്‍ദ്രം, അജിത്ത് തുടങ്ങിയവര്‍ കൈ കൊട്ടുന്നതിന്റെ നവീന പ്രവണതകള്‍ ഏതൊക്കെയാണെന്ന് മറ്റുള്ളവരെ ബോധ്യപ്പെടുത്തുന്നുണ്ടായിരുന്നു. കൊച്ചി മീറ്റിന്റെ ഗായകസംഘം തലവനായ ശ്രീജിത്ത്, പല ഭീഷണികള്‍ക്കുമുന്നിലും പതറാതെ നിന്നുവെങ്കിലും പാടാനുള്ള തന്റെ ആഗ്രഹം തൊണ്ട ശരിയല്ല എന്ന കാരണത്താല്‍ ബലികഴിക്കേണ്ടി വന്നത് അദ്ദേഹത്തിന്റെ മുഖം വിഷാദാര്‍ദ്രമാക്കി. അജിത്ത് ഏറ്റിരുന്ന കോമഡി ഷോ, മറ്റുള്ളവര്‍ ഏറ്റിരുന്ന ഏകാങ്ക നാടകം എന്നിവ സമയക്കുറവുമൂലവും പീലിക്കുട്ടി, രാധ എന്നിവര്‍ ഏറ്റിരുന്ന കഥാപ്രസംഗം കോസ്റ്റ്യൂംസിന്റെ അഭാവം മൂലവും വേണ്ട എന്ന് വയ്ക്കേണ്ടി വന്നത് ഭാഗ്യത്തിന് ആരും ശ്രദ്ധിച്ചുകണ്ടില്ല.

രാത്രി പത്തു മണിയോടെ മീറ്റിന് തിരശ്ശീല വീണു. സ്വന്തം വണ്ടിയിലല്ലാതെ വന്നവരെ ചന്ദ്രക്കാറന്‍ കൊണ്ടു വിട്ടു. മറ്റുള്ളവര്‍ അവനവന്റെ പാടുനോക്കിപ്പോയി, മഴനൂല്‍ ബാര്‍ നോക്കിയും. എല്ലാവര്‍ക്കും എന്നും ഓര്‍മ്മിക്കാന്‍ പാകത്തില്‍ രസകരമായ ഒരു അനുഭവമായി ഈ മീറ്റ് എന്ന് പങ്കെടുത്ത എല്ലാവരും ഒരേ സ്വരത്തില്‍ ഏറ്റുപറഞ്ഞു. അടുത്ത മീറ്റ് ഉടന്‍ തന്നെ നടത്താമെന്ന തീരുമാനവുമായിട്ടാണ് എല്ലാവരും പിരിഞ്ഞത്.

വാല്‍കഷ്ണം

മീറ്റിന്റെ ഇടയില്‍ വീണുകിട്ടിയ ചില രസകരമായ സംഭവങ്ങള്‍ കൂടിച്ചേര്‍ക്കാതെ ഈ റിപ്പോര്‍ട്ട് പൂര്‍ണ്ണമാകുന്നതെങ്ങിനെ?

കുട്ടപ്പായി: എന്റെ ഒരു കൂട്ടുകാരന്‍ ടെസ്കോ എന്ന കമ്പനിയിലുണ്ട്.
ശ്രീജിത്ത്: ടെസ്കോയോ? എന്താ സ്പെല്ലിങ്ങ്?
കുട്ടപ്പായി: ടി.ഇ.എസ്.കോ

---
കാര്‍ട്ടിങ്ങ് നടക്കുന്ന പവലിയനില്‍ പെട്ടെന്ന് ചന്ദ്രക്കാറന്റെ മുന്നില്‍ എല്ലാവരും തടിച്ചുകൂടി. എല്ലാവരും ചന്ദ്രക്കാറന് അഭിമുഖമായി നിന്ന് ചന്ദ്രക്കാറന്റെ സംസാരം കേള്‍ക്കാന്‍ നില്‍ക്കുന്നത് കണ്ട് ചന്ദ്രക്കാറന്‍ കോള്‍മയിര്‍ കൊണ്ടു. ചന്ദ്രക്കാറന്റെ പിന്നില്‍ നിന്ന പെണ്‍കുട്ടി അവിടുന്ന് മാറിയപ്പോള്‍ ഈ പുരുഷാരവും ഓരോ വഴിക്ക് പിരിഞ്ഞു. അപ്പോഴാണ് തന്റെ ഫാന്‍സിന്റെ ഉള്ളിലിരുപ്പ് ചന്ദ്രക്കാറന് മനസ്സിലാകുന്നത്.

---
ചന്ദ്രക്കാറന്‍: പാലക്കാടിനെക്കുറിച്ച് എന്നോട് തര്‍ക്കിക്കരുത്. പെട്രോള്‍ കട ചോദിച്ചാല്‍ മണ്ണെണ്ണക്കട കാണിച്ച് കൊടുക്കുന്നവരാണ് ആ നാട്ടുകാര്‍. ഞാന്‍ അവിടെ കുറേക്കാ‍ലം തെണ്ടിത്തിരിഞ്ഞ് നടന്നിട്ടുള്ളതാണ്.
തഥാഗതന്‍: തെണ്ടിത്തിരിഞ്ഞ് നടക്കുന്ന ഒരാളോട് പാലക്കാട്ടുകാര്‍ അങ്ങിനെയേ പറയാറുള്ളൂ.

---
കളരിയും പതിനെട്ടടവും പയറ്റും ചര്‍ച്ചാവിഷയമായപ്പോള്‍ ശ്രീജിത്ത് മൌനം പൂ‍ണ്ടു. ഇതുകണ്ട തഥാഗതന്‍
“നീ എന്താടാ മിണ്ടാതിരിക്കുന്നത്?”
“ഓ, ഞാന്‍ കുറച്ച് കാലമായി അങ്കത്തിന് പോകാറില്ല. കഴിഞ്ഞ അങ്കത്തിന് കൈ ഉളുക്കിയത് ഇതു വരെ ഭേദമായില്ല”

ബാംഗ്ലൂര്‍ മീറ്റില്‍ ആദരിയ്ക്കപ്പെട്ടവര്‍

2006-12-04T17:46:00.000+05:30

ബ്ലോഗ്ഗ് സമൂഹത്തിലെ ഏറ്റവും മഹനീയ പുരസ്കാരമായ് ബ്ലോഗ്‌രത്നം അവാര്‍ഡ് നല്‍കി ആദരിക്കപ്പെട്ട ശ്രീജിത്ത്

ബ്ലോഗ്‌മാണിക്യം അവാര്‍ഡിനര്‍ഹനായ കുട്ടപ്പായി

നാലാം ബാംഗ്ലൂര്‍ ബ്ലോഗേര്‍സ് മീറ്റ്

2006-11-30T18:25:00.000+05:30

ബാംഗ്ലൂര്‍ ബ്ലോഗേര്‍സിനെന്താ കൊമ്പുണ്ടോ?

ഇല്ലേയില്ല. ഞങ്ങള്‍ ഇപ്പോഴും സ്നേഹം നിറഞ്ഞ കൂട്ടായ്മയില്‍ തന്നെ. അത് തെളിയിക്കാനായി ഞങ്ങളും ഒരു മീറ്റ് കൂടാന്‍ തീരുമാനിച്ചിരിക്കുന്നു. സന്തോഷിക്കൂ എല്ലാവരും സന്തോഷിക്കൂ.

കൂടുതല്‍ വിവരങ്ങള്‍ താഴെ.

സ്ഥലം: പട്ടേത്സ് ഇന്‍, ആര്‍.ടി.നഗര്‍, ബാംഗ്ലൂര്‍
സമയം: ഡിസംബര്‍ 3, രണ്ടായിരത്തി ആറ്. വൈകുന്നേരം മൂന്ന് മണി.
പങ്കെടുക്കുന്നവര്‍: ബാംഗ്ലൂര്‍ ബ്ലോഗേര്‍സ് ഗമ്പ്ലീറ്റ്.
ചിലവ്: തല‌ഒന്നുക്ക് 450 ക.

കാര്യപരിപാടികള്‍:
3.00 : സ്വാഗത കുടി (Welcome Drink)
3.02 : പ്രാര്‍ത്ഥനാഗാനം. അവതരിപ്പിക്കുന്നത്, മഴനൂലും കൂട്ടരും
3.09 : ഉത്ഘാടനം. തഴക്കവും പഴക്കവും ഉള്ള ബ്ലോഗര്‍, വര്‍ണ്ണമേഘം.
3.16 : സ്വാഗതപ്രസംഗം. കമ്മിറ്റി ഭാരവാഹി കുട്ടപ്പായി.
3.22 : അധ്യക്ഷപ്രസംഗം. വേറൊരു കമ്മിറ്റി ഭാരവാഹി തഥാഗതന്‍.
3.29 : ചുമ്മാ ഒരു പ്രസംഗം. ഇതിന്റെ ഒക്കെ മെയിന്‍ ആള്‍, ഞാന്‍.
3.52 : ആശംസാപ്രസംഗം. പാവമായ ചന്ദ്രക്കാറന്‍.

തുടര്‍ന്ന് കലാപരിപാടികള്‍.

4.00 : രാധ, പീലിക്കുട്ടി സിസ്റ്റേര്‍സ് അവതരിപ്പിക്കുന്ന ഏഴാമത് കഥാപ്രസംഗം. “ഒരു ബാംഗ്ലൂര്‍ ബ്ലോഗുഗാഥ”
4.47 : ഏകാങ്ക നാടകം. രംഗത്ത് മഴനൂല്‍, വര്‍ണ്ണമേഘം, കുട്ടപ്പായി, ആര്‍ദ്രം, കൊച്ചന്‍ തുടങ്ങിയവര്‍
5.13 : കോമഡി ഷോ: അവതരണം സുപ്രസിദ്ധ കാഥികന്‍ അജിത്ത് കൃഷ്ണണുണ്ണി.
5.30 : ബാംഗ്ലൂര്‍ ബ്ലോഗേര്‍സിന്റെ വേള്‍ഡ് റെസ്ലിങ്ങ് ചാമ്പ്യന്‍ഷിപ്പ് ഫൈനല്‍. മത്സരം ലോക ചാമ്പ്യനായ പച്ചാളത്തിന്റെ ശിഷ്യന്‍ ശ്രീജിത്തും അടിച്ച് തെറ്റി ബോധമില്ലാതെ നില്‍ക്കുന്ന മഴനൂലും തമ്മില്‍.
6.30 : വെറൈറ്റി എന്റെര്‍ടെയിന്മെന്റ്സ്. ഗോ-കാര്‍ട്ടിങ്ങ്, ഷട്ടില്‍ ബാറ്റ്ബിന്റണ്‍, ടെന്നീസ്, നീന്തല്‍, മുച്ചീട്ട് കളി, ബലൂണ്‍ പൊട്ടിക്കല്‍, കുപ്പിയെണ്ണല്‍ തുടങ്ങിയവ.
8.00 : ഡിന്നര്‍
9.00 : ചുമ്മാ കിടന്ന് തര്‍ക്കിക്കല്‍. കഴിഞ്ഞ മീറ്റിലെ വിജയിയായ ചന്ദ്രക്കാറന് ശക്തമായ വെല്ലുവിളി ഉയര്‍ത്തിക്കൊണ്ട് മറ്റ് ബ്ലോഗേര്‍സ് ഇത്തവണ മാറ്റുരയ്ക്കുന്ന വേദി.

കാണത്തവറാതീങ്കള്‍. ( എന്നു വച്ചാല്‍ കാണാന്‍ മറക്കണ്ട എന്ന്, സണ്‍.ടി.വി കാണുന്നതിന്റെ ഒരു ഹാങ്ങ് ഓവര്‍ ആണ്)

മീറ്റിന് എല്ലാ സഹായ സഹകരണങ്ങളും പ്രതീക്ഷിക്കുന്നു. ആള്‍ ദ് ബെസ്റ്റ് റ്റു ദ മീറ്റ്.

ശ്രദ്ധിക്കുക: കാര്യപരിപാടികളില്‍ തോന്നുമ്പൊ തോന്നുമ്പോ മാറ്റങ്ങള്‍ വരുത്താന്‍ കമ്മിറ്റിക്ക് അധികാരമുണ്ടായിരിക്കുന്നതാണ്.

ഹണിവെല്‍ ക്യാമ്പസ്സില്‍ ഒരു ഒത്തുകൂടല്‍.

2006-11-20T20:44:00.000+05:30

ഒരു പണിത്തിരക്കു നിറഞ്ഞ ആഴ്ചയുടെ അവസാനത്തിലാണ് ഇങ്ങനെയൊരാശയം ഉയര്‍ന്ന് വന്നത്. ഒരു പുതിയ ബ്ലോഗുവായനക്കാരിയും, ബ്ലോഗിനെ ഗൌരവമായി കാണുന്നയാളുമായ രാധ, താന്‍ ജോലി ചെയ്യുന്ന കമ്പനിയുടെ വാര്‍ഷിക ആഘോഷങ്ങള്‍ക്ക് ബാംഗ്ലൂരിലെ ബ്ലോഗര്‍ സുഹ്രുത്തുക്കളെ ക്ഷണിക്കുകയായിരുന്നു. ഒരു ബാംഗ്ലൂര്‍ ബ്ലൊഗ്ഗെര്‍സ് മീറ്റിനു സാധ്യത തെളിഞ്ഞെങ്കിലും, ഒരു മീറ്റാക്കി മാറ്റാന്‍ സമയം കുറവായിരുന്നു.

പലരും മുന്‍ കൂട്ടി തീരുമാനിച്ച കാര്യങ്ങളാല്‍ തിരക്കിലായിരുന്നു.

എങ്കിലും, ശനിയാഴ്ച തിരക്കിനു അവധി കൊടുത്തവര്‍ ഒത്ത് കൂടുവാന്‍ തന്നെ തീരുമാനിച്ചു. യാദ്രിശ്ചികമാവാം, എത്തിച്ചേര്‍ന്ന കിരണും,അജിത്തും,ഞാനും,പിന്നെ രാധയും, ആദ്യമായി കണ്ട്മുട്ടുന്നവര്‍. ബൂലോഗത്തിന്‍റെ തണലില്‍ ആയതുകൊണ്ടുതന്നെ, അപരിചിതത്വം ഒരു നിമിഷംകൊണ്ട് വഴിമാറി.ചായ ഗ്ലാസുകള്‍ക്കും, പ്ലേറ്റില്‍ നിരന്ന ബജികളുടേയും ഒപ്പം, നിമിഷങ്ങളെപ്പോലെ കടന്നു പോയതു മൂന്ന് മണിക്കൂറുകള്‍.

രാധ ഒരു ഹോസ്റ്റിന്‍റെ മൂഡിലായിരുന്നു. പതിവു പോലെ, ബ്ലോഗിലെ പുലികളെക്കുറിചും, വരണ്ടുപോയ ക്ലബ്ബും, ചര്‍ച്ചക്ക് വിഷയങ്ങളായി.

അപ്പോഴും പണിത്തിരക്കിലായിരുന്ന കുട്ടപ്പായി, ഫോണിലൂടെ സംസാരിച്ചു.ഈ ഒത്തുകൂടലിന്‍റെ പ്ലാന്‍ ശ്രീജിത്തിന്‍റേതായിരുന്നെങ്കിലും, ഒഴിവാക്കാനാവാത്ത കാരണങ്ങളാല്‍, ശ്രീജിത്തിന് വരാന്‍ സാധിച്ചില്ല. മെയില്‍ വഴി വരാന്‍ സാധിക്കില്ലെന്ന് അറിയിച്ചിരുന്ന ചന്ദ്രക്കാരനും തഥാഗതനും,നളനും, ബാംഗ്ലൂരിനോട് താല്‍ക്കാലികമായി വിട പറയുന്ന കുഞ്ഞനും, കല്യാണിയും, പീലിക്കുട്ടിയുമൊക്കെ സംസാരത്തിനിടക്ക് കയരി വന്നു.

തികച്ചും അനൌപചാരികമായ ഒരു ഒത്തുകൂടലായിരുന്നെങ്കിലും, ബാംഗ്ലൂര്‍ വിശേഷങ്ങളിലേക്ക് ഒരു വിശേഷം കൂടിയായി ഇതിവിടെ പോസ്റ്റുന്നു.

--ബാംഗ്ലൂര്‍ ബുക്ക്‌ ഫെസ്റ്റിവല്‍--

2006-11-13T15:00:00.000+05:30

പുസ്തകപ്രേമികളേ,

ഒക്ടോബറിലെ ബിയറിന്റെ ആലസ്യത്തില്‍ ആണ്ടു കിടന്ന ബാംഗ്ലൂരിനേ ഉണര്‍ത്തുപാട്ടു ചൊല്ലി ഉണര്‍ത്താന്‍ പുസ്തകങ്ങളുടെ ഒരു നീണ്ട നിര വന്നെത്തിക്കഴിഞ്ഞു. വെള്ളിയാഴ്ച തുടങ്ങിയ ഈ പുസ്തക പ്രദര്‍ശ്ശനം/വില്‍പനയില്‍ സാമാന്യം തരക്കേടില്ലാത്ത കളക്ഷന്‍ കണ്ടു. പാലസ്‌ ഗ്രൌണ്ടിലാണ്‌ സംഗതി നടക്കുന്നതു, സമയം 11 - 8. ഒരാള്‍ക്ക്‌ അകത്തു കയറാന്‍ 20 രൂപ. 19-തിനു അവസാനിക്കും.

മുന്‍പേ തീരുമാനിച്ചതുപോലെ തഥാഗതനും ഞാനും ശനിയാഴ്ച പാലസ്‌ ഗ്രൌണ്ടില്‍ കണ്ടു മുട്ടി. ഡി സി ബുക്കിന്റെ സ്റ്റാളില്‍ നിന്നും വിജയന്‍, മുകുന്ദന്‍, സേതു, ആനന്ദ്‌, സാറാടീച്ചര്‍, ബഷീര്‍, ചുള്ളിക്കാട്‌ എന്നിവരുടെ മേല്‍ ഞാന്‍ കൈവെച്ചു, ഇവരെയെല്ലാം ദശാബ്ദങ്ങള്‍ക്കു മുന്‍പേ വായിച്ചു തള്ളിയ തഥാഗതന്‍ എനിക്കു പേരറിയാത്ത ഏതോ ചില ചുള്ളന്മാര്‍ക്കു മേല്‍ കൈ വെച്ചു. ആംഗുലേയത്തിനോടു പണ്ടേ പ്രതിപത്തി ഇല്ലാത്ത ഞാന്‍ ആ ഭാഗം ദര്‍ശ്ശിക്കാന്‍ നിന്നില്ല, പുള്ളി അവരേയും വിടുന്ന ലക്ഷണമില്ല... :)

പുസ്തകങ്ങളുടെ ഇടയിലുള്ള നടത്തിയും അതിനുശേഷമുള്ള ദാഹശമനീപാനവും എല്ലാം കൊണ്ട്‌ രസകരമായ ഒരു ശനിയാഴ്ചയായിരുന്നു.

--ഒക്ടോബര്‍ ഫെസ്ട്‌--

2006-10-25T13:10:00.000+05:30

സുഹ്രുത്തുക്കളേ,

ഐ ടി സിറ്റി എന്ന പേരില്‍ അറിയപ്പെടുന്ന ബാംഗ്ലൂരിനു മറ്റൊരു പേരു കൂടിയുണ്ട്‌, ഗാര്‍ഡന്‍ സിറ്റി. ഒരു പറ്റം കമ്പ്യൂട്ടര്‍ ഗീക്കുകളും കൂറ്റന്‍ ചില്ലുമേടകളും ആദ്യം പറഞ്ഞ പേരിനു തെളിവായി കാണിക്കാനുണ്ടെങ്കില്‍, വഴിനീളെ കാണുന്ന മരങ്ങളും, വര്‍ഷാവര്‍ഷ്ഷം നടത്തിപ്പോരുന്ന ഫ്ലവര്‍ ഷോകളും രണ്ടാമത്തെ പേരിനെ സാധൂകരിക്കുന്നു.

നല്ല രണ്ടു പേരുകളുള്ളപ്പോള്‍ ഒരല്‍പം തിരിഞ്ഞ പേരും വേണ്ടേ? ഉണ്ടല്ലോ, പബ്‌ സിറ്റി. തെളിവു വേണോ, എല്ലാ നൂറു മീറ്ററിലും ഒരു മദ്യശാല, അല്ലെങ്കില്‍ ഒരു റീട്ടേല്‍ ഷാപ്‌, നഗരത്തിന്റെ ഹൃദയഭാഗങ്ങളില്‍ നല്ല അഴകുള്ള പബ്ബുകള്‍, അതില്‍ നിന്നും എല്ലായിപ്പോഴും അകത്തേക്കും പുറത്തെക്കും ഒഴുകുന്ന യുവാ-യുവതികള്‍, കണ്ണിനും സുഖം വയറിനും സുഖം തലക്കും സുഖം, പിന്നെ ദിവസവും രണ്ടെണ്ണം വിട്ടാല്‍ ഹാര്‍ട്ട് അറ്റാക്ക്‌ വരില്ലത്രേ.

അങ്ങനെ പേരെടുത്ത ബാംഗ്ലൂര്‍ ഒന്നുറങ്ങിപ്പോയോ എന്നു പബ്ബുടമകള്‍ക്കൊരു സംശയം. ഉറക്കം തൂങ്ങുന്ന നാട്ടിന്‍പുറങ്ങളെ ഉണര്‍ത്താന്‍ ഉത്സവങ്ങള്‍ നടത്തുമല്ലോ, അതു പോലെ ഒരു മദ്യഉത്സവം വരുന്നു --ഒക്ടോബര്‍ ഫെസ്ട്‌-- സംഗതി നടക്കുന്നത്‌ പാലസ്‌ ഗ്രൌണ്ടില്‍, തീയതികള്‍ ഈ മാസം 27, 28, 29. 27 വെള്ളിയാഴ്ച 4 മണി മുതല്‍ക്കു തുടങ്ങുന്ന ആഘോഷപരിപാടികളില്‍ ബിയര്‍ ഒഴുക്കിനു പുറമേ, റൊക്ക്ഷോ, ബോഡി ആര്‍ട്‌, പലതരം ഗെയിംസു തുടങ്ങിയവ കാണും.

ജര്‍മ്മനിയില്‍ ഇതുപോലൊന്നു നടത്തി അദ്ഭുതവിജയം നേടിയത്‌ ഇവിടെയും ആവര്‍ത്തിക്കുകയാണ്‌ സംഘാടകരുടെ ശ്രമം. ഇന്‍ഡ്യയില്‍ ബാംഗ്ലൂര്‍ തിരങ്ങെടുത്തതിന്റെ കാരണം നേരത്തേ വിവരിച്ചുവല്ലോ. ഒരാള്‍ക്കു 350 രൂപയാണ്‌ എന്‍ട്രി ഫീസ്‌, ബൂലോകവാസികള്‍ ഒന്നാഞ്ഞുപ്പിടിച്ചു ഇതൊരു മഹാവിജയം ആക്കണമെന്നാണ്‌ എന്റെ ആഹ്വാനം. ഈ വിവരം കേട്ട കുറച്ചു ബൂലോകര്‍ മറ്റൊരു ബാംഗ്ലൂര്‍ മീറ്റിനുള്ള വട്ടം കൂട്ടല്‍ തുടങ്ങിയെന്നാണ്‌ അറിഞ്ഞത്‌.

ബാംഗ്ലൂര്‍ വിശേഷങ്ങളുടെ ഈ എപിസോഡ്‌ ഇവിടെ പൂര്‍ണ്ണമാകുന്നു... :)

http://www.thegreatindianoctoberfest.com/beer.htm

അസ്സോസിയേഷന്റെ ആദ്യ സംഗീത ആല്‍ബം

2006-08-29T11:11:00.000+05:30

ബാംഗ്ലൂര്‍ ബ്ലോഗേര്‍സ് അസ്സോസിയേഷന്‍, ബ്ലോഗിങ്ങിനെ ഒരു പടി കൂടി കടന്ന് ചവുട്ടിയിരിക്കുന്നു. ബ്ലോഗ്‌സ്വരയില്‍ നിന്ന് പ്രചോദനം ഉള്‍ക്കൊണ്ടുകൊണ്ട് ബാംഗ്ലൂര്‍ അസ്സോസിയേഷനും ഒരു ഓഡിയോ ആല്‍ബം പുറത്തിറക്കാന്‍ തീരുമാനിച്ച വിവരം അഭിമാനപുരസരം നിങ്ങളെ അറിയിച്ച് കൊള്ളട്ടെ.

പുതിയ ആല്‍ബത്തിന്റെ പേര് നിശ്ചയിച്ചിട്ടില്ല. ഇപ്പോഴും അതിനെക്കുറിച്ച് ചര്‍ച്ചകള്‍ നടന്ന് കൊണ്ടിരിക്കുന്നു.

ആല്‍ബത്തിലെ ചില പ്രസക്ത ഭാഗങ്ങള്‍ ഞങ്ങളുടെ പ്രചോദനമായ നിങ്ങള്‍ക്കുമുന്നില്‍ സമര്‍പ്പിക്കുന്നു.

പാട്ട്: കഭീ കഭീ
പാട്ടുകാരന്‍: മഴനൂലുകള്‍
സ്റ്റുഡിയോ: കുട്ടപ്പായിയുടെ കാര്‍
കോറസ്സ്: വര്‍ണ്ണമേഘങ്ങള്‍.

പാട്ട്: ലാ പിലാദേ
പാട്ടുകാരന്‍: മഴനൂലുകള്‍
സ്റ്റുഡിയോ: ലെമണ്‍ഗ്രാസ് ഹോട്ടല്‍
കോറസ്സ്: കുമാര്‍.

പാട്ട്: ഒന്നിനി ശ്രുതി താഴ്തി
പാട്ടുകാരന്‍: കൊച്ചന്‍
സ്റ്റുഡിയോ: ലെമണ്‍ഗ്രാസ് ഹോട്ടല്‍
കോറസ്സ്: ഗമ്പ്ലീറ്റ് ബാംഗ്ലൂര്‍ ബ്ലോഗേര്‍സ്.

എല്ലാ ബ്ലോഗേര്‍സിന്റേയും ആശീര്‍വാദവും അനുഗ്രഹങ്ങളും ഈ കന്നി സംരംഭത്തിനെ വിജയിപ്പിക്കുമെന്ന പ്രതീക്ഷയോടെ സമര്‍പ്പിക്കുന്നു.

കളഞ്ഞുപോയ അവസരങ്ങള്‍

2006-08-23T14:30:00.000+05:30

ഇതൊരു ക്ഷമാപണമാണ്. ഗുരുതരമായ കൃത്യവിലോപം നടത്തിയതിനുള്ള അസ്സോസിയേഷന്റെ ക്ഷമാപണം.

അസ്സോസിയേഷന്റെ പ്രവര്‍ത്തനത്തെക്കുറിച്ചും നടത്തിപ്പിനെക്കുറിച്ചും ചില വ്യക്തമായ തീരുമാനങ്ങള്‍ അസ്സോസിയേഷന്റെ രൂപീകരണ സമയത്ത് തന്നെ ഭാരവാഹികള്‍ കൈക്കൊണ്ടിട്ടുണ്ടായിരുന്നു. ഒന്നിച്ച് കൂടാനുള്ള ഒരു അവസരവും മീറ്റ് നടത്താനുള്ള ഒരു സാധ്യതയും കളയില്ല എന്നതായിരുന്നു അതില്‍ പ്രധാനം. എന്നിട്ടും ചില തെറ്റുകള്‍ അസ്സോസിയേഷന്റെ ഭാഗത്ത് കടന്ന് കൂടി. അതിനുള്ള ഔദ്യോഗിക മാപ്പപേക്ഷ ആണ് ഇത്. വിവരണം ചുവടെ.

കഴിഞ്ഞ തിങ്കളാഴ്ച, അതായത് ആഗസ്റ്റ് 14-ന്, ബാംഗ്ലൂര്‍ ബ്ലോഗേര്‍സിന്റെ അണിയറയിലെ ശക്തിയായും, ആദര്‍ശങ്ങള്‍ കൊണ്ട് പ്രചോദനമായും, പ്രസരിപ്പ് കൊണ്ട് മാതൃകയുമായ കല്യാണിയുടെ പിറന്നാളായിരുന്നു. അന്നൊരു ഗംഭീരപ്രകടനവും, പിറന്നാളാഘോഷവും അസ്സോസിയേഷന്റെ മേല്‍നോട്ടത്തില്‍ നടത്തപ്പെടേണ്ടതായിരുന്നു. അതുണ്ടായില്ല.

കഴിഞ്ഞ ചൊവ്വാഴ്ച, അതായത് ആഗസ്റ്റ് 15-ന്, ഇന്ത്യയുടെ സ്വാതന്ത്ര്യദിനമായിരുന്നു. അന്ന് നടത്തേണ്ടിയിരുന്നതും ഗംഭീര ആഘോഷങ്ങള്‍ തന്നെയായിരുന്നു. ബ്ലോഗില്‍ ഉള്ള സ്വാതന്ത്യപ്രവര്‍ത്തകരെ അനുമോദിക്കലും, സ്വാതന്ത്യവും ബ്ലോഗിങ്ങും എന്ന വിഷയത്തില്‍ ഒരു സിമ്പോസിയവും, ബ്ലോഗര്‍മ്മാ‍ര്‍ക്ക് മിഠായി വിതരണവും, അങ്ങിനെ ചെയ്യേണ്ടത് ഒരുപാടുണ്ടായിരുന്നു. അതുണ്ടായില്ല.

അന്നേ ദിവസം തന്നെ, അതായത് ആഗസ്റ്റ് 15-ന്, ബാംഗ്ലൂര്‍ ബ്ലോഗേര്‍സ് അസ്സോസിയേഷനിലെ പുതുമുഖം സിനോജിന്റെ പിറന്നാളായിരുന്നു. ഒരു പുതുമുഖത്തിന് കൊടുക്കേണ്ട വരവേല്‍പ്പും, ആമുഖവും, പിന്നെ പിറന്നാള്‍ക്കാരന് കൊടുക്കേണ്ട മറ്റ് സന്തോഷപ്രകടനങ്ങളും അത്യുത്സാഹപൂര്‍വ്വം കൊടുക്കേണ്ടതായിരുന്നു. അതുണ്ടായില്ല.

ഈ ശനിയാഴ്ച, അതായത് ആഗസ്റ്റ് 26-ന്, വിവാഹിതനാകുന്ന സിനോജിന്റെ ബാച്ചിലര്‍ പാര്‍ട്ടി കഴിഞ്ഞ ആഴ്ച നടത്തേണ്ടതായിരുന്നു. നാലാം മീറ്റായി കണ്ട് വച്ചിരുന്നതും അതാണ്. മഴയായ് മദ്യം നൂലു പോലെ പലപല വര്‍ണ്ണങ്ങളില്‍ മേഘങ്ങളില്‍നിന്നെന്നപ്പോലെ കുട്ടപ്പനായി പെയ്തിറങ്ങുന്ന ഈ ഒരു അസുലഭമുഹൂര്‍ത്തവും അസ്സോസിയേഷന്‍ വളരെ ദാരുണമായി മറന്നു. എല്ലാം പോയില്ലേ.

ഈ പറഞ്ഞ സിനോജ് ഇന്ന് നാട്ടിലേക്ക് പോയിട്ടുണ്ട്. ചുള്ളന്‍ മൂന്നാം തിയതി തിരിച്ചെത്തും, എട്ടിന് വിദേശത്തേക്ക് പറക്കുകയും ചെയ്യും. ഈ ദിവസങ്ങള്‍ക്കുള്ളില്‍ ഒരു ഗംഭീര പാര്‍ട്ടിയും ഒരു യാത്രയല്‍പ്പ് ചടങ്ങും നടത്തേണ്ടതുണ്ട്. അസ്സോസിയേഷന്‍ ഭാരവാഹികളുടെ മീറ്റിങ്ങ് വളരെ അടിയന്തിരമായി വിളിച്ച് കൂട്ടേണ്ടതാണ്. എന്നാല്‍ പലവിധ തിരക്കുകളാല്‍ അതും ഇത് വരെ നടന്നില്ല.

അസ്സോസിയേഷനു ചുറുചുറുക്ക് നഷ്ടപ്പെട്ടിരിക്കുന്നു. അതിന് കുറ്റം പറയേണ്ടത് തീര്‍ത്താല്‍ തീരാത്തത്ര ജോലി തലയില്‍ കേട്ടി വയ്ക്കുന്ന നമ്മള്‍ ജോലി ചെയ്യുന്ന കമ്പനികളെയാണ്. അസ്സോസിയേഷന്‍ പ്രവര്‍ത്തനങ്ങളെ തകര്‍ക്കുന്ന ഈ കമ്പനി നയങ്ങളെ അസ്സോസിയേഷന്‍ ശക്തമായി അപലപിക്കുന്നു. ഇതിനെതിരേ ആഞ്ഞടിക്കാന്‍ അസ്സോസിയേഷന്‍, മെംബര്‍മാരോട് ആഹ്വാനം ചെയ്യുന്നു.

എന്നാല്‍ ഈ ദുഃഖ വാര്‍ത്തകള്‍ക്കിടയിലും അസ്സോസിയേഷന് സന്തോഷിക്കാന്‍ വകയുണ്ട്. യൂ.ഏ.ഇ-യിലും കേരളത്തിലുമുള്ള ആരാധകരുടെ സ്നേഹോഷ്മള വരവേല്‍പ്പേറ്റുവാങ്ങിയ ലോകപ്രശസ്ത മദ്യ പരിശോധകന്‍ ശ്രീ. കുറുമാന്‍ അവര്‍കള്‍ ഈ ആഴ്ചാവസാനം ബാംഗ്ലുര്‍ സന്ദര്‍ശിക്കുന്നതാണെന്ന് അസ്സോസിയേഷന്‍ ഓഫീസില്‍ അറിയിപ്പ് കിട്ടിയിട്ടുണ്ട്. അദ്ദേഹത്തിന്റെ ഔദ്യോഗിക കൃത്യനിര്‍വ്വഹണത്തിന് എല്ലാ സഹകരണങ്ങള്‍ ചെയ്തു കൊടുക്കാനും അകമ്പടി സേവിക്കുവാനും അസ്സോസിയേഷന്‍ ബാധ്യസ്ഥരാണ്. പലവിധ മദ്യങ്ങളുടെ നിറവും ഗുണവും മണവുമെല്ലാം ഈയവസരത്തില്‍ പരിശോധനയ്ക്ക് വിധേയമാക്കുന്നതായിരിക്കും. എല്ലാ മെംബര്‍മാരേയും ഈ ചടങ്ങില്‍ പങ്കെടുക്കുവാനായി ഹാര്‍ദ്ദവമായി ക്ഷണിച്ചു കൊള്ളുന്നു.

ജെയ് ബാംഗ്ലൂര്‍ ബ്ലോഗേര്‍സ് അസ്സോസിയേഷന്‍.
സെക്രട്ടറി (ഒപ്പ്)

മീറ്റില്‍ കാണാത്തത്

2006-08-16T12:41:00.000+05:30

സ്ഥലം: മഴനൂലിന്റെ വസതി.
സമയം: മീറ്റിനു മുന്‍പ്.
ചിത്രത്തില്‍ കാണുന്നത് മഴനൂല്‍ കുടിച്ച് വറ്റിച്ച കുപ്പികള്‍. ഈ കാര്‍ട്ടനില്‍ കാണുന്നത് കൂടാതെ ചുറ്റും കാണുന്ന അലമാരയ്ക്കുള്ളില്‍ ഉള്ളതും ഇത് തന്നെ. വെളിച്ചക്കുറവ് മൂലം എന്റെ മൊബൈലില്‍ ഇത്രയേ പതിഞ്ഞുള്ളൂ.

സ്ഥലം: ചന്ദ്രക്കാറന്റെ വസതി.
സമയം: മീറ്റിനു ശേഷം.
ചിത്രത്തില്‍ കാണുന്നത് ചന്ദ്രക്കാറന്‍ കുടിച്ച് വറ്റിച്ച കുപ്പികള്‍. മീറ്റ് കഴിഞ്ഞ് ചന്ദ്രക്കാറന്റെ വീട്ടില്‍ ചെന്ന് എന്നോടും കുമാരേട്ടനോടും, ചന്ദ്രക്കാറനോടും കത്തി വച്ചതോടുകൂടി മഴനൂലിന്റെ കെട്ടിറങ്ങി. എനിക്കിനിയും വേണം എന്നു പറഞ്ഞ മഴനൂല്‍ കരച്ചില്‍ തുടങ്ങി. പുലര്‍ച്ചെ രണ്ട് മണിക്ക് ഏത് ബാര്‍ തുറന്നിരിക്കുന്നു? അവസാനം ചന്ദ്രക്കാറന്‍ കുടിച്ച് ബാക്കി വച്ച കുപ്പികള്‍ എടുത്ത് അതില്‍ നിന്നും തുള്ളികളായി ശേഖരിച്ച്, മഴനൂല്‍ ഒരു കോക്ക്‍ടെയില്‍ പെഗ് ഉണ്ടാക്കിക്കുടിച്ച് സമാധാനപ്പെട്ടു. ഈ ശുഷ്കാന്തി എല്ലാക്കാര്യത്തിലും കണ്ടിരുന്നെങ്കില്‍ ...

മൂന്നാം ബാംഗ്ലൂര്‍ മീറ്റ് ചിത്രങ്ങള്‍

2006-08-09T19:34:00.000+05:30

ഇടതു നിന്നും വലത്തേക്ക്: വര്‍ണ്ണമേഘങ്ങള്‍, ചന്ദ്രക്കാറന്‍, മഴനൂലുകള്‍, ശ്രീജിത്ത്, ആര്‍ദ്രം, കുഞ്ഞന്‍സ്, നളന്‍, കുമാര്‍, സിനോജ്, കൊച്ചന്‍, കുട്ടപ്പായി.

ഇടത് നിന്നും വലത്തേക്ക്: കുഞ്ഞന്‍സ്, നളന്‍, കുമാര്‍, സിനോജ്, കൊച്ചന്‍, കുട്ടപ്പായി, വര്‍ണ്ണമേഘങ്ങള്‍, ചന്ദ്രക്കാറന്‍, മഴനൂലുകള്‍, ശ്രീജിത്ത്, ആര്‍ദ്രം

മൂന്നാം ബാംഗ്ലൂര്‍ മീറ്റ്

2006-08-08T16:07:00.000+05:30

ബാംഗ്ലൂര്‍ പ്ലസ്സ് പ്രോഗ്രാമിലേക്ക് സ്വാഗതം.

ഇന്റര്‍നെറ്റിലെ ഒരു കൂട്ടായ്മയുടെ കഥയാണ് ഇന്ന് മെട്രോപ്ലസ്സില്‍. ഇന്റര്‍നെറ്റില്‍ ബ്ലോഗെഴുതുന്നവരുടെ ഒരു ഒത്തുചേരല്‍ ഇന്നലെ ബാംഗ്ലൂര്‍ നടക്കുകയുണ്ടായി. കൂടുതല്‍ വിവരങ്ങളുമായി നമ്മുടെ റിപ്പോര്‍ട്ടര്‍ ബ്ലോഗുണ്ണി ലൈനിലുണ്ട്.

ബ്ലോഗുണ്ണി, കേള്‍ക്കാമോ

കേള്‍ക്കാം സ്പോട്ടുണ്ണീ, പറയൂ.

എന്താണ് അവിടെ നടന്നത്, ഒന്ന് വിശദമാക്കാമോ?

മലയാളത്തില്‍ ബ്ലോഗെഴുതുന്ന ബാംഗ്ലൂരില്‍ നിന്നുള്ളവരുടെ അത്യപൂര്‍വ്വമായ ഒരു സൌഹൃദ‌ ഒത്തുചേരലാണ് ഇക്കഴിഞ്ഞ ദിവസം നടന്നത്. ഇവര്‍ കഴിഞ്ഞ രണ്ട് മാസങ്ങള്‍ക്കുള്ളില്‍ ഇത് മൂന്നാം തവണയാണ് ഒത്തുചേരുന്നത്.

ബ്ലോഗുണ്ണി തമാശ പറയുകയാണോ? കഴിഞ്ഞ രണ്ട് മാസത്തിനുള്ളില്‍ രണ്ട് തവണ കണ്ടവര്‍ ഒന്നും കൂടി ഒത്ത് ചേരുന്നതാണോ അത്യപൂര്‍വ്വകൂടിക്കാഴ്ച?

തീര്‍ച്ചയായും സ്പോട്ടുണ്ണീ, മലയാളികള്‍ ഇങ്ങനെ ചെയ്യുന്നത് ഒരു വലിയ കാര്യം തന്നെയാണ്. ഒരോ തവണ കാണുമ്പോഴും‍ കൂടുതല്‍ അടുക്കുകയും, ഓരോ തവണ പിരിയുമ്പോഴും‍ വീണ്ടും അടുത്ത് തന്നെ കാണണമെന്ന് പറഞ്ഞ് പിരിയുകയും ചെയ്യുന്നത് നമ്മള്‍ മലയാളികളില്‍ അപൂര്‍വ്വം തന്നെയാണ്.

ശരി തന്നെ. മീറ്റിനെക്കുറിച്ചുള്ള കൂടുതല്‍ വിശേഷങ്ങള്‍ പറയൂ ബ്ലോഗുണ്ണീ.

വൈകീട്ട് അഞ്ച് മണിക്കാണ് എല്ലാവരും ഒത്ത് കൂടാന്‍ തീരുമാനിച്ചിരുന്നത്. ആഗ്രാലേയ്ക്കിനരികിലുള്ള ലെമണ്‍ഗ്രാസ് എന്ന ഹോട്ടലില്‍. അവിടെ ആദ്യം എത്തിയത് ശ്രീജിത്ത് ആണ്. തുടര്‍ന്ന് കൂഞ്ഞന്‍ എത്തിച്ചേര്‍ന്നു. അപ്പോള്‍ തന്നെ ആറ് കൈകളുള്ള ഒരു വണ്ടി അവിടെ എത്തി. കുട്ടപ്പായി ഓടിച്ചിരുന്ന കാറില്‍ നിന്ന് കുട്ടപ്പായിയും മഴനൂലും കൊച്ചനുമെല്ലാം ഇലക്ഷന്‍ പ്രചരണത്തിനെന്നപോലെ കൈ പുറത്തിട്ട് വീശീക്കൊണ്ടിരുന്നത് കൊണ്ടാണ് ഞാന്‍ അങ്ങിനെ പറഞ്ഞത്.

ഹ ഹ. ബ്ലോഗുണ്ണീ, അത് കൊള്ളാം, എന്നിട്ട്?

തുടര്‍ന്ന് നളനും, സിനുവും, ചന്ദ്രക്കാറനും ആര്‍ദ്രവും എത്തിച്ചേര്‍ന്നു. വര്‍ണ്ണമേഘങ്ങള്‍ ചില സ്വകാര്യതിരക്കുകള്‍മൂലം വൈകുമെന്ന് പറഞ്ഞിരുന്നു. അന്നത്തെ പ്രത്യേക ക്ഷണയിതാവായ കുമാറും ബാംഗ്ലൂരില്‍ താന്‍ വന്ന കാര്യത്തിന്റെ ഔദ്യോഗികമായ തിരക്കുകളില്‍ പെട്ടുപോയതിനാല്‍ വൈകുമെന്ന് വിളിച്ചറിയിച്ചു. ഉടനേ തന്നെ വിളിച്ച അജിത്തും ഇതേ പോലെ വൈകുമെന്ന് പറയുകയേ ഉള്ളൂ എന്നെല്ലാവരും കരുതിയെങ്കിലും, ഏവരേയും ഞെട്ടിച്ചുകൊണ്ട് താന്‍ ഓഫീസിലെ തിരക്കുകള്‍‍ മൂലം വരില്ലെന്നറിയിക്കുകയാണുണ്ടായത്. കിരണ്‍സ് പനിമൂലം ചടങ്ങില്‍ നിന്ന് വിട്ടു നില്‍ക്കുകയാണെന്ന് ആദ്യമേ അറിയിച്ചിരുന്നു. ഇങ്ങനെ പ്രതീഷിച്ചിരുന്ന പന്ത്രണ്ട് പേരും ആയതോടെ ചടങ്ങുകള്‍ക്ക് തിരി തെളിഞ്ഞു. അതിശയകരമായ കാര്യം, ഇതെല്ലാം വെറും അഞ്ച് മിനുട്ടുകള്‍ക്കുള്ളില്‍ നടന്നു എന്നുള്ളതാണ്. മലയാളികളെങ്കിലും ഇത്രയ്ക്ക് കൃത്യനിഷ്ഠ അപൂര്‍വ്വം തന്നെ സ്പോട്ടുണ്ണീ.

ബ്ലോഗുണ്ണീ, അപ്പോള്‍ എത്രയായിട്ടുണ്ടാകും സമയം?

അപ്പോള്‍ ഒരു ഉദ്ദേശ്യം അഞ്ചര, ആറ് ആയിക്കാണണം.

ബ്ലോഗുണ്ണീ, എന്നിട്ടെന്ത് സംഭവിച്ചു എന്ന് പറയൂ.

തുടര്‍ന്ന് ഇവര്‍ ലെമണ്‍ ഗ്രാസ് ഹോട്ടലിനകത്ത് കയറി പന്ത്രണ്ട് സീറ്റുള്ള ടേബിളിനു ചുറ്റും ഉപവിഷ്ഠരായി. ആദ്യം അസ്സോസിയേഷന്‍ തീരുമാനിച്ചിരുന്നത് ഈ കൂട്ടായ്മ കുട്ടപ്പായിയുടെ പിറന്നാള്‍ ആഘോഷമായി കണക്കാക്കാനായിരുന്നു. എന്നാല്‍ ഇത്രയധികം ആളുകള്‍ വന്ന് ചേര്‍ന്നപ്പോള്‍ ഇത് ഒരാള്‍ മാത്രം ചിലവ് ചെയ്യുന്നതാക്കണ്ട, ഒരു ബാംഗ്ലുര്‍ ബ്ലോഗേര്‍സ് മീറ്റ് തന്നെയാക്കാം എന്ന് അസ്സോസിയേഷന്‍ മാറ്റി തീരുമാനിച്ചു. പരിപാടികളില്‍ ഉചിതമായ മാറ്റങ്ങള്‍ വരുത്താന്‍ അസ്സോസിയേഷനു അധികാരമുണ്ടെന്ന് നോട്ടീസില്‍ പറഞ്ഞിരുന്നതുമാണല്ലോ.

നോട്ടീസില്‍ ഒരു നാടകത്തിനെ കാര്യവും പറഞ്ഞിരുന്നല്ലോ. അതിനെക്കുറിച്ച് പറയൂ ബ്ലോഗുണ്ണീ.

നാടകം അവിടെ നടത്താന്‍ ഉദ്ദേശിച്ചിരുന്ന ചില കാര്യങ്ങളുടെ സൂചന മാത്രമായിരുന്നു. അസ്സോസിയേഷന്‍ നടത്താനുദ്ദേശിച്ചിരുന്ന പരിപാടികള്‍, ഹോട്ടലിന്റെ വിദേശമദ്യത്തിന്റെ മെനു കണ്ട് കണ്ണ് മഞ്ഞളിച്ച ചില പേരുകേട്ട മദ്യഅസ്സോസിയേഷന്‍ മെമ്പേര്‍സ് പാടെ വിസ്‌മൃതിയിലാഴ്തി എന്നാണ് അറിയുവാന്‍ കഴിഞ്ഞത്.

ബ്ലോഗുണ്ണീ, ഒന്ന് ചോദിച്ചോട്ടെ, ഈ വന്ന പ്രവര്‍ത്തകരൊക്കെ തമ്മില്‍ അറിയുന്നവരായിരുന്നോ?

ആദ്യ രണ്ട് മീറ്റിങ്ങുകള്‍ക്കുണ്ടായിരുന്ന അഞ്ച് പ്രവര്‍ത്തകര്‍ ഒഴിച്ച് ബാക്കി എല്ലാവരും പുതുമുഖങ്ങളായിരുന്നു. അല്ലെങ്കിലും ഒരു മദ്യക്കുപ്പിക്ക് ചുറ്റും ഇരിക്കുന്ന ആളുകള്‍ക്ക് പരിചയപ്പെടാന്‍ എത്ര നേരം വേണം. കുപ്പികള്‍ കൂട്ടിമുട്ടുമ്പോള്‍ സൌഹൃദം ജനിക്കുന്നു എന്നാണല്ലോ പഴമൊഴി. സ്പോട്ടുണ്ണിയെ ഞാന്‍ പരിചയപ്പെടുന്നതും...

ബ്ലോഗുണ്ണീ, കണ്ട്രോള്‍. വിഷയത്തില്‍ നിന്ന് നമ്മള്‍ മാറിപ്പോകുന്നു. ആളുകള്‍ ലൈവായി കാണുന്ന ഒരു പ്രോഗ്രാം ആണെന്ന് മറക്കണ്ട.

സ്പോട്ടുണ്ണീ, സോറി. അപ്പോള്‍ ഞാന്‍ പറഞ്ഞ് വന്നത്, ഇവര്‍ പരിചയപ്പെട്ടതിനെക്കുറിച്ചാണ്. ആദ്യം കണ്ടതിനും ഹോട്ടലിനു അകത്ത് കയറി ഓരോരോ പെഗ് ഓര്‍ഡര്‍ ചെയ്തതിനും ഇടയ്ക്ക് ഇവര്‍ തമ്മില്‍ വളരെ അടുത്തുകഴിഞ്ഞിരുന്നു. അതാണ് ബ്ലോഗുകളുടെ പ്രത്യേകത ബ്ലോഗുണ്ണീ, മനസ്സ് തുറന്നെഴുതുന്ന ബ്ലോഗുകള്‍ വായിച്ചാല്‍ തന്നെ എഴുത്തുകാരനുമായി മാനസികമായി വളരെ അടുക്കും നമ്മള്‍. ആദ്യം കാണുമ്പോള്‍ തന്നെ വളരെ നാളത്തെ പരിചയമുള്ളവരായി തോന്നും അവര്‍ക്ക് തമ്മില്‍ തമ്മില്‍.

ബ്ലോഗുണ്ണീ, ഞാന്‍ മനസ്സിലാക്കുന്നു. ഇത് പറയൂ, വൈകിയെന്നറിയിച്ചവര്‍ എപ്പോഴാണ് ഇവരുടെ കൂടെ ചേര്‍ന്നത്?

ഇവര്‍ ഒന്ന് രണ്ട് പെഗുകള്‍ തീര്‍ക്കുന്നതിനു മുന്നേ തന്നെ വര്‍ണ്ണമേഘങ്ങള്‍ അവിടെ എത്തിച്ചേര്‍ന്നിരുന്നു. ഭക്ഷണപാത്രത്തില്‍ നിന്ന് കണ്ണെടുത്ത്, ഉയര്‍ത്തിപ്പിടിച്ച ഗ്ലാസ്സ് മുഖത്തിനു മുന്നില്‍ നിന്ന് മാറ്റി നോക്കാന്‍ സാവകാശം കിട്ടിയവര്‍ മാത്രമേ അത് ശ്രദ്ധിച്ചുള്ളൂ എന്ന് മാത്രം. സന്ധ്യ ആയതോടുകൂടി ഹോട്ടല്‍ ജീവനക്കാര്‍ കൊതുകിനെത്തുരത്താന്‍ അവിടെ കുന്തിരിക്കം കത്തിച്ചു വച്ചു. പരിസരമാകെപ്പരന്ന പുകമറയ്ക്കുള്ളില്‍ നിന്നും ഒരു നിഴല്‍ പോലെ ഒരാള്‍ നടന്ന് വന്ന് അശരീരി പോലെ പറഞ്ഞു, "ഞാന്‍ ഗന്ധര്‍വന്‍". അത് മറ്റാരുമായിരുന്നില്ല, അസ്സോസിയേഷന്റെ പ്രത്യേകക്ഷണയിതാവ് കുമാര്‍ തന്നെ ആയിരുന്നു.

അത് കൊള്ളാം. നല്ല വരവ് തന്നെ. എന്നിട്ടുള്ള വിശേഷങ്ങള്‍ പറയൂ.

കുമാര്‍ വന്നതോടുകൂടി അതുവരെ ഉറങ്ങിക്കിടന്ന പ്രവര്‍ത്തകര്‍ക്ക് ഒരു പ്രത്യേക ഓജസ്സും ഉന്മേഷവും വന്ന് ചേര്‍ന്നു. അതു വരെ ഇല്ലാതിരുന്ന ഒരു ആവേശത്തോടും മാത്സര്യഭാവത്തോടും കൂടി അവര്‍ കൂടുതല്‍ പെഗ്ഗുകള്‍ക്കും സ്റ്റാര്‍ട്ടറുകള്‍ക്കും ഓര്‍ഡര്‍ ചെയ്യുന്നത് കാണാമായിരുന്നു.

അപ്പോള്‍ അങ്ങിനെ ശരിയായ അങ്കത്തിന് കളമൊരുങ്ങി അല്ലേ.

അതെ സ്പോട്ടുണ്ണീ, പിന്നീട് അവിടെ നടന്നതിന് അങ്കംമെന്ന് മാത്രം പറഞ്ഞാല്‍പ്പോര, മാമാങ്കം എന്ന് തന്നെ പറയണം. പരസ്പരപാരകളും, പാട്ടുകളും, ഫോട്ടോയെടുപ്പുകളും, തമാശയ്ക്കുള്ള അടികളും, വാശിക്കുള്ള കുടികളും, നിര്‍ത്താതെയുള്ള തീറ്റയും ഒക്കെയായി അവര്‍ ആഘോഷിക്കുക തന്നെയായിരുന്നു.

ബ്ലോഗുണ്ണീ, അരാണ് അവിടെ പാടുകയും മറ്റ് കലാപരിപാടികള്‍ അവതരിപ്പിക്കുകയും ഒക്കെ ചെയ്തവര്‍?

കൊച്ചന്‍ ആണ് ആദ്യം പാട്ടിന് തുടക്കമിട്ടത്. കൊച്ചന്‍ തനിക്കറിയാവുന്ന രീതിയില്‍ നന്നായി പാടിയപ്പോള്‍, മറ്റുള്ളവര്‍ തങ്ങള്‍ക്കാവുന്ന രീതിയില്‍ വാഹ് വാഹ് വിളിച്ചും, കൂടെപ്പാടിയും ആസ്വദിച്ചു. തുടന്ന് മഴനുല്‍ രണ്ട് ഗസലുകള്‍ പാടി. മഴനൂല്‍ കഴിഞ്ഞ മീറ്റിനും പാട്ട് പാടി എല്ലാവരേയും പുളകിതനാക്കിയ ഒരു വ്യക്തിയാണെന്നറിയാമല്ലോ. പിന്നീട് പാടിയത് കുമാരേട്ടനായിരുന്നു. അതോടെ എല്ലാവരും ആ കലാപരിപാടിയില്‍ ഉള്ള താത്പര്യം നിര്‍ത്തുകയാണുണ്ടായത്.

മറ്റെന്തൊക്കെയായിരുന്നു അവര്‍ ചെയ്തത്?

ശ്രീജിത്തിന്റെ ശ്രദ്ധ മുഴുവന്‍ നേരവും കുമാറിന്റെ ക്യാമറയില്‍ തന്നെയായിരുന്നു. ഒരു സ്ക്രൂഡ്രൈവര്‍ ഉണ്ടായിരുന്നെങ്കില്‍ ശ്രീജിത്ത്, കുമാറിന്റെ ക്യാമറ മുല്ലപ്പൂവിന്റെ ടെമ്പ്ലേറ്റ് പോലെ ആക്കിയേനെ എന്ന് ഒരു അനോണി പറയുകയുണ്ടായി. ചന്ദ്രക്കാറന്‍ ബ്ലോഗുകളെക്കുറിച്ചും നവീന ബ്ലോഗിങ്ങ് പ്രവണതകളെക്കുറിച്ചും ഒരു പ്രബന്ധം അവതരിപ്പിച്ചു. അത് ശ്രദ്ധിച്ചവര്‍ ആരുമില്ലാത്തതിനാല്‍ എനിക്ക് കൂടുതല്‍ വിവരങ്ങള്‍ ലഭ്യമല്ല. മഴനൂല്‍ മദ്യനുലായി മാറിക്കൊണ്ടിരുന്ന നിമിഷങ്ങളില്‍ ഒരു മലയാളി മദ്യപിച്ചാല്‍ എങ്ങിനെ ഇരിക്കും എന്ന മിമിക്രി അവതരിപ്പിച്ചു. അത് മിമിക്രി ആയിരുന്നില്ല, ആ കഥാപാത്രമായി ജീവിക്കുകയായിരുന്നു മഴനൂല്‍ എന്നും സ്ഥിതീകരിക്കാനാവാത്ത റിപ്പോര്‍ട്ടുകളുണ്ട്. അസ്സോസിയേഷന്‍ ഭാരവാഹികളുടെ തെരഞ്ഞെടുപ്പ് നടത്താന്‍ ശ്രീജിത്ത് കൊണ്ട് വന്ന അടിയന്തിരപ്രമേയം, അദ്ദേഹത്തിന്റെ തൊട്ടടുത്തിരുന്ന ആര്‍ദ്രം പോലും കേട്ടിട്ടില്ലെന്നതാണ് ഇപ്പോള്‍ പറയുന്നത്. തുടര്‍ന്നു ബ്ലോഗുകളുടെ വിശ്വാസ്യതയെക്കുറിച്ചു സംസാരിച്ച കുമാര്‍, മദ്യത്തില്‍ മുങ്ങിയ തന്റെ സാന്നിധ്യം എല്ലായിടത്തും എത്താന്‍ ഒരു പറവയെപ്പോലെ ബ്ലോഗ്ഗേര്‍സിനിടയില്‍ പാറി നടന്നു.

എല്ലാ നല്ല കാര്യങ്ങള്‍ക്കും ഒരു അവസാനം വേണമല്ലോ. ഈ കൂടിച്ചേരല്‍ എപ്പോള്‍ അവസാനിച്ചു എന്നും കൂടെ ഒന്ന് പറയൂ.

നളന്‍ വളരെ നേരത്തേ തന്നെ മറ്റൊരു പാര്‍ട്ടിയില്‍ പങ്കെടുക്കാനായി വിട വാങ്ങിയിരുന്നു. ബാക്കിയുള്ളവര്‍ ഒരു പത്ത് മണിയോടുകൂട് അവരവരുടെ ഗൃഹം ലക്ഷ്യമാക്കി നീങ്ങി. എന്നാല്‍, ചന്ദ്രക്കാരന്റെ സ്നേഹം നിറഞ്ഞ ക്ഷണം നിരസിക്കാനാവാതെ കുമാറും, മഴനുലും, ശ്രീജിത്തും അദ്ദേഹത്തിന്റെ വീട്ടിലേക്കാണ് പോയത്. അവരുടെ മീറ്റിങ്ങ് വീണ്ടും തുടര്‍ന്നുവെങ്കിലും അതിനെപ്പറ്റിയുള്ള റിപ്പോര്‍ട്ടുകള്‍ ലഭ്യമല്ല.

നന്ദി ബ്ലോഗുണ്ണി, ഇത്രയും വിശദമായ റിപ്പോര്‍ട്ട് നല്‍കിയതിന് നന്ദി. ഇപ്പോള്‍ നമ്മളുടെ കൂടെ വര്‍ണ്ണമേഘങ്ങള്‍ സ്റ്റുഡിയോയില്‍ ഉണ്ട്. നമുക്ക് അദ്ദേഹത്തോട് ഈ കൂടിച്ചേരലിനെക്കുറിച്ച് സംസാരിക്കാം.

സ്വാഗതം വര്‍ണ്ണം.

നന്ദി.

താങ്കള്‍ വൈകിയാണല്ലോ അവിടെ എത്തിച്ചേര്‍ന്നത്. എന്താണ് വൈകാന്‍ കാരണം.

എന്റെ ഭാര്യയ്ക്ക് ചുമയുടെ അസുഖം വന്നത് കാരണം അവളേയും കൂട്ടി ഡോക്റ്ററുടെ അടുത്ത് പോയിരുന്നു. അതാണ് വൈകിയത്.

താങ്കള്‍ വളരെ സ്നേഹമുള്ള ഒരു ഭര്‍ത്താവാണല്ലേ.

അതുകൊണ്ടൊന്നുമല്ല. മരുന്ന് വാങ്ങിക്കൊടുത്തില്ലെങ്കില്‍ അവള്‍ ചുമച്ച് ചുമച്ച് എന്നെ ഉറങ്ങാന്‍ സമ്മതിക്കില്ല. അത് കൊണ്ടാണ്.

അത് ശരി. താങ്കളെ അവര്‍ അസ്സോസിയേഷന്റെ അനൌദ്യോഗിക പ്രസിഡന്റ് എന്നാണ് വിളിക്കുന്നത് എന്ന് കേട്ടല്ലോ. അത് ശരിയാണോ?

അതവര്‍ സ്നേഹം കൊണ്ട് വിളിക്കുന്നതാണ്. ഈ അസ്സോസിയേഷനില്‍ എല്ലാവരും പ്രസിഡന്റാണ് എന്നതാണ് ഞങ്ങള്‍ സ്വീകരിച്ചിരിക്കുന്ന നയം.

സംഘടനയുടെ നയങ്ങളെക്കുറിച്ച് വ്യക്താമാക്കാമോ?

ബാംഗ്ലുരില്‍ ഉള്ള മലയാളി ബ്ലോഗേര്‍സിനെ ഒന്നിച്ച് കൊണ്ട് വരിക എന്ന ലക്ഷ്യത്തോടെയാണ് ഈ സംഘടന രൂപീകരിച്ചിരിക്കുന്നത്. ഇപ്പോള്‍ സംഘടന ചെയ്യുന്ന കാര്യങ്ങള്‍ പുതിയ ബ്ലോഗേര്‍സിന്റെ ബ്ലൂലോകവുമായി പരിചയപ്പെടുത്തിക്കൊടുക്കുക, ഇടയ്ക്കിടെ ഇങ്ങനെ ഓരോ മീറ്റിങ്ങ് കൂടുക, അംഗങ്ങളുടെ പിറന്നാളുകള്‍ സമുചിതം ആഘോഷിക്കുക എന്നിവ മാത്രമാണ്. ബാലാരിഷ്ടതകള്‍ മാറുന്നതോടുകൂടി കൂടുതല്‍ വ്യക്തമായ അജന്‍ഡകള്‍ ഉരുത്തിരിഞ്ഞ് വരുമെന്ന് പ്രതീക്ഷിക്കുന്നു.

ഇക്കഴിഞ്ഞ കൂടിക്കാഴ്ചയെ താങ്കള്‍ എങ്ങിനെ വിലയിരുത്തുന്നു?

ഇതു വരെ നടന്ന മീറ്റിങ്ങുകളില്‍ വച്ച് ഏറ്റവും പങ്കാളിത്തവും അവേശവും അവകാശപ്പെടാവുന്നത് ഈ മീറ്റിങ്ങിനാണ്. ഓരോ മീറ്റിങ്ങുകള്‍ കഴിയുമ്പോഴും പരസ്പര സ്നേഹവും, അടുപ്പവും ഒക്കെ കൂടിക്കൂടി വരുന്നുണ്ടെന്നത് വളരെ നല്ല കാര്യമാണ്. പോരാണ്ട് മഴനൂല്‍ പോലെയുള്ളവരുടെ കപ്പാസിറ്റിയും വര്‍ദ്ധിപ്പിക്കാന്‍ ഈ മീറ്റിങ്ങുകള്‍ സഹായിക്കുന്നുണ്ടെന്നതാണ് മനസ്സിലാക്കാന്‍ കഴിയുന്നത്.

അസ്സോസിയേഷന്റെ ഭാവി പരിപാടികള്‍ എന്തൊക്കെയാണ്?

വളര്‍ന്ന് വരുന്ന മലയാളീ ബ്ലോഗേര്‍സിനെ പ്രോത്സാഹിപ്പിക്കുക. കഴിയുമെങ്കില്‍ പുതിയ ബ്ലോഗേര്‍സിനെ വാര്‍ത്തെടുക്കാന്‍ ഒരു അക്കാദമി സ്ഥാപിക്കുക. സ്ഥിരമായി കൂടാന്‍ ഒരു ബാര്‍ അറ്റാച്ച്ഡ് ഓഡിറ്റോറിയം പണിയുക എന്നിങ്ങനെ പലതും ഉണ്ട്. ഇപ്പോള്‍ ഒന്നും പറയാറായിട്ടില്ല.

നന്ദി വര്‍ണ്ണമേഘം സ്റ്റുഡിയോയില്‍ വന്നതിന്.

നന്ദി.

ബാംഗ്ലൂര്‍ പ്ലസ്സ് എന്ന പ്രോഗ്രാം സമയക്കുറവ് മൂലം ഇവിടെ അവസാനിക്കുകയാണ്. പ്രോഗ്രാം എല്ലാവര്‍ക്കും ഇഷ്ടപ്പെട്ടു എന്ന് കരുതട്ടെ. നിങ്ങളുടെ വിലയേറിയ അഭിപ്രായങ്ങളും നിര്‍ദ്ദേശങ്ങളും ഞങ്ങളെ അറിയിക്കുക. ഞങ്ങളുടെ വിലാസം.

ബാംഗ്ലൂര്‍ പ്ലസ്സ്,
ബൂലോകം,
ബാംഗ്ലൂര്‍.

ബൂലോഗ‌ ക്ലബ്ബ്‌: നാടകവിവരങ്ങള്‍ക്ക്‌...

2006-08-05T13:30:00.000+05:30

ബൂലോഗ‌ ക്ലബ്ബ്‌: നാടകവിവരങ്ങള്‍ക്ക്‌...: "നേരത്തെ തീരുമാനിച്ചപ്രകാരം ബാംഗ്ലൂര്‍ ബ്ലോഗ്ഗേര്‍സ്‌ നാളെ അതായതു ആഗസ്റ്റ്‌ 5നു നാടകവേദിയില്‍ ഒത്തുചേരുന്നു. സര്‍ജാപ്പുര്‍ റോഡിലുള്ള ലെമണ്‍ ഗ്രാസ്‌ റെസ്റ്റോറന്റിലാണു സ്റ്റേജു കെട്ടിയിരിക്കുന്നതു. സമയം വൈകിട്ടു 5 മണി."

ബൂലോഗ‌ ക്ലബ്ബ്‌: നാടക നോട്ടീസ്

2006-08-03T12:22:00.000+05:30

ബൂലോഗ‌ ക്ലബ്ബ്‌: നാടക നോട്ടീസ്

പ്രിയമുള്ള തീറ്റപ്രേമികളേ, കള്ള്‍‌സ്നേഹികളേ,

ബാംഗ്ലൂര്‍ ബ്ലോഗ്ഗേര്‍സ് തിയറ്റര്‍ അവതരിപ്പിക്കുന്ന രണ്ടാമത്തെ നാടകം ഉടന്‍ പ്രദര്‍ശനമാരംഭിക്കുന്നു. നാടകത്തിന്റെ പേര് "കുട്ടപ്പായിയുടെ കളസം കീറി". ച്ഛില്‍‌ല്‍‌ല്‍.....

ബൂലോക ക്ലബ്ബ്: കുട്ടപ്പായിക്ക് ജന്മദിനാശംസകള്‍

2006-07-28T05:36:00.001+05:30

കുട്ടപ്പായിക്ക് ജന്മദിനാശംസകള്‍

ബാംഗ്ലൂര്‍ ബ്ലോഗേര്‍സ് അസ്സോസിയേഷന്റെ ഓജസ്സും ജീവനാഡിയുമായ, നമ്മുടെ എല്ലാം പ്രിയങ്കരനായ കുട്ടപ്പായി ഇന്ന് തന്റെ പിറന്നാള്‍ ആഘോഷിക്കുന്നു. കുട്ടപ്പായിക്ക് എന്റെ പേരിലും, ബാംഗ്ലൂര്‍ ബ്ലോഗേര്‍സിന്റെ പേരിലും, സര്‍വ്വോപരി ഈ ക്ലബ്ബിന്റെ പേരിലും ഞാന്‍ ആശംസകള്‍ നേര്‍ന്നു കൊള്ളുന്നു.

കുട്ടപ്പായിയുടെ ജന്മദിനം പ്രമാണിച്ചുള്ള ആഘോഷപരിപാടികള്‍ക്ക് ഇന്ന് കൊടിയേറുകയാണ്.

...

ബൂലോഗ‌ ക്ലബ്ബ്‌: ഞങ്ങക്കും മേനം

2006-07-06T05:04:00.000+05:30

ബൂലോഗ‌ ക്ലബ്ബ്‌: ഞങ്ങക്കും മേനം

കേരളത്തില്‍ ബ്ലോഗേര്‍സ് മീറ്റ് നടത്തുന്നു. ദുബായിയിലും നടക്കുന്നു ഒരെണ്ണം. ഈ രണ്ട് മീറ്റുകളും എങ്ങും ചര്‍ച്ചാവിഷയമാകുന്നു.
ബ്ലോഗില്‍ മീറ്റുകളെക്കുറിച്ചുള്ള വാര്‍ത്തകള്‍ നിറയുന്നു. മാധ്യമങ്ങള്‍ ഈ വിശേഷം ആഘോഷിക്കുന്നു. എന്നാല്‍ ഈ സന്തോഷാവസരത്തിലും ഒരു കൂട്ടര്‍ മാത്രം വിസ്മരിക്കപ്പെട്ടിരിക്കുന്നു. ഉള്ളില്‍ ആയിരം സൂചിമുനകുത്തുന്ന വേദന മറന്നു അവര്‍ ഈ മംഗളമുഹൂര്‍ത്തത്തില്‍ ‍പങ്ക് ചേരുന്നു. ആ ഹതഭാഗ്യര്‍ കേരളത്തില്‍ നിന്നും അറേബ്യയില്‍ നിന്നും കാതം ദൂരെക്കിടക്കുന്ന ബാംഗ്ലൂര്‍ ബ്ലോഗ്ഗേര്‍സ്‌ ആകുന്നു...

ബൂലോഗ‌ ക്ലബ്ബ്‌: ബാംഗ്ലൂര്‍ ബ്ലോഗ്ഗേര്‍സ്‌ മീറ്റ്‌, ഒരവലോകനം.

2006-06-26T05:48:00.000+05:30

നമസ്കാരം,

ബൂലോകവാര്‍ത്തകള്‍ വായിക്കുന്നത്‌ ബ്ലോഗുകുമാരന്‍.

പ്രധാനവാര്‍ത്തകള്‍...

ബാംഗ്ലൂര്‍ ബൂലോകമീറ്റ്‌ ശ്രീജിത്തിന്റെ മേല്‍നോട്ടത്തില്‍ വിജയകരമായി സമാപിച്ചു. ശ്രീജിത്ത്‌, കുഞ്ഞന്‍, വര്‍ണ്ണമേഘങ്ങള്‍, അജിത്ത്‌, മഴനൂലുകള്‍, കല്ല്യാണി, കുട്ടപ്പായി തുടങ്ങിയവര്‍ സംബന്ധിച്ച മീറ്റിലൂടെ, പുതു സൌഹ്രുദങ്ങള്‍ക്ക്‌ മൊട്ടിടുകയും, ബൂലോകത്തേയും, ഭൂലോകത്തേയും കുറിച്ച്‌ അനവധി ചര്‍ച്ചകള്‍ക്കു വഴിതെളിയ്ക്കുകയും ചെയ്തതായാണ്‌ അറിയാന്‍ കഴിഞ്ഞത്‌. കൂടിക്കാഴ്ച്ചകള്‍ ഇനിയും തുടരാമെന്ന പ്രതീക്ഷകളോടെ, ഉദ്ദേശം പത്തര മണിയോടെ ചടങ്ങുകള്‍ക്കു തിരശ്ശീലവീണു.

...

ബാംഗ്ലൂര്‍ ബ്ലോഗ്ഗേര്‍സ്‌ മീറ്റ്‌, ഒരവലോകനം.

ബൂലോഗ‌ ക്ലബ്ബ്‌: ബാംഗ്ഗ്ലൂര്‍ ബ്ലോഗന്മാരുടെ ഒന്നാം തിരു കൂടിക്കാഴ്ച.

2006-06-22T12:27:00.000+05:30

ബാംഗ്ലൂര്‍ എന്ന സിലിക്കണ്‍ വാലിയുടെ ഉള്ളിലും പ്രാന്തപ്രദേശങ്ങളിലും പണി ചെയ്തും, ബ്ലോഗ്‌ ചെയ്തും ജീവിച്ച്‌ പൊരുന്ന എല്ലാ പുലി ജന്മങ്ങള്‍ക്കും വേണ്ടി ഒരു വട്ടമേശ സമ്മേളനം നടത്താന്‍ നാട്ടുകൂട്ടം തീരുമാനിച്ചിരിക്കുന്നു.

ദിവസം: ജൂണ്‍ 24 - 2006
സമയം: ഉദ്ദേശം 5 മണി വൈകുന്നേരം
വേദി: കൂലങ്കഷമായ ചര്‍ച്ചകള്‍ക്ക്‌ സ്ഥിരം വേദിയാകാറുള്ള 'ഫോറം മാള്‍'.

ആയതിന്റെ അവിഘ്ന നടത്തിപ്പിനും, അത്ഭുത വിജയത്തിനും എല്ലാ ബാംഗ്ലൂര്‍ ബ്ലോഗരേയും, തല്‍പര വായനക്കാരെയും സവിനയം ക്ഷണിച്ചു കൊള്ളുന്നു.

...

ബാംഗ്ഗ്ലൂര്‍ ബ്ലോഗന്മാരുടെ ഒന്നാം തിരു കൂടിക്കാഴ്ച.